ដោយៈ គង់ សូរិយា
ភ្នំពេញៈ លោកឧកញ៉ាម៉ន សុខាប្រធានសមាគមអ្នកអភិវឌ្ឍន៍ដីឡូត៍កម្ពុជា ត្រូវបានក្រុមប្រឹក្សាភិបាលសមាគម សម្រេចបោះឆ្នោតគាំទ្រឲ្យដឹកនាំសមាគមនេះក្នុងអាណត្តិទី២បន្តទៀត។
ការសម្រេចបែបនេះ របស់សមាជិកក្រុមប្រឹក្សាភិបាល ដោយសារពួកគាត់មើលឃើញពីភាពជាអ្នកដឹកនាំ សមត្ថភាព និងកម្រិតប្រជាប្រិយភាពរបស់លោកឧកញ៉ាមានភាពល្អប្រសើរ។
លោកឧកញ៉ាម៉ន សុខាប្រធានសមាគមបានមានប្រសាសន៍ក្នុងសន្និបាតប្រចាំឆ្នាំរបស់សមាគម ដែលបានប្រារពធ្វើកាលពីចុងសប្តាហ៍មុនបានមានប្រសាសន៍ថ្លែងអំណរគុណ ដល់សមាជិកក្រុមប្រឹក្សាភិបាល ទីប្រឹក្សា និងសមាជិកសមាគម ដែលបានគាំទ្រនិងជ្រោមជ្រែងទាំង ស្មារតី សម្ភារៈ ថវិកាដល់សមាគមនាពេលកន្លងមក។
លោកឧកញ៉ាបានបន្តថា ក្នុងអាណត្តិទី១ ក្នុងពេលលោកបំពេញការងារបានមួយរយៈ យើងបានប្រឈមនឹងវិបត្តិជំងឺកូវីដ១៩ ប៉ុន្តែសមាគមនៅតែបន្តប្រឹងប្រែង និងធ្វើសកម្មភាពជាច្រើនទាំងការផ្សព្វផ្សាយច្បាប់ ធ្វើសកម្មភាពសម្បុរសធ៌ម ការបណ្តុះបណ្តាលពង្រឹង សមត្ថភាពសមាជិកជាដើម។
លោកឧកញ៉ាម៉ន សុខាបានបន្តថា “អ្វីដែលយើងផ្តោតសំខាន់ផងដែរ គឺធ្វើយ៉ាងណាឲ្យសមាជិកសមាគម រៀបចំគំរោងអភិវឌ្ឍន៍ឲ្យមានចីរភាព និងការអភិវឌ្ឍន៍ប្រកបដោយការទទួលខុសត្រូវផ្នែកសង្គម”។ លោកបន្តថា “ជាមួយគ្នានេះ យើងក៏ជម្រុញឲ្យសមាជិក សមាជិកាសមាគមគោរពច្បាប់ និងអនុវត្តន៍នូវអ្វី ជាការណែនាំរបស់និយ័តករអាជីវកម្មអចលនវត្ថុ និងបញ្ចាំផងដែរ”៕