ដោយ: លាងហួរ
ហុងកុង: គិតចាប់តាំងពីឆ្នាំ២០១៥មក លោកស្រី Kristine Zhang បានចំណាយពេលជាច្រើនខែក្នុងមួយឆ្នាំៗនៅក្នុងប្រទេសសិង្ហបុរីជាកន្លែង ដែលកូនប្រុសរបស់លោកស្រីកំពុងសិក្សា។
ចំណែកស្វាមីរបស់លោកស្រី ជាអតីតនាយកប្រតិបត្តិនៅក្រុមហ៊ុនបរទេសមួយ ដែលបាននឹងកំពុងគ្រប់គ្រងអាជីវកម្មបាញ់ថ្នាំពណ៌រថយន្តនៅក្នុងទីក្រុងក្វាងទុងនៃប្រទេសចិន។
ស្វាមីរបស់លោកស្រី Zhang មានភាពស្ទាក់ស្ទើរក្នុងការផ្លាស់ប្តូរទីលំនៅរបស់គ្រួសារទៅកាន់ប្រទេសសិង្ហបុរី ឬប្រទេសផ្សេងទៀត ដោយសារតែលោកមានសុទិដ្ឋិនិយមនៅលើទីផ្សារប្រទេសចិន ប៉ុន្តែនាពេលថ្មីៗនេះលោកក៏បានផ្លាស់ប្តូរគំនិតវិញ។
លោកស្រី Zhang បានមានប្រសាសន៍ថា យើងនឹងបានជួបជុំគ្រួសារឡើងវិញក្នុងពេលឆាប់ៗនេះ ប៉ុន្តែមិនដូចកាលពីដំបូងឡើយ ព្រោះសិង្ហបុរីមិនមែនជាប្រទេសឆ្លងកាត់សម្រាប់កូនប្រុសយើងទៀតនោះទេ ប៉ុន្តែវាជាផ្ទះអចិន្ត្រៃយ៍របស់ពួកយើង។
ប្តីប្រពន្ធទាំង២គឺជាផ្នែកមួយនៃរលកថ្មីនៃការអន្តោប្រវេសន៍ និងការវិនិយោគរបស់ប្រទេសចិននៅក្នុងប្រទេសសិង្ហបុរី ដែលប្រទេសនេះកំពុងក្លាយជាមេដែកស្រូបទាញអ្នកជំនាញ និងអ្នកមានទ្រព្យស្តុកស្តម្ភ ស្របពេលប្រទេសចិនកំពុងប្រឈមនឹងបញ្ហាសេដ្ឋកិច្ច និងសង្គម។ នេះបើយោងតាមបទសម្ភាសន៍ជាមួយអ្នកប្រឹក្សា អ្នកវិនិយោគ និងជនអន្តោប្រវេសន៍។
ទីផ្សារក្នុងស្រុកដ៏យឺតយ៉ាវ ការកើនឡើងនៃការបិទខ្ទប់ជំងឺឆ្លង ការដាំក្បាលចុះនៃវិស័យអចលនទ្រព្យ និងភាពខ្សោយរបស់ប្រាក់យ័ន កំពុងបំផ្លាញអស់ទ្រព្យសម្បត្តិរបស់យើងបន្តិចម្តងៗ រួមទាំងការត្រួតពិនិត្យពន្ធកាន់តែតឹងរ៉ឹងនៅពេលខាងមុខ ហើយចំណុច ដែលសំខាន់នោះគឺយើងមិនដឹងថា រឿងនេះនឹងអូសបន្លាយពេលយូរប៉ុណ្ណាទៀតនោះទេ។
គ្រួសារនេះ គ្រោងនឹងលក់អចលនទ្រព្យចំនួន៣នៅក្នុងប្រទេសចិនក្នុងឆ្នាំ២០២៣ ដែលមានតម្លៃប្រហែល២,១លានដុល្លារអាមេរិក ដើម្បីផ្លាស់ប្តូរទីលំនៅទៅកាន់ប្រទេសសិង្ហបុរី ដោយពួកគេសង្ឃឹមថានឹងក្លាយជាពលរដ្ឋ និងចាប់ផ្តើមអាជីវកម្មថ្មីមួយនៅទីនោះ។
ភាពទាក់ទាញរបស់ប្រទេសសិង្ហបុរីមានលក្ខណៈចម្រុះសម្រាប់ជនអន្តោប្រវេសន៍ចិនដីគោក ដោយជនជាតិចិនគឺជាក្រុមជនជាតិភាគតិចដ៏ធំបំផុតនៅក្នុងប្រទេស សិង្ហបុរី ហើយភាសាចិនកុកងឺត្រូវបាននិយាយយ៉ាងទូលំទូលាយ។
ប្រទេសសិង្ហបុរីក៏បានរក្សាទំនាក់ទំនងយ៉ាងជិតស្និទ្ធជាមួយទីក្រុងប៉េកាំង ផងដែរ ទោះបីជាភាពតានតឹងរវាងប្រទេសចិន និងអាមេរិកកំពុងតែឡើងកំដៅយ៉ាងណាក្តី។
យោងតាមរបាយការណ៍របស់ក្រុមហ៊ុន Henley Global Citizens Report ដែលបានចេញផ្សាយកាលពីខែមិថុនាបានឱ្យដឹងថា ទីក្រុងសាំងហ្គាពួរ គឺជាគោលដៅមួយក្នុងចំណោមគោលដៅកំពូលទាំង៥ សម្រាប់អ្នកមានទ្រព្យស្តុកស្តម្ភ ដែលប្រាថ្នាចង់ធ្វើចំណាកស្រុក រួមជាមួយនឹងប្រទេសអារ៉ាប់រួម អូស្ត្រាលី អ៊ីស្រាអែល និងប្រទេសស្វីស៕
