ដោយៈ សហការី
ព្រះសីហនុៈ ការសាងសង់ហេដ្ឋារចនាសម្ព័ន្ធ គឺជាការបែងចែងផ្លែផ្កាសេដ្ឋកិច្ចជាតិ ប្រកបដោយសមធម៌ ហើយការតភ្ជាប់ហេដ្ឋារចនាសម្ព័ន្ធនេះ ជាតម្រូវការចាំបាច់របស់ប្រជាពលរដ្ឋ ដើម្បីកាត់បន្ថយការចំណាយការធ្វើដំណើរផង និងការបន្ថយលើការចំណាយពេលវេលាផង។
នេះបើយោងតាមការថ្លែងរបស់សម្តេចតេជោ ហ៊ុន សែន ក្នុងឱកាសអញ្ជើញសម្ពោធដាក់ឱ្យប្រើប្រាស់ផ្លូវ តភ្ជាប់ស្រុកព្រៃនប់ ទៅក្រុងព្រះសីហនុ ប្រវែងជាង៤៣គីឡូម៉ែត្រ តម្លៃ៧៦លានដុល្លារ នាព្រឹកថ្ងៃទី២២ ខែធ្នូ ឆ្នាំ២០២២។
សម្តេចតេជោ ហ៊ុន សែន បានថ្លែងថា “ខ្ញុំបានផ្តល់សារសំខាន់លើការតភ្ជាប់ ហើយការតភ្ជាប់ មិនមែនគ្រាន់តែជាការតភ្ជាប់រវាងខេត្តមួយ និងខេត្តមួយនោះទេ ប៉ុន្តែត្រូវតែគិតទៅដល់ផលចំណេញ របស់ប្រជាពលរដ្ឋរបស់យើង នៅតាមតំបន់នានា ដែលជាសេចក្តីត្រូវការចាំបាច់”។សម្តេចតេជោបន្តថា “ខ្ញុំនៅតែផ្តល់អាទិភាព រៀបចំគោលនយោបាយ សំដៅទៅលើការតភ្ជាប់ហេដ្ឋារចនាសម្ព័ន្ធរូបវន្ត ដើម្បីបម្រើដល់សេចក្តីត្រូវការរបស់ប្រជាជន កាត់បន្ថយការចំណាយ របស់ប្រជាជនក្នុងការធ្វើដំណើរ និងការចំណាយទៅលើពេលវេលា”។
សម្តេចតេជោបានថ្លែងទៀតថា “ការវិនិយោគលើហេដ្ឋារចនាសម្ព័ន្ធ ដូចជាផ្លូវថ្នល់នេះ នោះហើយគឺជាការបែងចែកផ្លែផ្កា នៃកំណើនសេដ្ឋកិច្ច ប្រកបដោយសមធម៌ ដែលខ្ញុំតែងតែនិយាយថា ការបែងចែកផ្លែផ្កានៃកំណើនសេដ្ឋកិច្ច ប្រកបដោយសមធម៌ គ្មានអ្វីល្អជាងការកសាងហេដ្ឋារចនាសម្ព័ន្ធ ដើម្បីបម្រើឲ្យប្រជាពលរដ្ឋនោះទេ”។
សម្តេចបានលើកជាឧទាហរណ៍ថា យើងមិនអាចយកលុយទៅចែកស្មើៗគ្នា ឬអ្នកនេះប៉ុណ្ណេះ អ្នកនោះប៉ុណ្ណោះ ប៉ុន្តែយើងធ្វើជាផ្លូវ ផ្លូវនេះអ្នកមានក៏ធ្វើដំណើរ អ្នកក្រក៏ធ្វើដំណើរបានដូចគ្នា ការកសាងសាលារៀន ការកសាងមន្ទីរពេទ្យ ឬការកសាងអ្វីដែលជាសម្បត្តិសាធារណៈ គឺវាជាសមធម៌ណាស់ នៃការបែងចែកផ្លែផ្កានៃកំណើនសេដ្ឋកិច្ច៕
