ដោយ៖ សុផារី
ភ្នំពេញ៖ នៅក្នុងឆ្នាំ២០២២ មានគម្រោងសំណង់លំនៅឋានមានចំនួន៤.៣២១គម្រោង ដែលមានតម្លៃទុនវិនិយោគប្រមាណជាង១.៤១២លានដុល្លារអាមេរិក។
នេះបើយោងតាមរបាយការណ៍លទ្ធផលការងាររបស់ក្រសួងរៀបចំដែនដី នគរូបនីយកម្ម និងសំណង់ សម្រាប់ឆ្នាំ២០២២នេះ។
ក្នុងនោះ សំណង់ជាលក្ខណៈបុរីមានចំនួន៣៥គម្រោង ស្មើនឹង៩.៩១២ខ្នង មានតម្លៃវិនិយោគប្រមាណ៨២០លានដុល្លារ ប្រភេទផ្ទះល្វែងមានចំនួន៦.៦០៩ល្វែង ក្នុងតម្លៃវិនិយោគប្រមាណ៥៥៤លានដុល្លារ និងអគារស្នាក់នៅរួមមានចំនួន៥១គម្រោង ដែលមានតម្លៃទុនវិនិយោគប្រមាណ២២២លានដុល្លារ។
សំណង់សណ្ឋាគារមានចំនួន២០គម្រោង មានតម្លៃទុនវិនិយោគប្រមាណ៧១លានដុល្លារ សំណង់អគារពាណិជ្ជកម្មមានចំនួន១៨៥គម្រោង មានតម្លៃទុនវិនិយោគប្រមាណ៤៣៦លានដុល្លារ សំណង់អគាររោងចក្រមានចំនួន១១៧គម្រោង មានតម្លៃទុនវិនិយោគប្រមាណ៥៣៣លានដុល្លារ និងសំណង់អគារពហុមុខងារមានចំនួន៧គម្រោង ដែលមានតម្លៃទុនវិនិយោគប្រមាណ១៤៩លានដុល្លារ។
របាយការណ៍បានបង្ហាញថា ពេញមួយឆ្នាំ២០២២នេះ ប្រទេសកម្ពុជាមានគម្រោងសំណង់នៅទូទាំងប្រទេសចំនួន៣.៨២៧គម្រោង ដែលមានផ្ទៃក្រឡាសំណង់សរុបជាង៦លាន៥សែនម៉ែត្រការ៉េ ក្នុងតម្លៃទុនវិនិយោគ ជាង២.៦៣៤លានដុល្លារអាមេរិក។
បើធៀបនឹងរយៈពេលដូចគ្នាក្នុងឆ្នាំ២០២១ ទិន្នន័យគម្រោងសំណង់ក្នុងឆ្នាំ២០២២នេះបានថយចុះចំនួន៩៨គម្រោង ដែលមានចំនួន៣.៩២៥គម្រោង និងមានផ្ទៃក្រឡាសំណង់ចំនួន១២លាន៦សែនម៉ែត្រការ៉េ ក្នុងតម្លៃទុនវិនិយោគប្រមាណជាង៥.២១០លានដុល្លារអាមេរិក ដែលមានការថយចុះ៤៩,៤២%៕
