ដោយៈ សុផារី
ភ្នំពេញៈ ការសាងសង់ផ្លូវក្រវាត់ក្រុងទី៣ ជាផ្លូវយុទ្ធសាស្រ្ដសំខាន់មួយ ដែលជួយសម្រួលដល់ការកកស្ទះ នៅក្នុងក្រុងភ្នំពេញ និងសម្រួលការដឹកទំនិញបច្ចុប្បន្ន សម្រេចវឌ្ឍនភាពជាង៨១ភាគរយហើយ និងគ្រោងបញ្ចប់ការសាងសង់នៅបាក់កណ្តាលឆ្នាំ២០២៣។
លោក ហ៊ាង សុទ្ធាយុត្តិ អគ្គនាយកបច្ចេកវិទ្យា និងទំនាក់ទំនងសាធារណៈ និងជាអ្នកនាំពាក្យក្រសួងសាធារណការ និងដឹកជញ្ជូន បានបញ្ជាក់ប្រាប់នៅព្រឹកថ្ងៃទី២៨ ខែធ្នូ ឆ្នាំ២០២២ថា ការសាងសង់ខ្សែក្រវាត់ទី៣សម្រេចវឌ្ឍនភាពបាន៨១,៥៥ភាគរយហើយ គិតរហូតមកទល់នឹងពេលនេះ។
លោកបញ្ជាក់ឱ្យដឹងថា “សម្រាប់ការងារដែលនៅសេសសល់ គឺនៅត្រង់ដូរទំហំការងារស្ពាននៅប្រឡាយ៩៤ និងប្រឡាយ៩៦ ការងារស្ពានរំលងត្រង់ផ្លូវជាតិលេខ៤ និងការងារផ្លូវត្រង់គីឡូម៉ែត្រ០+០០ ដល់គីឡូម៉ែត្រ៥+៩០០ ជាដើម”។
ផ្លូវក្រវាត់ក្រុងខ្សែទី៣ មានប្រវែងសរុប៥២,៩៨៣គីឡូម៉ែត្រ មានទទឹង២២ម៉ែត្រមាន៤គន្លង។ ហើយផ្លូវក្រវ៉ាត់ក្រុងខ្សែទី៣នេះ បានតភ្ជាប់ពីផ្លូវជាតិលេខ៦ លេខ៥ លេខ៤ លេខ៣ លេខ២ រហូតដល់ផ្លូវជាតិលេខ១ កាត់ភូមិសាស្រ្តរាជធានីភ្នំពេញ និងខេត្តកណ្តាល ដោយប្រើប្រាស់ថវិកាលើការសាងសង់ក្នុងទំហំទឹកប្រាក់២៦៧លានដុល្លារអាមេរិក។
កន្លងមក លោកស៊ុន ចាន់ថុល ទេសរដ្ឋមន្រ្តី រដ្ឋមន្ត្រីក្រសួងសាធារណការ និងដឹកជញ្ជូនធ្លាប់បានបញ្ជាក់ថា សព្វថ្ងៃថវិកាដែលយើងមានសាងសង់បានត្រឹមតែពាក់កណ្តាលក្រវ៉ាត់ទេ ដោយសារត្រើយខាងកើតយើងត្រូវសាងសង់ស្ពានឆ្លងទន្លេមេគង្គនៅក្ដីតាកុយ និងត្រូវសាងសង់ស្ពាននៅកោះដាច់ ទើបក្លាយទៅជាក្រវាត់ក្រុងពេញលេញ។
គម្រោងនេះ បានចុះហត្ថលេខាលើកិច្ចព្រមព្រៀងឥណទាន សម្បទានជាមួយធនាគារ នីហរ័ណអាហរ័ណចិន និងក្រសួងសេដ្ឋកិច្ច និងហិរញ្ញវត្ថុ ក្នុងទឹកប្រាក់ចំនួន២៥៩លានដុល្លារអាមេរិក កាលពីខែកក្កដា ឆ្នាំ២០១៨ និងបានបើកការដ្ឋានសាងសង់ នៅខែមករា ឆ្នាំ២០១៩។
ការសាងសង់ផ្លូវក្រវាត់ក្រុងទី៣នេះ គឺជាការតភ្ជាប់ផ្ទៃក្នុង និងសមាហរណកម្មតំបន់ ពិសេសតភ្ជាប់ផ្លូវអាស៊ានហាយវ៉េ និងផ្លូវរបៀងសេដ្ឋកិច្ចសំខាន់ៗរបស់មហាអនុតំបន់មេគង្គ រួមចំណែកក្នុងការសម្រួលការដឹកជញ្ជូនឆ្លងកាត់ព្រំដែន ជំរុញពាណិជ្ជកម្មអន្តរជាតិ និងភស្តុភារកម្មតំបន់ និងប្រែក្លាយទឹកដី ដែលនៅសងខាងផ្លូវខ្សែក្រវាត់ក្រុងនេះ ទៅជាតំបន់អភិវឌ្ឍបូរីលំនៅដ្ឋាន តំបន់ភស្តុភារកម្ម និងឧស្សាហកម្ម ដ៏មានសក្តានុពល និងប្រសិទ្ធភាពសេដ្ឋកិច្ចរបស់កម្ពុជា៕
