ដោយ៖ សុផារី
កំពត៖ សម្ដេចតេជោ ហ៊ុន សែន បានលើកឡើងថា គម្រោងឥណទានសម្រាប់ការអភិវឌ្ឍកម្ពុជា ដែលកម្ពុជាទទួលបានពីចិន មានទំហំចន្លោះពី៥០០ទៅ១ពាន់លានដុល្លារអាមេរិកក្នុង១ឆ្នាំ ហើយកម្ចីរបស់ប្រទេសចិនជាកម្ចីដែលកម្ពុជាជាអ្នកកំណត់អាទិភាព។
ថ្លែងនៅក្នុងពិធីបើកការដ្ឋានស្ដារនិងលើកកម្រិតគុណភាពផ្លូវកំពត-កែប ព្រឹកថ្ងៃទី៣០ ខែធ្នូ ឆ្នាំ២០២២ សម្ដេចតេជោ ហ៊ុន សែន បានលើកឡើងថា កម្ចីដែលប្រទេសចិនបានផ្តល់ដល់កម្ពុជាជាកម្ចី ដែលគម្រោងកម្ពុជាជាអ្នកដាក់ប្រចាំឆ្នាំ ហើយកម្ពុជាខ្លួនឯងជាអ្នកកំណត់អាទិភាព ដែលទាំងអស់នេះហើយជាចំណុចពិសេស នៃការប្រើប្រាស់ឥណទានរបស់ចិន។
សម្តេចតេជោ បានមានប្រសាសន៍ថា “អ្វីដែលជាការគោរពរបស់យើងចំពោះមិត្តចិន គឺមិត្តចិនបានផ្ដល់ឲ្យយើងទៅតាមការចង់បានរបស់យើង។ មិនមែនបានសេចក្ដីថា យើងចង់កសាងផ្លូវលេខ៣៣ ផ្លូវលេខ៣១ ប៉ុន្ដែបែរជាម្ចាស់ឥណទានចង់ឲ្យទៅកសាងនៅកន្លែងផ្សេងទេ”។
សម្តេចតេជោក៏រំលឹកថា “ប្រមាណជាង១០ឆ្នាំមុននេះ មានស្ថាប័នហិរញ្ញវត្ថុមួយ មកជួបធ្វើការជាមួយក្រសួងសេដ្ឋកិច្ច និងហិរញ្ញវត្ថុ ហើយបន្ទាប់ជួបជាមួយខ្ញុំ។ គេឲ្យយើងខ្ចីប្រាក់ ប៉ុន្ដែគេមិនគោរពតាមសំណូមពររបស់យើងនោះទេ”។
រហូតមកដល់ពេលនេះ រដ្ឋាភិបាលចិន ផ្ដល់ប្រាក់កម្ចីមកកម្ពុជា ជិត៣ពាន់លានដុល្លារ ដើម្បីកសាងហេដ្ឋារចនាសម្ព័ន្ធ រួមមាន ផ្លូវជាតិលេខ៣ លេខ៥៧ លេខ៥៨ លេខ៦ លេខ៨ លេខ៤ លេខ១០ លេខ៧១C លេខ៣១ លេខ៣៣ លេខ៤១ និងមានផ្លូវផ្សេងៗទៀត៕
