ដោយ៖ សុផារី
ភ្នំពេញ៖ ក្រុងអរិយក្សត្រត្រូវបានប្រកាសរៀបចំបង្កើតជាទីក្រុងថ្មី ស្របពេលគម្រោងស្ពានភ្នំពេញ-អរិយក្សត្រកំពុងត្រូវបានរៀបចំកសាងក្នុងពេលឆាប់ៗនេះផងដែរ។ យ៉ាងណាក្តី អ្នកជំនាញលើកឡើងថា តំបន់អរិយក្សត្រនឹងមានការអភិវឌ្ឍរីកចម្រើន ទាមទារឱ្យមានការរៀបចំការគ្រប់គ្រងបន្ថែមទៀត។
លោកអះអាងថា ទីផ្សារតំបន់អរិយក្សត្រនៅមានចំនួនប្រជាជននៅមានកម្រិតនៅឡើយ ហើយប្រសិនបើគោលនយោបាយរបស់រាជរដ្ឋាភិបាលកម្ពុជាបង្កើតក្រុងនឹងនាំលំហូរប្រជាសាស្រ្តមករស់នៅក្នុងតំបន់នេះបន្ថែម ហើយក៏ទាក់ទាញមកការបង្កើតទីលំនៅថ្មី និងការបង្កើតអាជីវកម្មថ្មីក៏មានចំនួនច្រើនផងដែរ។
លោក ច្រឹក សុខនីម អគ្គនាយកក្រុមហ៊ុន Century 21 Mekong បានមានប្រសាសន៍នៅថ្ងៃទី២៦ ខែធ្នូ ឆ្នាំ២០២២ថា រហូតមកទល់ពេលនេះ ប្រជាជននៅក្នុងតំបន់អរិយក្សត្រនៅមានមានកម្រិតនៅឡើយ។ តាមរយៈគោលនយោបាយបង្កើតក្រុងរបស់រាជរដ្ឋាភិបាលកម្ពុជា តំបន់នេះរំពឹងថា នឹងអាចនាំលំហូរប្រជាសាស្រ្តមករស់នៅក្នុងតំបន់នេះបន្ថែម នោះនឹងមានការបង្កើតទីលំនៅថ្មី និងការបង្កើតអាជីវកម្មថ្មីច្រើនជាងមុន។
យ៉ាងណាក្តី ក្រៅពីការប្រកាសបង្កើតក្រុងថ្មី និងការកសាងស្ពានឆ្លងកាត់ទន្លេ ភ្ជាប់ពីទីក្រុងភ្នំពេញទៅកាន់ក្រុងអរិយក្សត្រ លោកយល់ឃើញថា នៅមិនទាន់មានភាពគ្រប់គ្រាន់ក្នុងការអភិវឌ្ឍអរិយក្សត្រឱ្យក្លាយជាតំបន់រីកចម្រើនមួយនៅឡើយទេ ដោយវាទាមទារឱ្យមានការរៀបចំប្រព័ន្ធហេដ្ឋារចនាសម្ព័ន្ធ ការសាងសង់រោងចក្រ នៅក្នុងក្រុងបន្ថែមទៀត ដើម្បីជំរុញទាក់ទាញឱ្យប្រជាជនទៅរស់នៅក្នុងក្រុងថ្មីនោះកាន់តែច្រើន។
លោកបានបន្ថែមថា “យើងត្រូវជំរុញឱ្យមានការវិនិយោគបន្ថែមទៀត នៅក្នុងតំបន់អរិយក្សត្រ តាមរយៈយន្តការការកសាងប្រព័ន្ធហេដ្ឋារចនាសម្ព័ន្ធ ការសាងសង់រោងចក្រ ឬប្រព័ន្ធផ្លូវនៅក្នុងក្រុងឱ្យមានការរីកចម្រើនបន្ថែមទៀត។ នាំយកប្រជាពលរដ្ឋថ្មីៗ ចូលទៅរស់នៅក្នុងតំបន់។ នៅពេលមានប្រជាជនកើនឡើង តម្រូវការនៃអាជីវកម្មក៏មានការរីកចម្រើនផងដែរ”៕
