ដោយៈ ច្រាយ ចំណាន
ស្វាយរៀងៈ បន្ទាប់ពីរងវិបត្តិរយៈពេល៣ឆ្នាំាំ តម្លៃដីធ្លីនៅក្រុងបាវិតបានងើបឡើងបណ្តើរៗហើយ ក្រោយពេលទីក្រុងនេះកំពុងស្ថិតនៅចំណុចតភ្ជាប់ដ៏ល្អមួយ សម្រាប់ប្រទេសក្នុងតំបន់។
ការប្រកាសសាងសង់ផ្លូវល្បឿនលឿនភ្នំពេញ បាវិតរបស់រដ្ឋាភិបាល ក៏បានជួយដល់មូលដ្ឋាននេះផងដែរ ដោយសារនេះជាផ្លូវល្បឿនលឿនទី១ ដែលតភ្ជាប់ជាមួយប្រទេសក្នុងតំបន់ និងមូលដ្ឋានតំបន់កំពុងមានភាពអំណោយផល ព្រោះក្រុងបាវិតមានចំណុចពិសេសមួយចំនួន ទី១ ជាទីក្រុងដែលស្ថិតនៅក្នុងផែនការអភិវឌ្ឍន៍ត្បូងត្បូង របស់ប្រទេសក្នុងតំបន់ ទី២ ក្រុងបាវិតស្ថិតនៅក្នុងផែនការអភិវឌ្ឍន៍ វិស័យឧស្សាហកម្មរបស់រដ្ឋាភិបាល ឆ្នាំ២០១៥ ២០២៥។
ទី៣ ជាទីក្រុងស្ថិតនៅចមន្លោះទីក្រុងធំពីរ គឺរាជធានីភ្នំពេញ ដែលមានប្រជាពលរដ្ឋរស់នៅប្រមាណ៣លាននាក់ និងទីក្រុងហូ ជីម៉ិញ ដែលមានមនុស្សរស់នៅប្រមាណ៨លាននាក់។
មន្រ្តីមូលដ្ឋានមួយរូប ដែលបំរើការងារនៅសង្កាត់ច្រកម្ទេស ក្រុងបាវិតបានមានប្រសាសន៍ឲ្យដឹងកាលពីចុងសប្តាហ៍មុនថា សកម្មភាពទិញលក់ដី ធ្លីបានចាប់់ផ្តើមកំរើកឡើងបណ្តើរៗហើយ ខណៈតម្លៃដីក៏បានកំរើកផងដែរ នៅតាមតំបន់មួយចំនួន ពិសេសតំបន់ស្ថិតនៅភូមិធ្លក សង្កាត់ច្រកម្ទេស ដីកំពុងឡើងថ្លៃ ដោយសារតំបន់នេះ ជាតំបន់សំចតរបស់អ្នកដំណើរ ដែលឆ្លងកាត់ប្រទេសទាំងងពីរកម្ពុជា វៀតណាម។
លោកបន្តថា “ខ្ញុំកំពុងមានសុទិដ្ឋិនិយមថា នៅឆ្នាំ២០២៣នេះតម្លៃ និងតម្រូវការដីសម្រាប់អភិវឌ្ឈន៍នឹងងើបឡើងវិញច្រើន ខណៈព៌តមានក៏បានលើកឡើងថា អ្នកវិនិយោគចិននឹងត្រលប់មកវិញ”។
អ្នកតាមដាន និងវិភាគព៌តមានអចលនទ្រព្យ លោកយិន លាងគង់ ដែលជាអគ្គនាយកគេហទំព័រPropertyarea.asia បានទទួលស្គាល់ថា តម្លៃដីនៅក្រុងបាវិត ច្បាស់ណាស់វានឹងងើបឡើងវិញ នាពេលឆាប់ៗខាងមុខនេះ បន្ទាប់ពីការប្រកាសសាងសង់ផ្លូវល្បឿនលឿនភ្នំពេញ បាវិតនឹងធ្វើឡើងនៅពាក់កណ្តាលឆ្នាំនេះ។
លោកបន្តថា “មូលដ្ឋានសេដ្ឋកិច្ច មូលដ្ឋានឧស្សាហកម្ម កំណើនប្រជាសាស្រ្តនៅទីក្រុងនេះ កំពុងជម្រុញកត្តានគរូបនីយកម្មក្រុងបាវិតកាន់តែរីកធំ និងទាក់ទាញទាំងអ្នកអភិវឌ្ឍន៍ក្នុងស្រុក និងអន្តរជាតិ”។ លោកបន្តថា “គោលនយោបាយកម្ពុជា បូកមួយជាមួយវៀតណាម នឹងការកសាងហេដ្ឋារចនាសម្ព័ន្ឋរបស់រដ្ឋាភិបាល ប្រទេសជិតខាងទាំងពីរ នឹងជម្រុញកំនើននិងការរីកចម្រើនសេដ្ឋកិច្ចសង្គម នៅទីក្រុងនេះកាន់តែខ្លាំងនាពេលអនាគត។
លោកយិន លាងគង់បានបន្តថា ការផ្តល់ជំនួយពីធនាគារអភិវឌ្ឍន៍អាស៊ី ដើម្បីលើកកំពស់ហេដ្ឋារចនាសម្ព័ន្ឋ គុណភាពបរិស្ថាន និងធ្វើឲ្យស្តង់ដាជីវិតប្រសើរឡើ ក៏ជាចក្ខុវិស័យមួយ ដែលធនាគារនេះបានសិក្សាឃើញថា ទីក្រុងនេះនឹងមានមនុស្សរស់នៅច្រើន និងរីកចម្រើនលឿននាពេលអនាគតផងដែរ៕
