ដោយ: សុផារី
ភ្នំពេញ: ក្នុងចំណោមខណ្ឌទាំង១៤ នៅក្នុងរាជធានីភ្នំពេញ តម្លៃដីធ្លីនៅក្នុងខណ្ឌនីមួយៗមានភាពខុសគ្នា និងមានកំណើនខ្ពស់ខ្លាំងខុសគ្នាផងដែរ។ ក្នុងនោះ ខណ្ឌដែលមានតម្លៃដីធ្លីខ្ពស់បំផុត គឺខណ្ឌដូនពេញ។
យោងតាមរបាយការណ៍វាយតម្លៃតម្លៃដីធ្លី ក្នុងរាជធានីភ្នំពេញប្រចាំឆ្នាំ២០២២ របស់សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា ចេញផ្សាយកាលពីពេលថ្មីៗនេះបានបង្ហាញថា ក្នុងចំណោមខណ្ឌទាំង១៤ ខណ្ឌដូនពេញជាទីតាំង ដែលមានតម្លៃដីធ្លីខ្ពស់បំផុត ដោយមានតម្លៃខ្ពស់រហូតដល់ទៅ១៣.៣០០ដុល្លារអាមេរិក ក្នុងមួយម៉ែត្រការ៉េ ខណៈតម្លៃទាបបំផុតប្រមាណ២.២០០ដុល្លារអាមេរិក ក្នុងមួយម៉ែត្រការ៉េ។
ទិន្នន័យដដែលបានបង្ហាញថា តម្លៃដីធ្លីខ្ពស់បំផុតនៅក្នុងខណ្ឌដូនពេញ ស្ថិតនៅក្នុងសង្កាត់ផ្សារថ្មីទី១ ទី២ ទី៣ ដែលស្ថិតនៅចន្លោះ៥.៦០០ដុល្លារ ដល់ទៅ១៣.៣០០ដុល្លារ សម្រាប់ទីតាំងជាប់ផ្លូវធំ និង២.៩០០ដុល្លារ ដល់ទៅ៤.៧០០ដុល្លារ សម្រាប់ទីតាំងជាប់ផ្លូវតូចៗ។
សង្កាត់ដែលមានតម្លៃដីធ្លីខ្ពស់បន្ទាប់ទី២ គឺសង្កាត់ផ្សារកណ្តាលទី១ និងទី២ ដែលតម្លៃដីអាចកើនឡើង រហូតដល់១២.២០០ដុល្លារអាមេរិកក្នុងមួយម៉ែត្រការ៉េ និងទាបបំផុតក៏៥.៦០០ដុល្លារ សម្រាប់ទីតាំងជាប់ផ្លូវធំ។
ចំណែកសង្កាត់ផ្សេងទៀត នៅក្នុងខណ្ឌដូនពេញ ដូចជា សង្កាត់ចតុមុខ សង្កាត់ជ័យជំនះ សង្កាត់បឹងរាំង សង្កាត់ផ្សារចាស់ នៅតែមានតម្លៃខ្ពស់ផងដែរ ពោលគឺគិតជាមធ្យម មានតម្លៃប្រមាណ៥.០០០ដុល្លារអាមេរិក ដល់៩.៤០០ក្នុងមួយម៉ែត្រការ៉េ៕
