ដោយ៖ សុផារី
ភ្នំពេញ៖ ប្រមុខរាជរដ្ឋាភិបាលកម្ពុជាបានប្រកាសថា ឆ្នាំ២០២៣នេះ គឺជាឆ្នាំដែលខេត្តក្រចេះនឹងទទួលបានផលប្រយោជន៍ពីការអភិវឌ្ឍប្រព័ន្ធហេដ្ឋារចនាសម្ព័ន្ធនានា។ ក្រៅពីគម្រោងស្ពានឆ្លងកាត់ទន្លេ និងផ្លូវថ្នល់នានា រដ្ឋាភិបាលគ្រោងសិក្សានិងសាងសង់គម្រោងផ្លូវចំនួន៤ខ្សែបន្ថែមទៀត នៅក្នុងខេត្តក្រចេះ ក្នុងឆ្នាំ២០២៣នេះ។
សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងក្នុងពីធីបើកការដ្ឋានសាងសង់ ស្ពានឆ្លងកាត់ទន្លេមេគង្គខេត្តក្រចេះ និងផ្លូវតភ្ជាប់ នៅព្រឹកថ្ងៃទី២ ខែមករា ឆ្នាំ២០២៣នេះថា ខេត្តក្រចេះជាខេត្តមួយត្រូវប៉ាន់សម្រាប់ឆ្នាំថ្មី លើហេដ្ឋារចនាសម្ព័ន្ធ។
សម្តេចតេជោ ហ៊ុន សែន បានបញ្ជាក់ថា ផ្លូវក្នុងខេត្តក្រចេះប្រមាណ៤ខ្សែទៀត នឹងត្រូវសិក្សា និងចាប់ផ្តើមសាងសង់ក្នុងឆ្នាំ២០២៣។ ផ្លូវនោះរួមមាន ផ្លូវលេខ៧៣ ភ្ជាប់ពីត្បូងឃ្មុំ មកក្រចេះ ផ្លូវលេខ៣៧៧ ភ្ជាប់ពីក្រចេះ ទៅស្រុកសំបូរ ផ្លូវលេខ២៧៧ ពីសណ្តាន់ទៅសង្គម និងផ្លូវជាតិលេខ៧ គីឡូម៉ែត្រលេខ៣០០ ដល់គីឡូម៉ែត្រលេខ៣១ រង្វង់មូលក្រចេះ។
សម្តេចតេជោ ហ៊ុន សែន បានបន្តថា សមិទ្ធផលស្ពានឆ្លងទន្លេមេគង្គក្នុងខេត្តក្រចេះ គឺជាសមិទ្ធផលកើតចេញពីការខិតខំរបស់ប្រជាពលរដ្ឋកម្ពុជា និងការរួមចំណែករបស់រដ្ឋាភិបាលចិន។ ហើយក្រោយពេលស្ពានត្រូវបានដាក់ឱ្យប្រើប្រាស់ ការលំបាករបស់ប្រជាពលរដ្ឋត្រូវកាត់បន្ថយ។ ក្នុងនោះការចំណាយលើការឆ្លងទន្លេក៏ត្រូវបានលុបបំបាត់ ហើយចំណេញទាំងពេលវេលាផងដែរ៕
