ដោយ: លាងហួរ
ក្រុងតូក្យូ: ចំនួនខុនដូថ្មី ដែលដាក់លក់នៅក្នុងតំបន់ទីក្រុងតូក្យូ សម្រាប់ឆ្នាំ២០២៣នេះ ត្រូវបានគេរំពឹងថា នឹងកើនឡើង៣,៩ភាគរយ ពីឆ្នាំមុន ដល់៣២.០០០យូនីត ។ នេះបើយោងតាមរបាយការណ៍ថ្មីៗនេះចេញផ្សាយដោយក្រុមហ៊ុនស្រាវជ្រាវអចលនទ្រព្យមួយ។
វិទ្យាស្ថានសេដ្ឋកិច្ចអចលនទ្រព្យបានរាយការណ៍ កាលពីដំណាច់ខែធ្នូ កន្លងទៅថា ការកើនឡើង ដែលត្រូវបានព្យាករណ៍ទុកជាលើកដំបូង ក្នុងរយៈពេល២ឆ្នាំនឹងនាំមុខ ដោយការលក់ខុនដូធំៗ នៅជិតស្ថានីយ៍រថភ្លើង ក្នុងសង្កាត់ចំនួន២៣របស់ទីក្រុងតូក្យូ។
វិទ្យាស្ថាននេះក៏បានបញ្ជាក់ផងដែរថា ការកើនឡើងនៃចំនួនខុនដូប្រណិតៗ អាចជំរុញឱ្យតម្លៃខុនដូជាមធ្យម នៅទីក្រុងតូក្យូ និងខេត្តជិតខាងចំនួន៣កើនឡើងផងដែរ។ តម្លៃខុនដូថ្មីនៅតំបន់ជាយក្រុងក៏ត្រូវបានគេរំពឹងថា នឹងនៅតែមានថ្លៃខ្ពស់ផងដែរ ដែលបណ្តាលមកពីការកើនឡើងថ្លៃសម្ភារៈសំណង់។
ទន្ទឹមនឹងនេះ អត្រាប្រាក់កម្ចីទិញផ្ទះ ត្រូវបានគេរំពឹងទុកថា នឹងកើនឡើង បន្ទាប់ពីធនាគារកណ្តាលជប៉ុន បានកែសម្រួលគោលនយោបាយរូបិយវត្ថុដ៏ធូររលុងរបស់ខ្លួនកាលពីខែធ្នូ ឆ្នាំ២០២២។
យោងតាមមន្ត្រីមួយរូបទទួលបន្ទុកលើរបាយការណ៍ បានអះអាងថា យើងមានការព្រួយបារម្ភថា ការផ្គត់ផ្គង់ខុនដូនឹងធ្លាក់ចុះ ដោយឆ្លើយតបទៅនឹង ការធ្លាក់ចុះនៃចំណង់របស់ប្រជាជន ក្នុងការទិញ។
ការផ្គត់ផ្គង់ខុនដូ នៅក្នុងសង្កាត់ទាំង២៣ ក្នុងក្រុងតូក្យូ នឹងកើនឡើង៩,៤ភាគរយដល់១៤.០០០យូនីត ហើយនៅតំបន់សេសសល់នៃទីក្រុងតូក្យូ ត្រូវបានគេរំពឹងថា នឹងកើនឡើង៨,៧ភាគរយ ដល់២.៥០០យូនីត។
ចំនួនខុនដូក្នុងខេត្ត Chiba ត្រូវបានគេរំពឹងថា នឹងកើនឡើង៨,១ភាគរយ ដល់៤.០០០យូនីត ខណៈចំនួនខុនដូ នៅខេត្ត Kanagawa ត្រូវបានព្យាករណ៍ថានឹងកើនឡើង៤,២ភាគរយ ដល់៧.៥០០យូនីត។ ចំណែក ចំនួនខុនដូនៅក្នុង ខេត្ត Saitama ត្រូវបានគេរំពឹងថា នឹងមានការធ្លាក់ចុះ១៦,៧ភាគរយ ដល់៤.០០០យូនីត បន្ទាប់ពីបានកើនឡើងយ៉ាងខ្លាំង ក្នុងឆ្នាំ២០២២៕
