ដោយ៖ សុផារី
ភ្នំពេញ៖ អគ្គនាយកដ្ឋានលំនៅឋាន នៃក្រសួងរៀបចំដែនដី នគររូបនីយកម្ម និងសំណង់ បានពិភាក្សា និងជំរុញការដោះស្រាយបញ្ហា ដែលពាក់ព័ន្ធ នៅក្នុងគម្រោងសាងសង់អាកាសយានដ្ឋានអន្តរជាតិភ្នំពេញថ្មី នៅក្នុងខេត្តកណ្តាល ដើម្បីធ្វើយ៉ាងណាឱ្យគម្រោងនេះប្រព្រឹត្តទៅដោយរលូន។
លោក បេងហុង សុជាតិខេមរ៉ូ អគ្គនាយកនៃអគ្គនាយកដ្ឋានលំនៅឋាន និងជាប្រធានក្រុមការងារគាំទ្រដល់ការងាររៀបចំទីតាំង គម្រោងសាងសង់អាកាសយានដ្ឋានអន្តរជាតិភ្នំពេញថ្មី នៅថ្ងៃទី០៩ ខែមករា ឆ្នាំ២០២៣ នេះបានអញ្ជើញតំណាងក្រុមហ៊ុន CAIC មកជួបពិភាក្សា និងរាយការណ៍អំពីបញ្ហាសំខាន់ៗចំនួន៣ ដែលនៅសេសសល់។
ក្នុងនោះរួមមានបញ្ហាការជំរុញការងារប្រមូលដីពីគ្រួសារប្រជាពលរដ្ឋដែលនៅសល់ ដើម្បីសាងសង់អាកាសយានដ្ឋាន និងវឌ្ឍនភាពពាក់ព័ន្ធគ្រួសារប្រជាពលរដ្ឋ ដែលរស់នៅតាមខ្នងទំនប់លេខ៦៣ និងលេខ៦៥ ដែលត្រូវដោះស្រាយ ដើម្បីសាងសង់ផ្លូវ៦០ម៉ែត្រ តភ្ជាប់ពីមហាវិថីសម្តេចតេជោ ហ៊ុន សែន ទៅកាន់អាកាសយានដ្ឋានអន្តរជាតិតេជោក្រុងតាខ្មៅ។
ក្រៅពីនេះ ក្រុមការងារបានជំរុញឱ្យមានការដោះស្រាយបញ្ហា ជាមួយគ្រួសារប្រជាពលរដ្ឋ ដែលរស់នៅតាមបណ្តោយខ្នងទំនប់លេខ៩៤ និងលេខ៦៣ ដើម្បីរៀបចំស្តារប្រឡាយរំដោះទឹករបស់អាកាសយានដ្ឋានផងដែរ។
អាកាសយាន្តដ្ឋានអន្តរជាតិតេជោ ត្រូវបានរាជរដ្ឋាភិបាលបានផ្តល់សិទ្ធិឱ្យ ក្រុមហ៊ុន CAIC ដែលជាក្រុមហ៊ុនបណ្តាក់ទុនរួមគ្នារវាងរាជរដ្ឋាភិបាលកម្ពុជា និងក្រុមហ៊ុន OCIC សាងសង់ និងអភិវឌ្ឍអាកាសយានដ្ឋានអន្តរជាតិភ្នំពេញថ្មី នៅខេត្តកណ្តាល និងខេត្តតាកែវ លើផ្ទៃដីទំហំ២.៦០០ហិចតា ស្ថិតនៅចម្ងាយ២០គីឡូម៉ែត្រពីភាគខាងត្បូងភ្នំពេញ៕
