ដោយៈ វឌ្ឍនៈ
ភ្នំពេញៈ រហូតមកដល់ពេលនេះ សំណង់អគារដែលជាប់គាំងនៅក្នុងខេត្តព្រះសីហនុជាង១២០០អគារត្រូវបានរំពឹងថា នឹងអាចដោះស្រាយបានខ្លះ ក្រោយពីចិនបើកប្រទេស និងមានការហូរចូលឡើងវិញនៃទេសចរនិងវិនិយោគិនចិន។
លោកឡុង ឌីម៉ង់ អភិបាលរងខេត្តព្រះសីហនុ បានថ្លែងប្រាប់អ្នកសារព័ត៌មានឱ្យដឹងថា លោកមិនរំពឹងពីការដោះស្រាយ បានទាំងស្រុងនោះទេនូវអគារ ដែលជាប់គាំងនៅក្នុងខេត្តព្រះសីហនុ តែលោករំពឹងថាវានឹងអាចដោះស្រាយបាន ជាបន្តបន្ទាប់ក្នុងចំនួនតិចតួច តែត្រូវការការលើកទឹកចិត្តពីសំណាក់ក្រសួងស្ថាប័នពាក់ព័ន្ធ ។
លោកបន្តថា នៅសប្ដាហ៍ក្រោយនេះ ក្រុមការងារនឹងបើកកិច្ចប្រជុំដើម្បីរកដំណោះស្រាយពីបញ្ហា នៃអគារដែលជាប់គាំង នៅខេត្តព្រះសីហនុ ហើយលោកជឿជាក់ថា វាមិនអាចដោះស្រាយបានចេញភ្លាមៗ១០០ភាគរយឬក៏ទាំងអស់ទេ គឺត្រូវការពេលវេលា និងទាមទារឱ្យដោះស្រាយម្ដងមួយដំណាក់ៗ ។
លោកឡុង ឌីម៉ង់បានបញ្ជាក់ថា “បើទោះបីជាចិនបើកប្រទេស ហើយទេសចរចិន ចូលមកកម្ពុជានិងមកកាន់ខេត្តព្រះសីហនុក្ដី តែភ្ញៀវទេសចរចិន មិនអាចជួយឱ្យអគារជាប់គាំងនោះ អាចដំណើរការបានភ្លាមៗដែរពីព្រោះថាសំណង់អគារទាំងនោះ នៅមានបញ្ហាស្មុគ្រស្មាញច្រើន”។
ជាមួយគ្នានេះ អ្នកនាងលីម សុខាដាវីន នាយិកាក្រុមហ៊ុន Elite Home បានឱ្យដឹងថា ការមកដល់នៃជនជាតិចិនមកកាន់កម្ពុជា មានទាំងចិនវិនិយោគ និងចិនទេសចរ យើងក៏មិនអាចនិយាយថាជនជាតិចិនសុទ្ធតែអាក្រក់ ឬល្អទាំងអស់នោះដែឬ។ ក្នុងចំណោមចិនដែលមកកម្ពុជា នៅពេលខាងមុខក៏មានចិនល្អ និងចិនមិនសូវល្អ ប៉ុន្តែយ៉ាងណាយើងក៏រំពឹងថា ចិនដែលនឹងមកកម្ពុជា អាចនឹងធ្វើឱ្យការវិនិយោគលើសំណង់អគារនានា ឬគម្រោងវិនិយោគថ្មីៗ នឹងមានសកម្មភាពឡើងវិញ ។
ជាការកត់សម្គាល់ អាជីវកម្មនៅក្នុងខេត្តព្រះសីហនុ ជាពិសេសអាជីវកម្មបម្រើក្នុងវិស័យទេសចរណ៍ ចាប់ផ្ដើមមានសកម្មភាពកម្រើក និងធ្វើឱ្យម្ចាស់អាជីវកម្ម ទទួលបានប្រាក់ចំណូលឡើងវិញ ជាបន្តបន្ទាប់ក្រោយពីផ្លូវល្បឿនលឿនភ្នំពេញ បានបើកដំណើរការជាផ្លូវការ ប៉ុន្តែសម្រាប់គម្រោងវិនិយោគថ្មីៗ និងការបន្តដំណើរការសាងសង់គម្រោង ដែលជាប់គាំងនៅតែអសកម្មដដែល ដោយមិនទាន់មានការបន្តដំណើរការសាងសង់នោះទេ៕
