ដោយ: គង់ លាងហួរ
អន្តរជាតិ: លោក Sopon Racharaksa នាយកប្រតិបត្តិនៃក្រុមហ៊ុន FPIT បានមានប្រសាសន៍ថា ឆ្នាំ២០២៣នេះ និងឆ្នាំក្រោយ នឹងក្លាយជាឆ្នាំ “គួរឱ្យរំភើប” សម្រាប់វិស័យអចលនទ្រព្យឧស្សាហកម្ម ខណៈប្រទេសផ្សេងទៀត ក្រៅពីប្រទេសចិន នឹងទទួលបានអត្ថប្រយោជន៍យ៉ាងច្រើន ពីគោលនយោបាយ China Plus One។
លោកបន្តថា ក្រុមវិនិយោគិនចិន និងបរទេស ដែលមានរោងចក្រនៅក្នុងប្រទេសចិន កំពុងស្វែងរកទីតាំងបន្ថែមនៅខាងក្រៅប្រទេសនេះ ដើម្បីបង្កើតរោងចក្រថ្មី មិនមែនសម្រាប់ការផ្លាស់ប្តូរទីតាំងទេ ប៉ុន្តែជាការពង្រីកជាមុនសិន មុននឹងកាត់បន្ថយទីតាំង ដែលមានស្រាប់នៅក្នុងប្រទេសចិន។
លោក Sopon បានអះអាងថា ប្រទេសវៀតណាមមានមូលដ្ឋានផលិតកម្មដ៏ធំសម្រាប់អាជីវកម្ម IT និងកំពុងបង្កើតខ្សែសង្វាក់ផ្គត់ផ្គង់ ដែលទាក់ទងនឹង IT ដែលជាលទ្ធផលនៃការវិនិយោគពីក្រុមហ៊ុនផលិតទូរស័ព្ទ Samsung និងក្រុមហ៊ុនផលិតបច្ចេកវិទ្យា Foxconn ។
ចំណែកប្រទេសថៃអាចទទួលបានអត្ថប្រយោជន៍ពីរលកទីមួយ ជាមួយនឹងកម្លាំងពលកម្មជំនាញ និងឧស្សាហកម្ម S-curve ថ្មី ដែលអាចគាំទ្រផលិតផលឆ្លាតវៃ ដូចជាឧបករណ៍អគ្គិសនីឆ្លាតវៃ។
វិនិយោគិនដែលមានបំណងផ្លាស់ប្តូរទីតាំងដោយផ្អែកលើការផលិតកំពុងស្វែងរកការផ្សព្វផ្សាយ និងកញ្ចប់ដ៏គួរឱ្យទាក់ទាញពីរដ្ឋាភិបាល ពីព្រោះការផ្លាស់ប្តូរទីតាំងអាចមានតម្លៃថ្លៃ។
លោកបានបន្តថា“គោលដៅដ៏មានសក្តានុពលគួរតែមាន ស្ថិរភាពនយោបាយ និងសេដ្ឋកិច្ចដើម្បីទាក់ទាញវិនិយោគិន”។
លោកបានបញ្ជាក់ថា បណ្តាប្រទេសមួយចំនួនដូចជា ថៃ វៀតណាម ម៉ាឡេស៊ី និងឥណ្ឌូណេស៊ី មានអព្យាក្រឹតគ្រប់គ្រាន់ ហើយមិនចូលភាគី ក្នុងជម្លោះរវាងចិន និងប្រទេសលោកខាងលិចឡើយ។
ដើម្បីទាញយកប្រយោជន៍ពីតម្រូវការដ៏មានសក្តានុពលនេះ ក្រុមហ៊ុន FPIT គ្រោងនឹងចំណាយប្រាក់ចំនួន៣ពាន់លានបាត(៨៩,៧លានដុល្លារ) ដើម្បីអភិវឌ្ឍផ្ទៃដីសរុប១៥មុឺនម៉ែត្រការ៉េ នៅក្នុងទីតាំងចំនួន៣ រួមទាំងស្រុក Bang Phli នៃខេត្ត Samut Prakan ។
នៅក្នុងស្រុក Wang Noi នៃខេត្តអយុធ្យា ក្រុមហ៊ុនមានផ្ទៃដីទំហំ៥០០ ទៅ៦០០រ៉ៃ សម្រាប់អភិវឌ្ឍមជ្ឈមណ្ឌលចែកចាយ និងដឹកជញ្ជូន ហើយផ្ទៃដីទំហំ៣០០ទៅ៤០០រ៉ៃ ត្រូវបានបែងចែកសម្រាប់សាងសង់រោងចក្រ។
ចំណែកនៅក្នុងបណ្តាខេត្តនៃច្រករបៀងសេដ្ឋកិច្ចភាគខាងកើត(EEC) ក្រុមហ៊ុន FPIT មានផ្ទៃដីសរុបចន្លោះពី៥០០ទៅ៦០០រ៉ៃ។ លោកបានមានប្រសាសន៍ថា ក្រុមហ៊ុន និងដៃគូ កំពុងសាងសង់ហេដ្ឋារចនាសម្ព័ន្ធ ផ្លូវថ្នល់ និងឧបករណ៍ប្រើប្រាស់ក្នុងដំណាក់កាលទី១ លើផ្ទៃដីទំហំ១.៥០០រ៉ៃ នៃគម្រោងបណ្តាក់ទុនរួមគ្នាថ្មី។
លោក Sopon បានបន្ថែមថា នៅក្នុងប្រទេសវៀតណាម និងឥណ្ឌូនេស៊ី ក្រុមហ៊ុន FPIT គ្រោងនឹងចំណាយប្រាក់ចំនួន២ពាន់លានបាត(៥៩,៨លានដុល្លារ) ដើម្បីអភិវឌ្ឍរោងចក្រ និងឃ្លាំងស្តុកទំនិញលើផ្ទៃដីទំហំសរុប១០ម៉ឺនម៉ែត្រការ៉េ នៅឆ្នាំ២០២៣នេះ។
លោកបានមានប្រសាសន៍ថា ក្រុមហ៊ុន FPIT មានផ្ទៃដីទំហំ៣០០រ៉ៃ ក្នុងប្រទេសវៀតណាម សម្រាប់ការអភិវឌ្ឍនាពេលអនាគត ហើយក្រុមហ៊ុននឹងពិភាក្សាជាមួយដៃគូក្នុងស្រុក អំពីការទិញដីបន្ថែមទៀត ដោយសារមានតម្រូវការសាងសង់កន្លែងឧស្សាហកម្មយ៉ាងខ្លាំង៕
