ដោយ: គង់ លាងហួរ
បាងកក: បណ្តាក្រុមហ៊ុនអភិវឌ្ឍន៍ខុនដូធំៗ មានសេចក្តីសោមនស្សរីករាយ ដែលទីបំផុតភ្ញៀវទេសចរចិនត្រលប់មកប្រទេសថៃវិញ បន្ទាប់ពីខកខានអស់រយៈពេលជិត៣ឆ្នាំ។
លោកស្រី Apa Ataboonwong ប្រធានក្រុមហ៊ុន Richy Place 2002 បានមានប្រសាសន៍ថា ការត្រឡប់មកវិញនៃភ្ញៀវទេសចរចិន ពិតជាមានផលល្អ សម្រាប់អ្នកអភិវឌ្ឍន៍អចលនទ្រព្យ។
លោកស្រីក៏ជឿជាក់ថា “ការវិលត្រឡប់មកវិញ របស់អ្នកធ្វើដំណើរចិន ក៏នឹងធ្វើឲ្យទីផ្សារអចលនទ្រព្យ វិលមករកដំណើរការល្អឡើងវិញ និងផ្តល់ប្រយោជន៍ដល់សេដ្ឋកិច្ចរបស់ប្រទេសថៃ”។
ក្រុមហ៊ុន Richy Place មានគម្រោងចំនួន៥ ដែលមាន៥០យូនីត នៅកណ្តាលទីក្រុងបាងកក ដោយសង្ឃឹមថា គម្រោងទាំងនោះនឹងទទួលបានការចាប់អារម្មណ៍ពីអតិថិជនចិន។
លោកស្រី Apa Ataboonwong បានបន្តថា ក្រុមហ៊ុនក៏មានគម្រោ ងខុនដូកម្ពស់៣២ជាន់ ដែលមានចំនួន៨០០យូនីត នៅខាងទីក្រុង Thonburi ក្បែរស្ថានីយ៍ Wutthakat BTS ដែលអតិថិជនជនជាតិចិនក៏អាចយល់ថាមានភាពទាក់ទាញផងដែរ។
លោកស្រីបានអះអាងថា ក្រុមហ៊ុនរំពឹងថានឹងអាចលក់ខុនដូ បានយ៉ាងហោចណាស់ពី៣០០ ទៅ៤០០យូនីតដល់វិនិយោគិនចិន។
ទន្ទឹមនឹងនេះ លោក Piya Prayong នាយកប្រតិបត្តិក្រុមហ៊ុន Pruksa Real Estate បានមានប្រសាសន៍ថា ក្រុមហ៊ុនរបស់លោកបានបញ្ចប់គម្រោងខុនដូចំនួន១០ ដែលមានចំនួន៣.០០០យូនីត ស្របពេលមានការត្រលប់មកវិញរបស់ភ្ញៀវទេសចរចិន។
លោកបន្តថា “គម្រោងទាំងនេះ នឹងទាក់ទាញអតិថិជនជនជាតិចិន ព្រោះវាស្ថិតនៅកណ្តាលរាជធានី និងជិតមធ្យោបាយដឹកជញ្ជូនសាធារណៈ ឬតាមដងទន្លេចៅប្រាយ៉ា”។
ប្រធានសមាគមអចលនទ្រព្យនៅប្រទេសថៃ លោក Meesak Chunharakchot ជឿជាក់ថា“ការដកការរឹតបន្តឹងនៅក្នុងប្រទេសចិន នឹងជួយធ្វើឱ្យទីផ្សារអចលនទ្រព្យ របស់ប្រទេសថៃមានភាពរស់រវើកឡើងវិញនាពេលឆាប់ៗនេះ”។
ចំណែកលោក Wichai Wiratkaphan នាយកស្តីទីនៃមជ្ឈមណ្ឌលព័ត៌មាន អចលនទ្រព្យរបស់ធនាគារលំនៅដ្ឋានរដ្ឋ បានមានប្រសាសន៍ថា ជំងឺរាតត្បាត ហាក់ដូចជាមិនមានផលប៉ះពាល់ច្រើន ដល់ចំណាប់អារម្មណ៍របស់វិនិយោគិនចិននៅក្នុងប្រទេសថៃនោះទេ៕
