ឧកញ៉ាធំៗនៅ​កម្ពុជា៖ វិស័យ​អចលនទ្រព្យ​នឹង​បន្ត​រីកចម្រើន​រយៈពេល ១០ទៅ២០ឆ្នាំ​ទៀត

0

ដោយ៖ គង់ សូរិយា

ភ្នំពេញ៖ ជាមួយនឹង​កំនើន​ឥតឈប់ឈរ​នៃ​តម្លៃ​ដីធ្លី និង​ការវិនិយោគ​អចលនទ្រព្យ​ពី​សំណាក់​អ្នកវិនិយោគធំៗពី​បរទេស ឧកញ៉ាធំៗដែល​កំពុងមាន​ឈ្មោះ​បោះ​សម្លេង​ក្នុង​វិស័យនេះ នៅតែមាន​សុទិដ្ឋិនិយម​ថា វិស័យ​អចលនទ្រព្យ​នៅ​កម្ពុជា​នឹង​បន្ត​រីកចម្រើន​រយៈពេល១០ទៅ២០ឆ្នាំ​ទៀត។

លោក​ឧកញ៉ា លី ហួរ អគ្គនាយក​ក្រុមហ៊ុន​លី ហួរ​គ្រុប​និង​បាននិងកំពុង​វិនិយោគ​បុរី​វិមាន​ភ្នំពេញ យ៉ាង​ជោគជ័យ​បាន​ថ្លែង​អោយដឹង​កាលពីពេលថ្មីៗនេះ​ថា វិស័យ​អចលនទ្រព្យ​នៅ​កម្ពុជា នឹង​បន្ត​រីកចម្រើន​រយៈពេល​វែង​បន្តទៀត ដោយសារ​កំនើន​ប្រជាសាស្ត្រ ការកើនឡើង​ផ្នែក​នគរូបនីយកម្ម និង​កំនើនសេដ្ឋកិច្ច ពិសេស​ការកើនឡើង​នូវ​ចំនួន​អ្នកវិនិយោគ​មកពី​បរទេស។

លោក​បន្តថា “ខ្ញុំ​គិតថា​បើ​ស្ថានភាព​សេដ្ឋកិច្ច​របស់​យើង នៅតែ​រក្សាបាន​កំនើន​ល្អប្រសើរ​ក្នុង​រង្វង់៧ភាគរយ និង​ការរក្សាបាន​នូវ​សុខសន្តិភាព និង​ស្ថិរភាព​នយោបាយ​ដូច​សព្វថ្ងៃនេះ។

យោងតាម​ទិន្នន័យ​របស់​ក្រសួង​រៀបចំ​ដែនដី នគរូបនីយកម្ម​និង​សំណង់​បាន​បង្ហាញថា ទុនវិនិយោគ​ក្នុង​វិស័យ​សំណង់ និង​អចលនទ្រព្យ​ក្នុង​រយៈពេល៩ខែ​ឆ្នាំនេះ​មាន​ទឹកប្រាក់៥៦៣៦លាន​ដុល្លារ​អាមេរិក កើនឡើង២២ភាគរយ​ធៀប​រយៈពេល​ដូចគ្នា​កាលពី​ឆ្នាំមុន។

ជាមួយគ្នានេះដែរ លោក​ឧកញ៉ា សៀ រិ​ទ្ឋី អគ្គនាយក​ក្រុមហ៊ុន World Bridge Group បាន​សម្តែង​សុទិដ្ឋិនិយម​ផងដែរ​ថា ទីផ្សារ​អចលនទ្រព្យ​នៅតែមាន​សញ្ញា​វិជ្ជមាន​នៅ​កម្ពុជា ដោយ​លោក​មើលឃើញថា ការរីកចម្រើន​វិស័យនេះ​នឹង​បន្ត​រក្សា​កំនើន​ក្នុង​រយៈពេល​វែង​បន្តទៀត ដោយសារ​សេដ្ឋកិច្ច​របស់​កម្ពុជា​នៅតែមាន​កំនើន​រ៉ឹង​មាំ កំនើន​ប្រាក់ចំណូល​របស់​ប្រជាពលរដ្ឋ ពិសេស​ប្រជាជន​កម្ពុជា​ដែលមាន​វ័យ​ក្រោម៣០ឆ្នាំមាន​ប្រមាណ៦០ទៅ៧០ភាគរយ។

លោក​បន្តថា “ទោះជា​យ៉ាងណា​អ្នកវិនិយោគ គួរផ្តោត​លើ​ទីតាំង​ជាសំខាន់ និង​ត្រូវមាន​មូលដ្ឋាន​ថវិកា​រ៉ឹង​មាំ ដើម្បី​គំរោង​របស់ខ្លួន​ទទួលបាន​ជោគជ័យ ទន្ទឹមនឹង​ការយកចិត្តទុកដាក់​លើ​គុណភាព និង​សោភ័ណភាព​សំណង់​ផងដែរ។

អគ្គនាយក​ក្រុមហ៊ុន​អ៊ែត​វូត និង​ជា​ប្រធាន​តំបន់​សេដ្ឋកិច្ច​ភ្នំពេញ និង​ក្រុមហ៊ុន​ជាច្រើន​ទៀត គឺ​លោកជំទាវ​ លឹម ឈីវហូរ​ បាន​ថ្លែងថា កំណើន​នៃ​ការវិនិយោគ​ដោយផ្ទាល់​ពី​បរទេស កំនើនសេដ្ឋកិច្ច និង​កំនើន​នៃ​ការវិនិយោគ​ក្នុង​វិស័យនេះ ពី​អ្នកវិនិយោគ​ក្នុងស្រុក និង​អន្តរជាតិ កំពុង​ធ្វើ​ឲ្យ​វិស័យ​អចលនទ្រព្យ​កាន់តែ​រីកចម្រើន ហើយនឹង​បន្ត​រីកចម្រើន​រយៈពេល​វែង​បន្តទៀត។

លោកជំទាវ​បាន​បន្តថា “ខ្ញុំ​គិតថា​វិស័យ​សំណង់ និង​អចលនវត្ថុ​នឹង​បន្ត​រីកចម្រើន​រយៈពេល១០ឆ្នាំ​ខាងមុខ​ទៀត ដោយសារ​លំ​ហួរ​ចូល​នៃ​អ្នកវិនិយោគ​ចិន ពិសេស​ក្រុមហ៊ុន​ចិនធំៗជាច្រើន​បាននិងកំពុង​ចូលមក​កាន់​កម្ពុជា”៕

LEAVE A REPLY

Please enter your comment!
Please enter your name here