ដោយ: គង់ លាងហួរ
ក្រុងមូស្គូ: ទីភ្នាក់ងារថាមពលអន្តរជាតិ (IEA) បានឱ្យដឹងកាលពីថ្ងៃអង្គារម្សិលមិញនេះថា ប្រាក់ចំណូលរបស់ប្រទេសរុស្ស៊ី ដែលបានមកពីការនាំចេញប្រេង និងឧស្ម័នបានដាំក្បាលចុះជិត៤០ភាគរយ នៅក្នុងខែមករា ដោយសារការកំណត់តម្លៃ និងការដាក់ទណ្ឌកម្មរបស់លោកខាងលិច។
ប្រាក់ចំណូលពីការនាំចេញប្រេង និងឧស្ម័នរបស់រុស្ស៊ីមានចំនួន១៨,៥ពាន់លានដុល្លារក្នុងខែមករា ធ្លាក់ចុះ៣៨ភាគរយ បើធៀបនឹងប្រាក់ចំណូល៣០ពាន់លានដុល្លារ ដែលទីក្រុងម៉ូស្គូទទួលបានក្នុងខែមករា ឆ្នាំ២០២២ មួយខែមុនពេលរុស្ស៊ី បើកការលុកលុយរបស់ខ្លួន មកលើអ៊ុយក្រែន។
នាយកប្រតិបត្តិរបស់ IEA លោក Fatih Birol បានមានប្រសាសន៍ថា “វិធានការរបស់លោកខាងលិច ដែលតម្រង់គោលដៅលើការនាំចេញថាមពលរបស់រុស្ស៊ី បានសម្រេចគោលបំណងរបស់ពួកគេ ក្នុងការធ្វើឱ្យទីផ្សារប្រេងមានស្ថិរភាព និងកាត់បន្ថយប្រាក់ចំណូល របស់ទីក្រុងម៉ូស្គូពីការនាំចេញប្រេង និងឧស្ម័ន”។
លោកបានបន្តថា “ការរំពឹងទុករបស់យើងនោះគឺថា ការធ្លាក់ចុះប្រាក់ចំណូលពីប្រេងនិងឧស្ម័ននេះ នឹងមានកម្រិតកាន់តែខ្លាំង ក្នុងប៉ុន្មានខែខាងមុខនេះ ហើយកាន់តែចោតខ្លាំងទៀត ដោយសារកង្វះលទ្ធភាពទទួលបានបច្ចេកវិទ្យា និងការវិនិយោគ”។
ការកំណត់តម្លៃប្រេង៦០ដុល្លារ ក្នុងមួយបារ៉ែល ពីសំណាក់ក្រុមប្រទេស G7 បានធ្វើឱ្យប្រេងឆៅ Urals របស់រុស្ស៊ីត្រូវបានលក់បន្ថោកតម្លៃយ៉ាងខ្លាំង ទៅនឹងប្រេងឆៅ Brent ដែលត្រូវបានជួញដូរកាលពីថ្ងៃអង្គារក្នុងតម្លៃប្រហែល៨៤ដុល្លារក្នុងមួយបារ៉ែល។
សហភាពអឺរ៉ុប ដែលមានសមាជិក២៧ប្រទេស ក៏បានហាមឃាត់ការនាំចូលប្រេងតាមផ្លូវសមុទ្រ របស់រុស្ស៊ីចាប់តាំងពីខែធ្នូ និងបានដាក់ទណ្ឌកម្មលើការនាំចេញ ទៅកាន់ប្រទេសរុស្ស៊ីនូវបច្ចេកវិទ្យា ដែលត្រូវការសម្រាប់ការចម្រាញ់ប្រេង។ ដូចគ្នាដែរ សហរដ្ឋអាមេរិក និងអង់គ្លេស ក៏បានដាក់កំហិតលើការនាំចូលប្រេងពីរុស្ស៊ីផងដែរ។
កាលពីឆ្នាំ២០២២ ទីក្រុងមូស្គូបានពឹងផ្អែកលើ ប្រាក់ចំណូលពីប្រេង និងឧស្ម័នប្រហែល១១,៦ពាន់ពាន់លានរូប្លែ (១៥៥ពាន់លានដុល្លារ) ដើម្បីផ្តល់មូលនិធិដល់ការចំណាយថវិការបស់ខ្លួន និងត្រូវបង្ខំចិត្តលក់ទុនបម្រុងអន្តរជាតិ ដើម្បីគ្របដណ្តប់លើឱនភាព ដែលកើនឡើងដោយសារការចំណាយលើសង្គ្រាមនៅអ៊ុយក្រែនផងដែរ៕