ដោយៈ ស៊ីវ ម៉េង
ភ្នំពេញៈ អ្នកជំនាញផ្នែកដីធ្លី ឧកញ៉ាកាង សុធី អគ្គនាយកក្រុមហ៊ុន Century21 Land Station បានបង្ហើបពីគន្លឹះសំខាន់ជាច្រើន ដើម្បីទិញដីមិនឲ្យជាប់គាំង ទទួលបានផលចំណេញ និងសប្បាយចិត្ត។
លោកឧកញ៉ាបានមានប្រសាសន៍ឲ្យដឹង កាលពីពេលថ្មីៗនេះថា ធម្មតាអ្នកវិនិយោគភាគច្រើន តែងតែចង់បានចំណេញច្រើនពេក លោភលន់ បានផលចំណេញហើយសប្បាយចិត្ត និងមិនធ្វើឲ្យដីរបស់ខ្លួនជាប់គាំង។
ទី១ កុំលោភលន់ខ្លាំង
ការមិនលោភលន់ខ្លាំង ជារឿងល្អសម្រាប់អ្នកវិនិយោគដីធ្លី ព្រោះបើចំណេញចាប់ពី៥០ភាគរយទៅ ១០០ភាគរយ គួរលក់ចេញដើម្បីយើងអាចប្រមូលទុន យកមកទិញនៅតំបន់ដទៃទៀត ឲ្យបានមួយឬពីរកន្លែងកាន់តែល្អ ហើយទុកលុយចំណេញខ្លះដើរលេងនៅក្នុងស្រុក ឬឬដើរលំហែរនៅក្រៅប្រទេស ដើម្បីសប្បាយចិត្ត និងមានកំលាំងចិត្តវិនិយោគបន្តទៀត។
ការទិញដីបន្តបន្ទាប់ នឹងធ្វើឲ្យយើងសល់ដីលើសពី១កន្លែង បន្ទាប់មកយើងលក់ចេញបើមានពីរ ឬបីកន្លែង លក់ចេញមួយកន្លែង ដើម្បីបង្វិលប្រាក់យើង ទៅវិនិយោគនៅទីតាំងមានសក្តានុពល ដែលហុចផលចំណេញច្រើនទៀត។
ការទិញដីត្រូវពិនិត្យទីតាំងត្រឹមត្រូវ
លោកឧកញ៉ាកាង សុធី បានបន្តទៀតថា ការទិញដី ដើម្បីទទួលបានផលចំណេញ មិនមែនចេះតែទិញតាមការនឹកឃើញ ឬចង់បានតាមអារម្មណ៍របស់ខ្លួននោះទេ ហេតុនេះអ្នកវិនិយោគគួរជៀសវាងទិញដីនៅជិតម៉ុងខ្មោច ជិតវត្តអារ៉ាម ផ្លូវទ័ល ដីមានរាងរៅមិនសមស្រប និងដីដែលមានទីតាំងនៅក្បែរតំបន់អភិរ័ក្ស ក៏ដូចជា ដីដែលគ្មានប្លង់និងប័ណ្ណកម្មសិទ្ខច្បាស់លាស់។
ក្លាយជាអ្នកវិនិយោគឆ្លាតវៃ
ប្រសិនបើលោក អ្នកមានលុយច្រើនក្នុងដៃ មិនមានបញ្ហាលំហូរសាច់ប្រាក់ អ្នកគួរវិនិយោគដីតាមបែបធនាគារដី (Land Banking) ព្រោះការវិនិយោគបែបនេះ អាចទទួលបានផលចំណេញខ្ពស់ ប្រសិនជាអ្នកគិតថា ដីនៅទីតាំងដែលអ្នកវិនិយោគ ជាដីដែលមានសក្តានុពលចំណេញខ្ពស់ ជាដីដែលស្ថិតនៅក្បែរទីក្រុង ដែលរដ្ឋាភិបាលនឹងកាត់តំបន់នោះ ចូលក្នុងរដ្ឋបាលរាជធានីភ្នំពេញ ឬរដ្ឋបាលក្រុងនៃខេត្តណាមួយ៕
