ដោយ: គង់ លាងហួរ
អន្តរជាតិ: ទស្សនវិស័យទីផ្សារលំនៅដ្ឋានក្នុងប្រទេសថៃ នៅតែមានភាពមិនច្បាស់លាស់ សម្រាប់ដើមត្រីមាសទី១ ឆ្នាំ២០២៤នេះ ដោយសារអ្នកអភិវឌ្ឍន៍ និងអ្នកទិញផ្ទះខ្វះទំនុកចិត្ត ស្របពេលដែលអត្រាការប្រាក់កើនឡើង។
លោក Vichai Viratkapan អគ្គនាយកស្តីទីនៃមជ្ឈមណ្ឌលព័ត៌មានអចលនទ្រព្យ (REIC) បានអះអាងថា “ការផ្គត់ផ្គង់ និងតម្រូវការបានរងផលប៉ះពាល់ខ្លាំង ដោយសារអត្រាការប្រាក់ ដែលត្រូវបានដំឡើងជាច្រើនដងកាលពីឆ្នាំមុន ដល់អត្រាគោលនយោបាយ២,៥ភាគរយ”។
លោកបានបញ្ជាក់ថា “អ្នកអភិវឌ្ឍន៍ប្រឈមមុខ នឹងការចំណាយហិរញ្ញវត្ថុកាន់តែខ្ពស់ ខណៈពេលដែលអំណាចទិញ របស់អ្នកទិញផ្ទះបានធ្លាក់ចុះ។ ដូច្នេះវាជះប៉ះពាល់ដល់ប្រាក់ចំណូល របស់អ្នកអភិវឌ្ឍន៍”។
សន្ទស្សន៍ទំនុកចិត្តរបស់អ្នកទិញផ្ទះ នៅក្នុងត្រីមាសទី៤ ឆ្នាំ២០២៣ បានស្ថិតក្នុងរង្វង់៤៤,៥ពិន្ទុ ដែលកើនឡើងពី៤១,២ពិន្ទុ ក្នុងរយៈពេល៩ខែដំបូង ប៉ុន្តែនៅតែទាបជាងកម្រិតមធ្យមភាគ ចំនួន៥០ពិន្ទុដដែល ដែលបង្ហាញថាទំនុកចិត្តអ្នកទិញ នៅតែមានកម្រិតទាប។
លោក Vichai បានលើកឡើងថា “ការថយចុះនៃទំនុកចិត្តអ្នកទិញផ្ទះ ទំនងជាបណ្តាលមកពីកត្តាសេដ្ឋកិច្ចធ្លាក់ចុះ ដែលរងផលប៉ះពាល់ ដោយសារកត្តាអវិជ្ជមានជាច្រើន ជាពិសេសការដំឡើងអត្រាការប្រាក់របស់ធនាគារកណ្តាលថៃ(BOT)”។
លើសពីនេះ ធនាគារកណ្តាលថៃ មិនមានបំណងបន្ធូរបន្ថយការទប់ស្កាត់ការផ្តល់ប្រាក់កម្ចីនោះទេ ដោយសារកម្រិតបំណុលក្នុងគ្រួសារបានកើនឡើងយ៉ាងគំហុក។ មជ្ឈមណ្ឌល REIC បញ្ជាក់ថា “កត្តាទាំងនេះ បានធ្វើឱ្យអំណាចនៃការទិញផ្ទះ និងទំនុកចិត្តរបស់អ្នកទិញមានការធ្លាក់ចុះ ខណៈអ្នកទិញមានការព្រួយបារម្ភ អំពីការបដិសេធរបស់ធនាគារ ដែលមិនឱ្យពួកគេខ្ចីប្រាក់បន្ត”។
ទន្ទឹមគ្នានេះ មជ្ឈមណ្ឌល REIC ក៏បានរាយការណ៍ផងដែរថា សន្ទស្សន៍ទំនុកចិត្តអ្នកអភិវឌ្ឍន៍ លំនៅដ្ឋាននៅតំបន់ទីក្រុងបាងកក ក្នុងត្រីមាសទី៤ ឆ្នាំ២០២៣ បានស្ថិតក្នុងរង្វង់៤៧,៦ពិន្ទុ ដែលធ្លាក់ចុះពី៤៩,៧ពិន្ទុ ក្នុងត្រីមាសទី៣ និង៥១,៥ពិន្ទុ ក្នុងត្រីមាសទី៤ ឆ្នាំ២០២២៕
