ដោយៈ គង់ ម៉ាលីនណា
ភ្នំពេញៈ ដោយផ្តោតលើការសម្របសម្រួលពាណិជ្ជកម្ម និងការលើកកម្ពស់ភាពងាយស្រួល ក្នុងការទទួលបានអាជ្ញាប័ណ្ណ និងវិញ្ញាបនបត្រ ក្រសួងពាណិជ្ជកម្ម កំពុងភ្ជាប់ប្រព័ន្ធទូទាត់ជាមួយធនាគារសាធារណៈកម្ពុជា និងធនាគារព្រីនស៍ និងធនាគារជាច្រើនទៀត។
ជាមួយគ្នានេះ ក្រសួងបាននឹងកំពុងធ្វើការចរចាបន្ថែមទៀតជាមួយធនាគារអេស៊ីលីដា ធនាគារពាណិជ្ជកម្មក្រៅប្រទេសនៃកម្ពុជា និងធនាគារហ្វីលីព។
លោកប៉ែន សុវិជាតិ អ្នកនាំពាក្យ និងជារដ្ឋលេខាធិការក្រសួងពាណិជ្ជកម្ម បានមានប្រសាសន៍ឲ្យដឹងកាលពីសប្តាហ៍មុនថា“នាយកដ្ឋាននាំចេញ-នាំចូល របស់ក្រសួងពាណិជ្ជកម្មបានចូលរួមក្នុងការអនុវត្តប្រព័ន្ធបញ្ជរតែមួយជាតិ (Cambodia National Single Window-CNSW) តាមរយៈសេចក្តីប្រកាសស្តីពី ការដាក់ពាក្យស្នើសុំសាកល្បងនូវអាជ្ញាប័ណ្ណនាំចេញ-នាំចូល ព្រមទាំងវិញ្ញាបនបត្រត្បូងពេជ្រមិនទាន់កែច្នៃ ចាប់តាំងពីថ្ងៃទី១ ខែកក្កដា ឆ្នាំ២០១៩។
លោកបន្តថា ដើម្បីជួយសម្រួលដល់ការទូទាត់ តាមអេឡិចត្រូនិកសម្រាប់ប្រព័ន្ធបញ្ជរតែមួយជាតិ នាយកដ្ឋាននាំចេញ-នាំចូល បានចុះហត្ថលេខាលើអនុស្សរណៈ នៃការយោគយល់គ្នា ជាច្រើនជាមួយធនាគារដៃគូ និងទទួលយកការទូទាត់ជាផ្លូវការ តាមរយៈធនាគារវីង ធនាគារកាណាដា និងធនាគារវឌ្ឍនៈ។
លោក ប៉ែន សុវិជាតិ បានបន្តទៀតថា ដើម្បីទទួលបានអាជ្ញាប័ណ្ណ និងវិញ្ញាបនបត្រនេះ វិស័យឯកជន ត្រូវបង់ថ្លៃសេវាជូនរដ្ឋាភិបាល ដែលជាទូទៅទទួលយកសាច់ប្រាក់នាពេលកន្លងមក ប៉ុន្តែដើម្បីកាត់បន្ថយការចំណាយពេលវេលា ការធ្វើដំណើរ និងថ្លៃឯកសារ ក្រសួង ក៏បានព្យាយាមពង្រីកកិច្ចសហប្រតិបត្តិការបន្ថែមទៀត។
លោកបន្តថា “ថ្មីៗនេះ ក្រសួងពាណិជ្ជកម្ម បាននិងកំពុងភ្ជាប់ជាមួយធនាគារសាធារណៈកម្ពុជា និងធនាគារព្រីនស៍ ហើយនឹងទទួលយកការទូទាត់ តាមរយៈធនាគារទាំងពីរនេះ ក្នុងពេលឆាប់ៗនេះ”។ លោកបន្ថែមថា “ដើម្បីជំរុញភាពងាយស្រួលបន្ថែមទៀត យើងកំពុងធ្វើការសិក្សាលទ្ធភាព និងចរចាជាមួយធនាគារអេស៊ីលីដា ធនាគារពាណិជ្ជកម្មក្រៅប្រទេសនៃកម្ពុជា និងធនាគារហ្វីលីព ផងដែរ”។
លោកបានបន្តថា សម្រាប់បេសកកម្មបន្ទាប់ ក្រសួងពាណិជ្ជកម្ម នឹងធ្វើបច្ចុប្បន្នភាព ការបញ្ជូនទិន្នន័យវិញ្ញាបនបត្រ នៃកិច្ចព្រមព្រៀងពាណិជ្ជកម្មទំនិញអាស៊ាន ទម្រង់អេឡិចត្រូនិច e-Form D (ATIGA e-Form D) ដែលជាគម្រោងពន្លឿនការបញ្ចេញទំនិញពីគយ និងឯកសារប្រកាសគយអាស៊ាន (ASEAN Customs Declaration Document -ACDD) ដែលជាប្រព័ន្ធមួយ ដើម្បីជួយសម្រួលដល់ការផ្លាស់ប្តូរព័ត៌មាន នៃការប្រកាសការនាំចេញ ដែលត្រូវបានដាក់ឱ្យប្រើ នៅក្នុងខែមករាឆ្នាំមុន។
តាមរយៈការណែនាំនៃដំណោះស្រាយ តាមប្រព័ន្ធអេឡិចត្រូនិច ដំណោះស្រាយអនឡាញនឹងបង្កើនល្បឿន និងតម្លាភាពនៃនីតិវិធីពាណិជ្ជកម្មអន្តរជាតិ កាត់បន្ថយការចំណាយ និងផ្តល់នូវភាពស៊ីសង្វាក់គ្នា និងភាពប្រាកដប្រជាដល់ដំណើរការទាំងមូល ចាប់ពីការចាប់ផ្តើមនៃតម្រូវការបទប្បញ្ញត្តិ រហូតដល់ការបញ្ចេញទំនិញទំនិញ។
កិច្ចប្រជុំលើកទី២ របស់ប្រព័ន្ធបញ្ជរតែមួយជាតិ ដែលធ្វើឡើងក្នុងខែមិថុនា ឆ្នាំ២០១៩ មានតែក្រសួងចំនួន៦ប៉ុណ្ណោះ ដែលមានការពាក់ព័ន្ធ ដូចជាអគ្គនាយកដ្ឋានគយ និងរដ្ឋាករ ក្រុមប្រឹក្សាអភិវឌ្ឍន៍កម្ពុជា ក្រសួងសុខាភិបាល ក្រសួងកសិកម្ម រុក្ខាប្រមាញ់និងនេសាទ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងក្រសួងពាណិជ្ជកម្ម។
ក្រសួងទាំង៦ ត្រូវបានតភ្ជាប់តាមរយៈប្រព័ន្ធស្វ័យប្រវត្តិកម្មទិន្នន័យគយ (ASYCUDA) ដោយចុះឈ្មោះនៅក្នុងប្រព័ន្ធបញ្ជរតែមួយជាតិ ក្នុងគោលបំណងចូលរួម នៅក្នុងច្រកចេញចូលតែមួយរបស់អាស៊ាន (Asian Single Window-ASW)៕
