ដោយៈ គង់ ហ្វីអូណា
ភ្នំពេញៈ អ្នកជំនាញសេដ្ឋកិច្ចនៃរាជបណ្ឌិតសភាកម្ពុជា លោកបណ្ឌិតគី សេរីវឌ្ឍន៍បានថ្លែងថា អំពើទុច្ចរិតកេងប្រវ័ញ្ច បោកប្រាស់ តាមរយៈវិស័យអចលនទ្រព្យ ក៏ដូចជាការដាក់ទុនវិនិយោគលើវិស័យនានា ដើម្បីបានការប្រាក់ខ្ពស់ ឬផលចំណេញច្រើន កំពុងធ្វើឱ្យសេដ្ឋកិច្ចរបស់ប្រជាពលរដ្ឋខ្មែរមួយចំនួនកាន់តែដុនដាប។
លោកបណ្ឌិតបានបញ្ជាក់ថា “ប្រជាពលរដ្ឋ ដែលរងគ្រោះពីការបោកប្រាស់ក្នុងប្រព័ន្ធនេះ ភាគច្រើនស្ថិតនៅក្នុងវិស័យលក់រាយ-ដុំ និងសេវាកម្មតូចៗ និងកសិករ ដែលជាអ្នកមានចំណូលទាប”។
រយៈពេលចុងក្រោយនេះ មានករណីបោកប្រាស់ដាក់ប្រាក់វិនិយោគ ដោយទទួលបានការប្រាក់ខ្ពស់ (ការប្រាក់បាន៣ភាគរយក្នុងមួយខែឬលើសពីនេះ) ឬផលចំណេញច្រើន កំពុងតែផ្ទះឡើងយ៉ាងខ្លាំងនៅក្នុងសង្គមខ្មែរ។
ករណីចុងក្រោយនេះ គឺតុលាបានចាប់ខ្លួន ឧកញ៉ាឡេង ចាន់ណា ម្ចាស់ក្រុមហ៊ុនប្រ៊ីលាន ស៊ីធី ក្រោយពលរដ្ឋជាច្រើននាក់ បានអះអាងថា ពួកគេបានចាញ់បោកម្ចាស់ក្រុមហ៊ុនមួយនេះ ក្រោមរូបភាពដាក់ទុនវិនិយោគបានការប្រាក់ខ្ពស់។ សព្វថ្ងៃនេះ ក៏បានលេចឡើងនៃភាពអវិជ្ជមានរបស់ក្រុមហ៊ុនCIC PLc ជុំវិញការប្រមូលទុនវិនិយោគនេះដែរ។ លោកបណ្ឌិតសេដ្ឋកិច្ច គី សេរីវឌ្ឍន៍បានបន្តថា “ការវិនិយោគក្នុងរូបភាពបែបនេះ បានបង្កឱ្យមានភាពចលាចលនៅក្នុងសេដ្ឋកិច្ច”។ លោកបន្ថែមថា “ក្នុងបរិបទនេះ យើងមើលនៅក្នុងប្រទេសកម្ពុជា ការវិនិយោគក្នុងទ្រង់ទ្រាយបែបនេះ បានជះឥទ្ធិពលដល់សង្គមយើងកាន់តែដុនដាប ខណៈពេលដែលរដ្ឋាភិបាល កំពុងតែខិតខំជំរុញឱ្យសេដ្ឋកិច្ចមានដំណើរការឡើងវិញ”។
លោកបន្តថា ចាប់ផ្តើមងើបប្រសើរឡើង ស្រាប់តែផ្ទុះឡើងនូវវិបត្តិការបោកប្រាស់ ទុនវិនិយោគជាបន្តបន្ទាប់ ដែលនេះជាចលករមួយទាញឱ្យសេដ្ឋកិច្ចយើងហ្នឹងធ្លាក់ចុះ ជាពិសេស គឺវិស័យលក់រាយ ដែលពលរដ្ឋបច្ចុប្បន្ន កំពុងមានភាពភ័យខ្លាចបាត់បង់ នូវប្រាក់ចំណូលហើយអ្នកធ្វើអាជីវកម្មតូចតាច គឺពិបាកស្តារប្រាក់ចំណូលមកវិញ។
បញ្ហាដែលកើតចេញ ពីការបោកប្រាស់ក្រោមរូបភាពដាក់ទុនវិនិយោគនេះ មានផលប៉ះពាល់ទៅលើសេដ្ឋកិច្ច មិនខុសពីការដួលរលំនូវវិស័យអចលនទ្រព្យ ដែលកើតចេញពីការបោកប្រាស់ ក្នុងវិស័យអចលនទ្រព្យនៅកម្ពុជា នាឆ្នាំ២០២៣ឡើយ។ លោកគី សរីវឌ្ឍន៍បញ្ជាក់។
លោកបន្តថា ផលប៉ះពាល់នៃការដួលរលំ វិស័យអចលនទ្រព្យនោះ គឺមានពលរដ្ឋមួយចំនួនធំ ដែលទិញអចលនទ្រព្យអត់បានហើយត្រូវសង់បំណុលធនាគារ។ នេះការជាប់បំណុលមួយរបស់ពលរដ្ឋ, ហើយដល់ពេលវិបត្តិ នៃការវិនិយោគបែបនេះ កើតឡើងធ្វើពួកគាត់បាត់ដើមទុនមួយទៀត។
លោកបញ្ជាក់ថា “គាត់[ពលរដ្ឋ]ក្លាយទៅជនរងគ្រោះ ដោយអត់មានលុយសងធនាគារបន្តទៀត។ មានន័យថា សេដ្ឋកិច្ចពលរដ្ឋចាប់ផ្តើមងើបឡើងវិញបន្តិច តែបែរជាធ្លាក់ទៅវិញ ដោយសារតែវិបត្តិនេះកើតឡើង”។
ជាមួយគ្នានេះ ប្រធានសមាគមសហគ្រិនសារព័ត៌មានសេដ្ឋកិច្ចកម្ពុជា(CEMEA)លោកយិន លាងគង់បានមានប្រសាសន៍ថា ស្របពេលទីផ្សារអចលនទ្រព្យកំពុងមានបញ្ហា និងស្ថិតក្នុងសភាពមិនច្បាស់លាស់ បញ្ហាបោកប្រាស់បែបនេះ បាននិងកំពុងធ្វើឲ្យទីផ្សារជាប់គាំងបន្ថែមទៀត។
លោកបញ្ជាក់ថា “បញ្ហានេះ បាននិងកំពុងជះឥទ្ឋិពលអាក្រក់ដល់សេដ្ឋកិច្ចជាតិ និងប៉ះពាល់មុខមាត់កម្ពុជាលើឆាកអន្តរជាតិ ដោយសារព័ត៌មានធំៗជាច្រើន បានផ្សព្វផ្សាយពីរឿងនេះ”។ លោកបន្តថា “ស្ថាប័នមានសមត្ថកិច្ច គួរធ្វើការដោះស្រាយបញ្ហានេះ ឲ្យបានសមស្រប ដើម្បីប្រជាពលរដ្ឋមានទំនុកចិត្តឡើងវិញ”។
លោកយិន លាងគង់បានបន្តថា បញ្ហាម្ចាស់ក្រុមហ៊ុនដីមាស ក្រុមហ៊ុនប្រីលាន ស៊ីធីរបស់ឧកញ៉ាឡេង ចាន់ណា និងក្រុមហ៊ុនCIC PLc ឧកញ៉ាជា សារ៉នជាដើម បាននិងកំពុងប៉ះពាល់ដល់មុខមាត់កម្ពុជាផង ប៉ះពាល់ដល់សេដ្ឋកិច្ចគ្រួសាររបស់ប្រជាពលរដ្ឋ ហើយបើបញ្ហានេះ មិនអាចដោះស្រាយបានប្រកបដោយតម្លាភាព និងយុត្តិធ៌ម នឹងធ្វើឲ្យសេដ្ឋកិច្ចកម្ពុជារងផលប៉ះពាល់ ពិសេសវិស័យអចលនទ្រព្យកម្ពុជា នឹងបន្តជាប់គាំងរយៈពេលវែងបន្ថែមទៀត៕