កម្ពុជា ចិន ផ្សព្វផ្សាយជំរុញធុរកិច្ច និងវិនិយោគសម្រាប់គម្រោងសួនឧស្សាហកម្មកម្ពុជា-ចិន

រាជរដ្ឋាភិបាលកម្ពុជា បានប្រែក្លាយកម្ពុជា ទៅជាប្រទេសមួយដែលល្បីល្បាញ ដោយសារការរីកចម្រើនយ៉ាងស្វាហាប់ ការអភិវឌ្ឍសង្គម និងការគោរព លទ្ធិប្រជាធិបតេយ្យ នីតិរដ្ឋ និងសិទ្ធិមនុស្ស។ ជាលទ្ធផល កម្ពុជាទទួលបានសុខសន្តិភាព និងរក្សាបាននូវ ស្ថិរភាពនយោបាយ និងម៉ាក្រូសេដ្ឋកិច្ច ដោយមានអត្រាកំណើនសេដ្ឋកិច្ចប្រចាំឆ្នាំជាមធ្យមក្នុងរង្វង់ ៧% (១៩៩៨-២០១៩) និងក្លាយទៅជាប្រទេសមានចំណូលមធ្យម កម្រិតទាបក្នុងឆ្នាំ២០១៥។

អត្រានៃភាព ក្រីក្រត្រូវបានកាត់បន្ថយពី៤៧.៨% ក្នុងឆ្នាំ២០០៧ មកនៅក្រោម១០% ក្នុងឆ្នាំ២០១៩ ខណៈពេលផលិតផលក្នុងស្រុកសរុបសម្រាប់មនុស្សម្នាក់ ត្រូវបានគេប៉ាន់ប្រមាណថាមានចំនួនប្រហែល១៧០០ដុល្លារក្នុងឆ្នាំដដែល ហើយសហគមន៍អន្តរជាតិបានដាក់ឈ្មោះប្រទេសកម្ពុជាជា “ខ្លាសេដ្ឋកិច្ចថ្មីនៅអាស៊ី” ក្នុងឆ្នាំ២០១៦។

លោកស៊ាង ថៃបានបន្តថា បន្ថែមពីនេះ រាជរដ្ឋាភិបាលក៏បានដាក់ចេញនូវទស្សនវិស័យវែងឆ្ងាយ និងច្បាស់លាស់ ដើម្បីប្រែក្លាយកម្ពុជា ទៅជាប្រទេសមានចំណូលមធ្យម កម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០ ខាងមុខនេះ។

លោកបញ្ជាក់ថា ស្របតាមចក្ខុវិស័យនេះ រាជរដ្ឋាភិបាលក្នុងនីតិកាលទី៧ ក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា កំពុងបន្តដឹកនាំជាតិឆ្ពោះទៅរកវឌ្ឍនភាព និងបង្កើតសមិទ្ធផលថ្មីបន្ថែមទៀត តាមគោលការណ៍ “រក្សាចាស់ ពង្រីកថ្មី” ដោយពង្រឹងប្រសិទ្ធភាព និងពង្រីកវិសាលភាពនៃការអនុវត្ត តាមរយៈការដាក់ចេញនូវ «យុទ្ធសាស្ត្របញ្ចកោណ-ដំណាក់កាលទី១” ដោយរួមបញ្ចូលនូវ “កម្មវិធីគោលនយោបាយ” និងវិធានការគន្លឹះសំខាន់ៗ ដែលបានកំណត់ទិសដៅ និងអាទិភាពនានា ក្នុងការដឹកនាំប្រទេសជាតិ ដោយឆ្លើយតបទៅនឹងស្ថានភាព និងនិន្នាការថ្មីក្នុងសកលលោក និងក្នុងតំបន់។

កាលពីចុងខែមករា ឆ្នាំ២០២៤ កន្លងទៅថ្មីៗនេះ សម្តេចធិបតី ក៏បានប្រកាសដាក់ ឱ្យអនុវត្តជាផ្លូវការនូវ “កម្មវិធីពិសេសជំរុញការវិនិយោគក្នុងខេត្តព្រះសីហនុ ឆ្នាំ២០២៤” ក្នុងគោលបំណងចូលរួមចំណែកប្រែក្លាយខេត្តព្រះសីហនុ ឱ្យទៅជាប៉ូលសេដ្ឋកិច្ចចម្បង និងគំរូមួយរបស់កម្ពុជា តាមរយៈការដោះស្រាយបញ្ហា ដែលមានចំពោះមុខ ក៏ដូចជាការប្រើប្រាស់នូវសក្តានុពល និងធនធានអំណោយផល ដែលមានស្រាប់ ក្នុងខេត្តជាប់តំបន់មាត់សមុទ្រមួយនេះ ប្រកបដោយប្រសិទ្ធភាព៕