ដោយ: គង់ លាងហួរ
អន្តរជាតិ: តម្លៃហាងឆេងមាសបានងើបឡើងថ្លៃក្នុងការជួញដូរនាព្រឹកថ្ងៃច័ន្ទដើមសប្តាហ៍នេះ ខណៈក្រុមអ្នកវិនិយោគបានសម្រុកទិញមាស ដែលជាប្រភេទទ្រព្យសកម្មដ៏មានសុវត្ថិភាព ស្របពេលមានការព្រួយបារម្ភនៃសង្គ្រាមពាណិជ្ជកម្មសកលដែលបង្កឡើងដោយគោលនយោបាយពន្ធគយចុងក្រោយបំផុតរបស់លោកប្រធានាធិបតីអាមេរិក ដូណាល់ ត្រាំ។
តួយ៉ាង តម្លៃមាស Spot Gold បានងើបឡើង០,៧៧ភាគរយដល់៣១០៧,៥៩ដុល្លារក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានងើបឡើង០,៨២ភាគរយដល់៣១៣៩,៨០ដុល្លារក្នុងមួយអោនគិតត្រឹមម៉ោង១០:៤៦នាទីព្រឹក។
យោងតាមឧបករណ៍ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាសចំនួន៦៦ភាគរយ ដែលធនាគារកណ្តាលអាមេរិក (Fed) នឹងអាចទម្លាក់អត្រាការប្រាក់ចំនួន០,២៥ភាគរយក្នុងកិច្ចប្រជុំគោលនយោបាយនៅថ្ងៃទី១៨ ខែមិថុនាខាងមុខ។
