ដោយៈ គង់ សូរិយា
ភ្នំពេញៈ ផ្តើមចេញពីកូនកសិករ នៅស្រុកក្រូចឆ្មារ ខេត្តត្បូងឃ្មុំ អ្នកឧកញ៉ាសំ សុខនឿនប្រធានក្រុមប្រឹក្សាភិបាល ក្រុមហ៊ុនSAM SN Groupបានចាប់ផ្តើមអាជីព ក្នុងវិស័យអចលនទ្រព្យ និងក្លាយជាបុគ្គលលេចធ្លោមួយរូបក្នុងវិស័យនេះ។
ជាមួយនឹងការតស៊ូក្នុងជីវិត ឆ្លងកាត់ឧបសគ្គរាប់មិនអស់ ទម្រាំទទួលបានជោគជ័យនាពេលនេះ អ្នកឧកញ៉ាត្រូវបានសហគ្រិនខ្មែរអញ្ជើញចែករំលែកបទពិសោធន៍ និងទិដ្ឋភាពជំនួញក្នុងវេទិកា “ធុរកិច្ចជំនាន់ថ្មី” ដែលនឹងប្រារពធ្វើនៅថ្ងៃទី៦ មិថុនា ខាងមុខនេះ។
អ្នកឧកញ៉ាសំ សុខនឿនបានមានប្រសាសន៍ឲ្យដឹងតាមបណ្តាញតេឡេក្រាមនាព្រឹកថ្ងៃទី២ មិថុនានេះថា នេះជាកម្មវិធីដ៏ល្អ ក្នុងនាមយើងជាសហគ្រិនខ្មែរ ដែលអាចចែករំលែកទស្សន និងបទពិសោធន៍ទាក់ទងអាជីវកម្មរបស់យើង ដល់សហគ្រិននិងអ្នកចូលរួមដទៃទៀត ដើម្បីពួកគេបានត្រៀមខ្លួន និងធ្វើយ៉ាងណាឲ្យអាជីវកម្មរបស់ពួកគេមានការរីកចម្រើនប្រកបនិរន្តរភាព។
អ្នកឧកញ៉ាបានបន្តថា “កម្មវិធីនេះ នឹងជួយជម្រុញគាំទ្រដល់អាជីវករ ម្ចាស់អាជីវកម្មទាំងអស់អាចចូលរួម ដើម្បីទទួលបានចំណេះដឹងពិត បទពិសោធន៍ពិតពីសហគ្រិនរបស់យើង”។ អ្នកឧកញ៉ាបន្តថា “កម្មវិធីនេះ ក៏ជាការផ្តល់ការគាំទ្រដល់ប្រជាពលរដ្ឋទាំងអស់ ដែលមានបំណងចង់ធ្វើជាសហគ្រិន មានបំណងចង់ទទួលបានបទពិសោធន៍ថ្មីៗ អាចយកមកអនុវត្តន៍ ដើម្បីឲ្យអាជីវកម្មរបស់ខ្លួនមានស្ថេរភាព និងភាពរីកចម្រើន”៕
