ដោយ: គង់ លាងហួរ
ភ្នំពេញ: ក្រុមហ៊ុន Daikin Airconditioning របស់ប្រទេសជប៉ុន បាននិងកំពុងបង្ហាញវត្តមាននៅប្រទេសកម្ពុជា ក្រោយពីក្រុមហ៊ុននេះបានបើកការិយាល័យលក់ម៉ាសុីនត្រជាក់ និងមជ្ឈមណ្ឌលបណ្តុះបណ្តាលនៅរាជធានីភ្នំពេញ។
លោក Toshiyuki Tanaka ប្រធានក្រុមហ៊ុន Daikin Cambodia បានលើកឡើងថា “ថ្វីត្បិតតែក្រុមហ៊ុន Daikin Airconditioning មានមូលដ្ឋាននៅក្នុងប្រទេសជប៉ុនជិត១០០ឆ្នាំយ៉ាងណាក្តី សាខារបស់ក្រុមហ៊ុន Daikin នៅក្នុងប្រទេសកម្ពុជា មានអាយុកាលមិនទាន់ដល់១ឆ្នាំនៅឡើយ។
យ៉ាងណាមិញ លោក Toshiyuki Tanaka បានបង្ហាញការជឿជាក់ថា “អាជីវកម្មនេះនឹងរីកលូតលាស់នាពេលខាងមុខ ហើយយើងបានសង្កេតឃើញមានសក្ដានុពលជាច្រើននៅតំបន់អាស៊ាន ជាពិសេសប្រទេសកម្ពុជា”។
ស្របពេលចំនួនប្រជាជនរបស់ប្រទេសជប៉ុនមានការថយចុះ ក្រុមហ៊ុន Daikin កំពុងផ្តោតលើទីផ្សារកំពុងរីកចម្រើន ដូចជាប្រទេសកម្ពុជា ខណៈចំនួនប្រជាជន និងប្រាក់ចំណូលនៅកម្ពុជាកំពុងកើនឡើង។ បន្ថែមលើនេះ ការប្រែប្រួលអាកាសធាតុបានជំរុញឱ្យម៉ាស៊ីនត្រជាក់កាន់តែមានតម្រូវការចាំបាច់។
ក្រោយពីបានបង្កើតឡើងនៅទីក្រុងអូសាកាកាលពីឆ្នាំ១៩២៤ ក្រុមហ៊ុន Daikin ជាក្រុមហ៊ុនម៉ាស៊ីនត្រជាក់ដ៏ចំណាស់បំផុតមួយរបស់ប្រទេសជប៉ុន។យ៉ាងណាមិញ ស្របពេលចំនួនប្រជាជនជប៉ុន និងមូលដ្ឋានអតិថិជនធ្លាក់ចុះ ក្រុមហ៊ុនមួយនេះកំពុងផ្តោតលើទីផ្សារនៅក្រៅប្រទេស។
ទំហំទីផ្សារប្រព័ន្ធបរិក្ខារកំដៅ បរិក្ខារខ្យល់ និងបរិក្ខារត្រជាក់ ឬហៅកាត់ថា (HVAC) របស់កម្ពុជាត្រូវបានគេរំពឹងថានឹងសម្រេចបានកំណើនប្រចាំឆ្នាំ១០ភាគរយក្នុងរយៈពេល៥ឆ្នាំខាងមុខ។
ដោយឡែក កាលពីខែឧសភា ក្រុមហ៊ុនជប៉ុន Mitsubishi Electric Group ក៏បានបើកការិយាល័យតំណាងពាណិជ្ជកម្មនៅទីក្រុងភ្នំពេញផងដែរ ខណៈក្រុមហ៊ុននេះព្យាយាមជំរុញការលក់ម៉ាស៊ីនត្រជាក់នៅកម្ពុជា។
ចំណែក ក្រុមហ៊ុនយក្ស Panasonic កំពុងជំរុញការផលិតនៅរោងចក្រគ្រឿងបន្លាស់ម៉ាស៊ីនត្រជាក់នៅក្នុងប្រទេសវៀតណាម និងចាប់ផ្តើមការលក់នៅក្នុងប្រទេសកម្ពុជា៕ប្រភព: Japan Times ៕
