ដោយ គង់ សូរិយា
ស្របពេលចលនានៃការទិញដីឡូត៍ និងពុះដីឡូត៍លក់កើតមានស្ទើរគ្រប់ទីកន្លែង សកម្មភាពនៃការវិនិយោគនេះ ក៏មានហានិភ័យមួយចំនួនផងដែរ ហេតុនេះ មុនសម្រេចចិត្តវិនិយោគលើដីឡូត៍ ឬទិញដីឡូត៍ត្រូវពិនិត្យមើលទិដ្ឋភាពផ្លូវច្បាប់ និងសេដ្ឋកិច្ចសង្គមមួយចំនួនសិន។
និពន្ឋនាយកទស្សនាវដ្តីអចលនទ្រព្យដំបូងគេ នៅកម្ពុជា ឈ្មោះ PROPERTY VIEW លោក យិន លាងគង់ បានថ្លែងថា ការទិញដីឡូត៍ ជាការវិនិយោគមួយដែលអ្នកទិញទុកលក់ ឬទិញយកទុកធ្វើលំនៅដ្ឋានត្រូវពិនិត្យលើទិដ្ឋភាពមួយចំនួន។
ទិដ្ឋភាពផ្លូវច្បាប់
-->
ត្រូវប្រាកដថាដីឡូត៍ដែលលោកអ្នកទិញ ជាការទិញពីម្ចាស់ប័ណ្ណពិតប្រាកដ មិនមែនទិញពីអ្នកពុះដីឡូត៍នោះទេ ព្រោះអ្នកពុះដីឡួត៍មួយចំនួនបានយកដីគេមកលក់ ហើយរត់ចោលអតិថិជនរបស់ខ្លួន នៅពេលពួកគេប្រមូលប្រាក់បាន(ករណីនេះបានកើតមានរួចហើយ។
ប្លង់កម្មសិទ្ឋ
ចំណុចមួយទៀតត្រូវប្រាកដថា ដីឡូត៍ដែលខ្លួនបានទិញមានប្លង់ត្រឹមត្រូវ។ នេះមានន័យថា ប្រសិនជាដីឡូត៍នោះមានប្លង់រឹង ត្រូវតែកាត់ប្លង់រឹង ព្រោះអ្នកលក់ដីឡូត៍ខ្លះមានប្លង់រឹង តែបានកាត់ប្លង់ត្រឹម ស្រុក ឬខ័ណ្ឌ ឬត្រឹម ឃុំសង្កាត់។ ប្រសិនជាការទិញលក់បែបនេះ ពិតជាមានហានិភ័យ ព្រោះម្ចាស់ដីឡូត៍ខ្លះបានដាក់ប្លង់នៅធនាគាររួចហើយ និងអាចលួចផ្ទេរកម្មសិទ្ឋដល់កូនចៅរបស់ខ្លួនជាប្លង់រឹង នោះអ្នកទិញដីឡូត៍នោះនឹងមានហានិភ័យកើតឡើង ព្រោះពួកគេគ្មានមូលដ្ឋានផ្លូវច្បាប់តវ៉ាឡើយ។
ហេដ្ឋារចនាសម្ព័ន្ឋ
តាមធម្មតា អ្នកពុះដីឡូត៍លក់តែងតែមានយុទ្ឋសាស្ត្រខុសៗគ្នា ដើម្បីទាក់ទាញអតិថិជនរបស់ខ្លួន តាមរយៈការចាក់ផ្លូវ ដាក់បង្គោលអគ្គិសនី ទឹកស្អាត និងប្រព័ន្ឋលូជាដើម។ ហេតុនេះអ្នកទិញ ដែលមិនយល់ពីបញ្ហានេះ ពួកគេមិនបារម្ភឡើយ ប៉ុន្តែមានរឿងជាច្រើននៅក្នុងនោះ ដូចជា តើផ្លូវត្រូវតាមស្តង់ដាឬទេ? ប្រព័ន្ឋលូមានកន្លែងបង្ហូរត្រឹមត្រូវឬទេ ឬគ្រាន់តែដាក់ឲ្យរួចពីដៃ។ ចំណុចមួយទៀតតើប្លង់ទាំងនោះត្រូវបានទទួលស្គាល់កម្រិតណា?ជាដើម។ នេះជាចំណុច ដែលត្រូវសួរ។
ការបង់រំលោះ
ដោយសារតែចង់ពុះដីឡូត៍លក់បានច្រើន និងយកចំណេញ អ្នកវិនិយោគពុះដីឡូត៍លក់តែងតែឲ្យអតិថិជន បង់ប្រាក់នៅក្រុមហ៊ុនរបស់ខ្លួន ដោយគ្មានការប្រាក់។នេះជាចំណុចហានិភ័យមួយ ព្រោះទី១ ការទូទាត់បែបនេះមិនមានច្បាប់ណាមួយគ្រប់គ្រងឡើយ ទី២ ការបង់រំលោះបែបនេះ ក្រុមហ៊ុនអាចប្រមូលបានប្រាក់ហើយរត់ និងមិនទទួលខុសត្រូវ និងប្រព័ន្ឋបង់ប្រាក់បែបនេះ ជាការទូទាត់ខុសច្បាប់។
ទិដ្ឋភាពសង្គម
តំបន់ដីឡូត៍មិនងាយនឹងមានការអភិវឌ្ឍនោះទេ ដោយសារអ្នកទិញដីឡូត៍ភាគច្រើន ជាអ្នកមានជីវភាពមធ្យម និងពួកគេរង់ចាំគ្នា មិនងាយនឹងធ្វើការសាងសង់លំនៅដ្ឋាននោះទេ។ ទោះជាពួកគេសាងសង់លំនៅដ្ឋាន ក៏ជាលំនៅដ្ឋានគ្មានរបៀបរៀបរយនោះដែរ ព្រោះពួកគេមានចិត្តស្រលាញ់ខុសៗគ្នា ដែលធ្វើឲ្យសហគមន៍ពួកគេរស់នៅមិនមានសោភ័ណភាពឡើយ។
ទិដ្ឋភាពសេដ្ឋកិច្ច
អ្នកទិញដីឡូត៍ភាគច្រើន ចង់ទិញយកលក់យកចំណេញ ប៉ុន្តែតាមធម្មតា អ្នកទិញដីឡូត៍ មិនងាយទទួលបានផលចំណេញនោះទេ ព្រោះអ្នកវិនិយោគពុះដីឡូត៍លក់ បានយកចំណេញខ្ពស់រួចទៅហើយ។ ហេតុនេះការទិញដីឡូត៍មិនសូវ ទទួលបានផលចំណេញខ្ពស់នោះឡើយ៕
