ដោយ គង់ ម៉ាលីន
ភ្នំពេញ៖ លោកឧកញ៉ាលី ហួរអគ្គនាយកបុរីវិមានភ្នំពេញ និងជាប្រធានសមាគមអ្នកអភិវឌ្ឍន៍លំនៅដ្ឋានកម្ពុជា បានចាប់ផ្តើមគំរោងលំនៅដ្ឋានប្រណីតថ្មីមួយ ដែលស្ថិតនៅកៀកនឹងផ្សារទំនើប AEON 2។
លោកឧកញ៉ាលី ហួរចាប់ផ្តើមគំរោងលំនៅដ្ឋានប្រណីតធំមួយនៅក្បែរផ្សារទំនើប AEON2
លោកឧកញ៉ាបានមានប្រសាសន៍ឲ្យដឹងតាមទូរស័ព្ទ បន្ទាប់ពីបើកការដ្ឋានសាងសង់គំរោងលំនៅដ្ឋានដែលដាក់់ឈ្មោះ”បុរីវិមានភ្នំពេញមង្គលឧត្តម”នាព្រឹកថ្ងៃទី៨ ឧសភានេះថា គំរោងនេះសាងសង់លើផ្ទៃដីជាង៦ហិកតា និងមានផ្ទះសរុបជាង២០០ ដែលស្ថិតនៅទីតាំងបណ្តុំដោយមជ្ឈមណ្ឌលពាណិជ្ជកម្មចម្រុះ។ គំរោងនេះមានផ្ទះបីប្រភេទ ដែលជាវីឡាទោល វីឡាភ្លោះ និងផ្ទះអាជីវកម្ម ដែលអាចប្រកបរបរទទួលទានបាន ហើយផ្ទះក្នុងគំរោងនេះមានតម្លៃចាប់ពី២៥ម៉ឺនដល់៩០ម៉ឺនដុល្លារអាមេរិក។
លោកបន្តថា “ទីផ្សារលំនៅដ្ឋានប្រណីតនៅតែមានតម្រូវការ អាស្រ័យលើទីតាំង ជាក់ស្តែងគំរោងវិមានភ្នំពេញមង្គលឧត្តម គឺស្ថិតនៅតំបន់ដែលដីមានតម្លៃថ្លៃ ដែលយើងមិនអាចសាងសង់ផ្ទះតម្លៃមធ្យមបាន”។លោកបន្តថា “ដីនៅតំបន់នេះមានតម្លៃប្រមាណ៦០០ដុល្លារ ក្នុងមួយម៉ែត្រការ៉េ ហេតុនេះបើសង់ផ្ទះតម្លៃមធ្យមមិនរួចថ្លៃដីទេ”។
អ្នកនាងឆាយ ស៊ីណាប្រធានផ្នែកលក់និងទីផ្សារនៃបុរីវិមានភ្នំពេញ បានមានប្រសាសន៍ឲ្យដឹងផងដែរថា គំរោងនេះត្រូវបានឌីសាញឡើងមានភាពទាក់ទាញខ្លាំង ដោយទទួលបានការគាំទ្រពីអតិថិជន ជាក់ស្តែងក្នុងចំណោមវីឡាប្រណីតក្នុងគំរោងនេះ ក្រុមហ៊ុនបានលក់អស់៥០ភាគរយរួចហើយ គិតត្រឹមថ្ងៃនេះ។
អ្នកនាងបន្តថា គំរោងនេះមានប្រភេទផ្ទះបែប Shop house, វីឡាភ្លោះ និងវីឡាប្រណីត ដែលការឌីសាញមានភាពទាក់ទាញទាំងខាងក្នុង និងខាងក្រៅលំនៅដ្ឋាន ជាហេតុធ្វើឲ្យគំរោងនេះទទួលបាននូវការគាំទ្រ។ អ្នកនាងបន្តថា ក្នុងឱកាសសម្ពោធគំរោងថ្មីនេះ ក្រុមហ៊ុននឹងផ្ដល់ការបញ្ចុះតម្លៃរហូតដល់ ២ម៉ឺនដុល្លារអាមេរិក ចាប់ពីថ្ងៃទី០៨ ខែឧសភា ដល់ថ្ងៃទី២៣ មិថុនា ឆ្នាំ ២០១៩ ខាងមុខ។
គំរោងនេះស្ថិតនៅភូមិ៤ សង្កាត់ច្រាំងចំរេះ ខ័ណ្ឌឬស្សីកែវ ក្រុងភ្នំពេញ។
អ្នកនាងឆាយ ស៊ីណាបានបន្តថា “យើងជឿជាក់ថាគំរោងនេះនឹងទទួលបានជោគជ័យ និងទទួលបានការគាំទ្រពីអតិថិជន”៕
[…] ប្រភព៖ Property Area […]