ដោយៈ ម៉ាណា
ភ្នំពេញៈ ឯកអគ្គរដ្ឋទូតកាណាដាប្រចាំកម្ពុជា លោកDesRoches បានថ្លែងថា រដ្ឋាភិបាលកាណាដា កំពុងធ្វើការយ៉ាងជិតស្និទ្ធជាមួយរាជធានីភ្នំពេញ និងដៃគូវិស័យឯកជន ដើម្បីពង្រីកទំនាក់ទំនងពាណិជ្ជកម្ម និងវិនិយោគ។ ការលើកឡើងនេះ ស្របគ្នានឹងអ្វីដែលទីក្រុងអូតាវ៉ា កំពុងបន្តរបៀបវារៈធ្វើពិពិធកម្មដ៏ធំមួយ។
កម្ពុជាកំពុងពង្រឹងភាពជាដៃគូសេដ្ឋកិច្ច ជាមួយកាណាដា ខណៈដែលភាគីទាំងពីរ បានជួបគ្នានៅថ្ងៃសុក្រ ដើម្បីជំរុញកិច្ចសហប្រតិបត្តិការវិនិយោគ ការផ្សព្វផ្សាយវិនិយោគិនឱ្យកាន់តែរឹងមាំ និងការចូលរួមសេដ្ឋកិច្ចកាន់តែទូលំទូលាយ។
-->
លោកស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា (CDC) បានទទួល ជួបសម្តែងការគួរសម និងពិភាក្សាការងារជាមួយលោក Christian DesRoches ឯកអគ្គរាជទូតកាណាដាប្រចាំកម្ពុជា។
កិច្ចពិភាក្សាដែលបានធ្វើឡើងនៅCDC បានផ្តោតលើការពង្រីកឱកាសសេដ្ឋកិច្ច និងពង្រឹងបណ្តាញសម្រាប់វិនិយោគិនកាណាដា ដែលកំពុងស្វែងរកការចូល ទៅក្នុងទេសភាពវិនិយោគ ដែលមានការវិវត្តយ៉ាងឆាប់រហ័សរបស់កម្ពុជា។
លោកឧបនាយករដ្ឋមន្ត្រី បានគូសបញ្ជាក់ពីលទ្ធផល ដ៏ត្រចះត្រចង់ នៃបេសកកម្មទាក់ទាញនិងជំរុញវិនិយោគ ដែលគណៈប្រតិភូកម្ពុជាបានបំពេញ នៅប្រទេសកាណាដាកន្លងមក ដែលលោកបានបន្តថា “បានពង្រីកការយល់ដឹង អំពីសក្តានុពលវិនិយោគរបស់កម្ពុជា” ក្នុងចំណោមអាជីវកម្មកាណាដា។
លោកបានកត់សម្គាល់ថា បេសកកម្មនេះបានបម្រើជាស្ពានផ្ទាល់រវាងថ្នាក់ដឹកនាំ វិស័យឯកជនមកពីប្រទេសទាំងពីរ ដោយជួយបញ្ជាក់អំពីលក្ខខណ្ឌបទប្បញ្ញត្តិ គូសបញ្ជាក់ពីវិស័យប្រកួតប្រជែង និងកសាងទំនុកចិត្តលើទិសដៅសេដ្ឋកិច្ចរបស់ប្រទេសកម្ពុជា។
លោកក៏បានគូសបញ្ជាក់ពីជំហរ របស់ប្រទេសកម្ពុជាជាប្រទេសដំបូងគេ ដែលបានចុះហត្ថលេខា លើកិច្ចព្រមព្រៀងពាណិជ្ជកម្មបដិការជាមួយសហរដ្ឋអាមេរិក ដោយលើកឡើងថា វាជាគុណសម្បត្តិយុទ្ធសាស្ត្រ ដែលពង្រឹងភាពជឿជាក់ របស់ប្រទេសកម្ពុជានៅក្នុងឆាកអន្តរជាតិ។
លោកឯកអគ្គរាជទូត បានសម្តែងចំណាប់អារម្មណ៍យ៉ាងខ្លាំងចំពោះកំណែទម្រង់ដែលកំពុងបន្តរបស់កម្ពុជា និងបានបញ្ជាក់ជាថ្មីនូវការប្តេជ្ញាចិត្តរបស់ប្រទេសកាណាដា ក្នុងការលើកកម្ពស់ការយល់ឃើញកាន់តែត្រឹមត្រូវ និងវិជ្ជមានអំពីបរិយាកាស អាជីវកម្មរបស់កម្ពុជា។
ភាគីទាំងពីរក៏បានពិភាក្សា អំពីការរៀបចំរបស់កម្ពុជា ដើម្បីធ្វើជាម្ចាស់ផ្ទះនៃកិច្ចប្រជុំ សហគ្រិននិយាយភាសាបារាំង(REF) លើកទី៦ ក្នុងឆ្នាំ២០២៦។
លោកឯកអគ្គរាជទូត DesRoches បានមានប្រសាសន៍ថា រដ្ឋាភិបាលកាណា ដាកំពុងធ្វើការយ៉ាងជិតស្និទ្ធជាមួយរាជធានីភ្នំពេញ និងដៃគូវិស័យឯកជន ដើម្បីពង្រីកទំនាក់ទំនងពាណិជ្ជកម្ម និងវិនិយោគ ខណៈដែលទីក្រុងអូតាវ៉ា កំពុងបន្តរបៀបវារៈធ្វើពិពិធកម្មដ៏ធំមួយ។
លោកបានកត់សម្គាល់ថា ប្រទេសកាណាដាមើលឃើញប្រទេសកម្ពុជា និងតំបន់អាស៊ីអាគ្នេយ៍ កាន់តែទូលំទូលាយថា ជាទីផ្សារដ៏សំខាន់នៅក្នុងទសវត្សរ៍ខាងមុខ។
លោកបានបន្តថា លោកនាយករដ្ឋមន្ត្រីកាណាដា Mark Carney ថ្មីៗនេះ បានចូលរួមក្នុងកិច្ចប្រជុំកំពូលអាស៊ាន នៅប្រទេសម៉ាឡេស៊ី ដែលលោកបានប្តេជ្ញាបង្កើន ការនាំចេញរបស់កាណាដាទ្វេរដង ក្នុង រយៈពេលដប់ឆ្នាំ។
លោកបញ្ជាក់ថា “យើងមើលឃើញកម្ពុជា និងអាស៊ីអាគ្នេយ៍ជាទីផ្សារសំខាន់ៗ ដើម្បីជួយយើងធ្វើពិពិធកម្ម ទំនាក់ទំនងពាណិជ្ជកម្មរបស់យើង”៕
