ដោយៈ ស៊ីវ ម៉េង
ភ្នំពេញៈ ការដាក់បញ្ចូលគ្នានូវនិន្នាការ និងអ្វីដែលKnight Frank គូសបញ្ជាក់ខាងក្រោមនេះ គឺជាទិសដៅដែលអ្នកអភិវឌ្ឍន៍ត្រូវ ពិនិត្យ និងពិចារណាសម្រាប់ឆ្នាំ២០២៦។
អចលនទ្រព្យឧស្សាហកម្ម និងភស្តុភារកម្មគឺជាចំណុចលេចធ្លោមួយ ព្រោះដោយសារការកើនឡើងយ៉ាងឆាប់រហ័ស នៃគម្រោងSEZ និងឧស្សាហកម្មដែលត្រូវបានអនុម័ត តម្រូវការសម្រាប់លំនៅដ្ឋានកម្មករ ការអភិវឌ្ឍចម្រុះ និងហេដ្ឋារចនាសម្ព័ន្ធភស្តុភារកម្ម/ពាណិជ្ជកម្មទំនងជានឹងកើនឡើង។
ទីផ្សារលំនៅដ្ឋានទំនងជានៅតែមានស្ថេរភាព ប៉ុន្តែបែងចែកជាផ្នែកៗ អាផាតម៉ិន/អាផាតម៉ិនសេវាកម្ម ដែលមានតម្លៃសមរម្យ និងលំនៅដ្ឋានដីកម្រិតមធ្យម ទំនងជានៅតែមានតម្រូវការ។ ខុនដូលំដាប់ខ្ពស់/ផ្ទះថ្លៃៗ អាចនៅតែមានសភាពទន់ខ្សោយលើការទិញ លក់។
ចំណែកផ្នែកប្រឈម គឺការិយាល័យពាណិជ្ជកម្ម និងលក់រាយនៅតែមិនប្រាកដប្រជា ដោយសារការផ្គត់ផ្គង់លើស និងតម្រូវការខ្សោយអាចធ្វើឱ្យថ្លៃ ជួលការិយាល័យ និងការកាន់កាប់ស្ថិតនៅក្រោមសម្ពាធ លុះត្រាតែតម្រូវការកើនឡើង (ឧទាហរណ៍ ពីការវិនិយោគបរទេសកាន់តែច្រើន ឬក្រុមហ៊ុនថ្មី)។
ការលក់រាយទំនងជាត្រូវការការសម្របខ្លួន (ការប្រើប្រាស់ចម្រុះ អាហារ និងភេសជ្ជៈ និងការសង្កត់ធ្ងន់លើការកម្សាន្ត) ដើម្បីស្រូបយកការផ្គត់ផ្គង់លើស។
ចំណែកសណ្ឋាគារ និងបដិសណ្ឋារកិច្ច ការងើបឡើងវិញយឺត អាស្រ័យលើទេសចរណ៍ និងកត្តាម៉ាក្រូសេដ្ឋកិច្ច។
ការផ្គត់ផ្គង់សណ្ឋាគារថ្មីអាចបន្ត ប៉ុន្តែការកាន់កាប់ និងប្រាក់ចំណូលនឹងអាស្រ័យលើកត្តាខាងក្រៅ ព្រោះការងើបឡើងវិញនៃទេសចរណ៍ អាស្រ័យលើស្ថិរភាពតំបន់ សេដ្ឋកិច្ចពិភពលោក។
សារៈសំខាន់នៃហានិភ័យម៉ាក្រូសេដ្ឋកិច្ច ក៏ជាអ្វីដែលអ្នកវិនិយោគ និងអ្នកអភិវឌ្ឍន៍ត្រូវសម្លឹងមើល គោលនយោបាយពាណិជ្ជកម្មសកល ភាពតានតឹងក្នុងតំបន់ សម្ពាធរូបិយប័ណ្ណ/អតិផរណា និងផលប៉ះពាល់សេដ្ឋកិច្ចខាងក្រៅ នៅតែជាហានិភ័យចម្បងសម្រាប់ការងើបឡើងវិញនៃអចលនទ្រព្យ និងទំនុកចិត្តរបស់វិនិយោគិន៕
