ដោយៈ ម៉ាលីនណា
ភ្នំពេញៈ ក្រុមមន្រ្តីជាន់ខ្ពស់រដ្ឋាភិបាលបាន បានចូលរួមកិច្ចប្រជុំពិភាក្សា “វឌ្ឍនភាព និងបញ្ហាប្រឈមនៃការអនុវត្ត គម្រោងផ្លូវល្បឿនលឿនភ្នំពេញ-ក្រុងបាវិត”។
កិច្ចប្រជុំនេះធ្វើឡើងក្រោមអធិបតីភាព លោកបណ្ឌិតអូន ព័ន្ឋមុនីរ័ត្នឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ លោកស៊ុន ចាន់ថុល អនុប្រធានទី១នៃក្រុមប្រឹក្សាអភិវឌ្ឍន៍កម្ពុជា លោកប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូននិងក្រុមមន្រ្តីពាក់ព័ន្ឋ។
កិច្ចប្រជុំនេះមានគោលបំណងដើម្បីពិនិត្យ និងពិភាក្សាអំពីវឌ្ឍនភាព និងបញ្ហាប្រឈមនៃការអនុវត្ត គម្រោងផ្លូវល្បឿនលឿនភ្នំពេញ-ក្រុងបាវិត ដើម្បីជំរុញការអនុវត្តគម្រោងប្រកប ដោយប្រសិទ្ធភាពខ្ពស់។
អ្នកនាំពាក្យក្រសួងសាធារណការ និងដឹកជញ្ជូន លោកផន រឹមបានមានប្រសាសន៍ឲ្យដឹងនាព្រឹកថ្ងៃទី២០ ធ្នូនេះថា គំរោងផ្លូវនេះបាននិងកំពុងដំណើរការសាងសង់ជាធម្មតា មិនមានការពន្យាពេលណាមូយឡើយ ហើយកិច្ចប្រជុំនេះ ជាការតាមដានវឌ្ឍនភាពនៃគំរោងនេះ ដើម្បីធ្វើយ៉ាងណាឲ្យដំណើរការស្ថាបនាផ្លូវនេះ បានរលូននិងស្របតាមផែនការ។
លោកបន្តថា “យើងកំពុងដោះស្រាយនិតិវិធីមួយចំនួន ជាមួយភាគីចិន ដើម្បីជម្រុញការងារនេះបានដំណើរការលឿន និងឆាប់រហ័ស”៕
