ដោយៈ គង់ សូរិយា
ភ្នំពេញៈ ក្រុមមន្រ្តីកំពុងពិចារណា ផ្លាស់ប្តូរទីតាំងប្រវត្តិសាស្ត្រទំហំ៣៨៦ហិកតានេះ ទៅជាការប្រើប្រាស់សាធារណៈជាច្រើនប្រភេទ រួមទាំងការអភិវឌ្ឍឧទ្យានទីក្រុងធំមួយ សារមន្ទីរអាកាសចរណ៍ ដែលរំលឹកដល់ស្នាព្រះហត្ថរបស់ព្រះបាទនរោត្តមសីហនុ និងការរក្សាផ្លូវរត់សម្រាប់ការចុះចតបន្ទាន់ ឬសម្រាប់យោធា។
រដ្ឋាភិបាលកម្ពុជាបានចាត់វិធានការធានាអនាគត នៃអាកាសយានដ្ឋានអន្តរជាតិភ្នំពេញ ចាស់នៅពោធិ៍ចិនតុង ដែលបង្ហាញពីការប្តេជ្ញាចិត្តយ៉ាងមុតមាំរបស់ខ្លួន ក្នុងការថែរក្សាទីតាំងប្រវត្តិសាស្ត្រនេះជាទ្រព្យសម្បត្តិសាធារណៈដ៏សំខាន់ ជាជាងសម្រាប់ការអភិវឌ្ឍឯកជន។
-->
ក្រុមការងារអន្តរក្រសួង ដឹកនាំដោយលោក ឈាង វណ្ណារិទ្ធ រដ្ឋលេខាធិការនៃទីស្តីការគណៈរដ្ឋមន្ត្រី ត្រូវបានបង្កើតឡើងថ្មីៗនេះ ដើម្បីសិក្សាអំពីការគ្រប់គ្រងរយៈពេលវែង និងការប្រើប្រាស់នាពេលអនាគតនៃអចលនទ្រព្យទំហំ៣៨៦ហិកតា បន្ទាប់ពីការផ្ទេរប្រតិបត្តិការអាកាសចរណ៍ពេញលេញ ទៅកាន់អាកាសយានដ្ឋានអន្តរជាតិតេជោដែលទើបសាងសង់ថ្មី ដែលមានតម្លៃចំនួន២,៣ ពាន់លានដុល្លារ។
លោកបញ្ជាក់ថា “ការសម្រេចចិត្តនេះ ធ្វើឡើងដោយលោកសម្តេចធិបតីហ៊ុន ម៉ាណែត បានប្រមូលផ្តុំមន្ត្រីជាន់ខ្ពស់មកពីអាកាសចរណ៍ស៊ីវិល ផែនការសេដ្ឋកិច្ច ការអភិវឌ្ឍទីក្រុង និងវិស័យពាក់ព័ន្ធផ្សេងទៀតនៅក្នុងគណៈកម្មាធិការ ដើម្បីបង្កើតផែនការដ៏ទូលំទូលាយមួយ ដែលមានតុល្យភាពរវាងផលប្រយោជន៍សាធារណៈ និរន្តរភាពហិរញ្ញវត្ថុ និងការអភិរក្សប្រវត្តិសាស្ត្រ”។
យោងតាមរដ្ឋាភិបាល សម្តេចធិបតីនាយករដ្ឋមន្ត្រីបានបញ្ជាក់យ៉ាងច្បាស់ថា ទីតាំងនេះមិនមែនសម្រាប់លក់ទេ។ ផ្ទុយទៅវិញ អាជ្ញាធរកំពុងពិចារណា លើការប្រើប្រាស់ដែលផ្តោតលើសាធារណជន រួមទាំងការអភិវឌ្ឍឧទ្យានទីក្រុងដ៏ធំមួយ សារមន្ទីរអាកាសចរណ៍ដែលរំលឹកដល់ស្នាព្រះហត្ថ របស់ព្រះបាទសម្តេចព្រះនរោត្តម សីហនុ ក្នុងការកសាងប្រទេសជាតិ និងការរក្សាផ្លូវរត់សម្រាប់ការចុះចតបន្ទាន់ ឬសម្រាប់យោធា ដែលមានបំណងថែរក្សាតម្លៃ យុទ្ធសាស្ត្ររបស់ទីតាំងនេះ ខណៈដែលកំពុងប្រែក្លាយវា ទៅជាទីតាំងសម្រាប់សាធារណៈ និងវប្បធម៌។
ក្រុមការងារក៏នឹងសិក្សាពីគំរូភាពជាដៃគូរវាងរដ្ឋ និងឯកជនដើម្បីគាំទ្រដល់ការថែទាំ និងប្រតិបត្តិការ។ ការប៉ាន់ប្រមាណបច្ចុប្បន្នកំណត់ថ្លៃថែទាំប្រចាំឆ្នាំមានប្រហែល៣លានដុល្លារ ហើយមន្ត្រីបានបង្ហាញថា សកម្មភាពសេដ្ឋកិច្ច ដែលបានគ្រោងទុកនៅក្នុងទីតាំងនេះ អាចជួយទូទាត់ការចំណាយ ដោយមិនធ្វើឱ្យប៉ះពាល់ ដល់ការចូលប្រើប្រាស់សាធារណៈ ឬសន្តិសុខ។
គោលគំនិតដែលបានស្នើឡើងរួមមាន កន្លែងបៃតង កន្លែងវប្បធម៌ និងតំបន់ពាណិជ្ជកម្មមានកំណត់ ដែលត្រូវបានរចនាឡើងដើម្បីបង្កើនគុណភាពជីវិត សម្រាប់អ្នកស្រុកនៅខណ្ឌពោធិ៍សែនជ័យ និងរាជធានីភ្នំពេញ។
ការបង្កើតក្រុមការងារនេះ មានរយៈពេលជាច្រើនខែបន្ទាប់ពីជើងហោះហើរអន្តរជាតិ និងក្នុងស្រុកទាំងអស់ ត្រូវបានផ្លាស់ប្តូរទីតាំងទៅកាន់អាកាសយានដ្ឋានអន្តរជាតិតេជោ ដែលទើបសម្ពោធក្នុងខែកញ្ញា ឆ្នាំ២០២៥។
ខណៈដែលការផ្លាស់ប្តូរនេះ បានសម្គាល់ព្រឹត្តិការណ៍ដ៏សំខាន់មួយ នៅក្នុងការធ្វើទំនើបកម្មអាកាសចរណ៍របស់កម្ពុជា វាក៏បានលើកឡើងនូវសំណួរអំពីអនាគត នៃអាកាសយានដ្ឋានចាស់ ដែលអស់រយៈពេលជាច្រើនទសវត្សរ៍មកហើយ បានបម្រើជាច្រកទ្វារចម្បងរបស់ប្រទេសទៅកាន់ពិភពលោក។
ត្រូវបានបើកនៅពាក់កណ្តាលទសវត្សរ៍ឆ្នាំ១៩៥០ ក្រោមការដឹកនាំរបស់អតីតព្រះមហាក្សត្រ នរោត្តម សីហនុ អាកាសយានដ្ឋានពោធិ៍ចិនតុងបានដើរតួនាទីយ៉ាងសំខាន់ ក្នុងការអភិវឌ្ឍក្រោយឯករាជ្យរបស់កម្ពុជា។
វាបានឃើញពីពេលវេលាសំខាន់ៗ នៅក្នុងប្រវត្តិសាស្ត្រសម័យទំនើបរបស់ប្រទេស រួមទាំងភាពចលាចលនៃសម័យសង្គ្រាមស៊ីវិល សម័យខ្មែរក្រហម និងការបើកឡើងវិញបន្តិចម្តងៗ នៃប្រទេសកម្ពុជាចំពោះការធ្វើដំណើរអន្តរជាតិ នៅក្នុងទសវត្សរ៍ឆ្នាំ១៩៩០។
សម្រាប់ប្រជាជនកម្ពុជាជាច្រើន អាកាសយានដ្ឋាននៅតែជានិមិត្តរូបដ៏មានឥទ្ធិពលនៃភាពធន់ និងការស្តាឡើងវិញរបស់ជាតិ។
អ្នករៀបចំផែនការទីក្រុងបានអោយដឹងថា គំនិតផ្តួចផ្តើមនេះតំណាងឱ្យការសាកល្បងដ៏សំខាន់មួយ អំពីរបៀបដែលកម្ពុជាគ្រប់គ្រងហេដ្ឋារចនាសម្ព័ន្ធចាស់ៗ ស្របពេលមានកំណើនទីក្រុងយ៉ាងឆាប់រហ័ស។
ជាមួយនឹងប្រវត្តិសាស្ត្រជិត៧០ឆ្នាំរបស់ផ្លូវរត់ និងស្ថានីយរបស់ខ្លួន ការផ្លាស់ប្តូរ”ពោធិ៍ចិនតុង”ត្រូវបានគេរំពឹងថា នឹងកំណត់គំរូដ៏សំខាន់មួយ សម្រាប់ការអភិវឌ្ឍប្រកប ដោយចីរភាពនៅក្នុងរាជធានី។
លទ្ធផលនៃការសិក្សាអន្តរក្រសួង នឹងណែនាំដល់ការបង្កើតទីតាំងសម្គាល់សាធារណៈថ្មីមួយ ដោយផ្លាស់ប្តូររូបរាងមជ្ឈមណ្ឌលដឹកជញ្ជូននេះ ទៅជាកន្លែងសម្រាប់សហគមន៍ ការចងចាំ និងមោទនភាពជាតិ៕
