ដោយៈ គង់ សូរិយា
ភ្នំពេញៈ អគ្គនាយកក្រុមហ៊ុនCPL Cambodia លោកឧកញ៉ាចេង ខេង បានបង្ហើបពីស្ថានភាពទីផ្សារដីធ្លី ដែលកំពុងមានតម្រូវការនាពេលបច្ចុប្បន្ននេះ។
លោកឧកញ៉ាបានមានប្រសាសន៍ឲ្យដឹង តាមបណ្តាញតេឡេក្រាមកាលពីព្រឹកថ្ងៃទី៩ មិនាកន្លងមកថា ទីផ្សារដីធ្លីដែលកំពុងមានតម្រូវការបច្ចុប្បន្នភាពច្រើន ជាដីសម្រាប់សាងសង់គំរោងឧស្សាហកម្ម និងដីកសិកម្ម ដែលលោកបាននិងកំពុងមានភ្ញៀវនៅក្នុងដៃ។
លោកបន្តថា “នៅព្រឹកនេះ ខ្ញុំកំពុងធ្វើការជាមួយអ្នកវិនិយោគ ដែលពួកគាត់មានតម្រូវការដី សម្រាប់សាងសង់តំបន់ឧស្សាហកម្ម”។
វិស័យឧស្សាហកម្មកម្ពុជា នៅតែមានកំណើនរឹងមាំសម្រាប់ឆ្នាំ២០២៦នេះ ជាមួយនឹងកំណើនព្យាករណ៍កម្ពុជា នឹងសម្រេចបានក្នុងរង្វង់៨ភាគរយ។
វិស័យឧស្សាហកម្មកម្ពុជាបាន និងកំពុងក្លាយជាផលិតផលនាំចេញធំជាងគេរបស់កម្ពុជា រួមមានសម្លៀកបំពាក់ កាបូបធ្វើដំណើរ កង់ ស្បែកជើង និងសម្ភារៈចាំបាច់ដទៃទៀត។ លើសពីនេះអនុវិស័យកម្មន្តសាល ក៏មានការរីកចម្រើនខ្ពស់ ដោយកម្ពុជាមានរោងចក្រដំឡើងរថយន្ត ម៉ូតូ កាន់តែច្រើនផងដែរ។
ជាមួយនឹងភាពមិនប្រាកដប្រជា នៃទីផ្សារអចលនវត្ថុកម្ពុជា លោកឧកញ៉ាសន សៀប ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានបង្ហាញសុទិដ្ឋិនិយម ដោយប្រយ័ត្នប្រយែងផងដែរ ដោយលោកលើកឡើងថា ទីផ្សារកំពុងមានឱកាសរីកចម្រើនខ្លះៗ ប៉ុន្តែកំពុងប្រឈមមុខនឹងការលំបាកនៅឡើយ៕
