ដោយ៖ សហការី
ភ្នំពេញ៖ ឧកញ៉ា សាស្ត្រាចារ្យ សមូហកបណ្ឌិត ឡី សុភាព ប្រធានសមាគមសម្ព័ន្ធភាពអង្គការសមាគម និងវិស័យឯកជននៅកម្ពុជា និងជានាយកវិទ្យាស្ថានអាជីវកម្មអន្តរជាតិ បានថ្លែងជម្រុញបែបនេះ ក្នុងឱកាសប្រគល់វិញ្ញាបនបត្រវិជ្ជាជីវៈ ជូនដល់សិក្ខាកាម ជ័យលាភី នៃវិទ្យាស្ថានអាជីវកម្មអន្តរជាតិIBI ជាង៦០នាក់ ក្នុងនោះ ក៏មានសាស្ត្រាចារ្យបណ្ឌិតចំនួន២នាក់ និងទីប្រឹក្សា ពានរង្វាន់បុគ្គល ដែលមានស្នាដៃឆ្នើម ផ្នែកអាជីវកម្ម និងការវិនិយោគ នៃវិទ្យាស្ថានអាជីវកម្មអន្តរជាតិផងដែរ។
ឧកញ៉ា សមូហកបណ្ឌិត ឡី សុភាព ថ្លែងថា៖«ការទទួលបានវិញ្ញាបនបត្រនាឱកាសនេះ មិនមែនជារឿងចៃដន្យនោះទេ តែបានកើតឡើង ពីការខិតខំប្រឹងប្រែង របស់ជ័យលាភីម្នាក់ៗ ហើយក៏ជាមោទនភាព របស់ក្រុមគ្រួសារ របស់ពួកគេ ពិសេសសម្រាប់សង្គមជាតិ ដែលបានបណ្ដុះបណ្ដាលធនធានមនុស្ស ជាបន្តបន្ទាប់ ដើម្បីរួមគិត រួមអភិវឌ្ឍប្រទេសជាតិ ឲ្យមានអ្នកចេះដឹង កាន់តែច្រើនឡើងបន្ថែមទៀត»។
ឧកញ៉ា សាស្ត្រាចារ្យ សមូហកបណ្ឌិត ឡី សុភាព បានចាត់ទុក អ្នកទាំងនេះ គឺជាគ្រាប់ពូជដ៏ធំ និងជាកោសិការជាតិ ដ៏មានសារះសំខាន់ ដូច្នេះសូមពង្រឹងនូវអំណាចវិជ្ជាជីវះនេះអោយបានល្អ និងត្រូវប្រើប្រាស់វាប្រកប ដោយគុណធម៌ និងសីលធម៌អោយបានល្អ កុំអោយខុសវិជ្ជាជីវះនិងគ្មានជំនាញ និងអត់បទពិសោធ ..កុំធ្វើអោយអន្តរាយដល់ការងារដែលយើងកំពុងធ្វើ បានន័យថា ការងារកំពុងធ្វើកុំភ្លេចវា..ត្រូវស្មោះត្រង់ ការតូច និងការធំ ..ត្រូវចេះរៀបចំខ្លួន អោយមានរបៀបរបបនៃការស្លៀកពាក់ និងការរស់នៅ ដែលមានសារះសំខាន់ បំផុត សំរាប់មនុស្សយើងម្នាក់ៗ ហើយត្រូវមាន (សច្ចះ ខន្តី កត្តញូតា) និងសូមរក្សាចាស់ បង្កើតថ្មី ។
ក្នុងពិធីនោះដែរ ដោយសំដៅទៅលើពាក្យថាបណ្ឌិត និងសាស្ត្រាចារ្យបណ្ឌិត , ឧកញ៉ា សមូហកបណ្ឌិត ឡីសុភាព បានពន្យល់ថា បណ្ឌិត៖ គឺជាអ្នកមានបញ្ញា ជាអ្នកប្រព្រឹត្តល្អ និងជាអ្នកកាន់សុច្ចរិត ១០ ប្រការ ឬដោយពិស្ដារគឺកាន់សុច្ចរិត ៤០ ប្រការ ដោយខ្ជាប់ខ្ជួនម៉ឺងម៉ាត់ជានិច្ច។ ដោយឡែក សាស្ត្រាចារ្យ៖ គឺជាអ្នកដែលមាន ចំណេះដឹងខ្ពង់ខ្ពស់ ទាំងការសិក្សាស្រាវជ្រាវ បទពិសោធន៍ជាច្រើនឆ្នាំ និងមានកិរិយាមារយាទប្រពៃ។ បច្ចុប្បន្ន នៅកម្ពុជា មានសាស្ត្រាចារ្យច្រើនច្រើន និងតាមផ្នែកផ្សេងៗគ្នា ដែលអ្នកទាំងនោះ សុទ្ធតែពោរពេញទៅដោយគុណវុឌ្ឍិ សមត្ថភាព ពុទ្ធិ និងក្រមសីលធម៌។
សូមជំរាបថា វិទ្យាស្ថានអាជីវកម្មអន្តរជាតិ គឺជាថ្នាលបណ្ដុះបណ្ដាលធនធានមនុស្សដ៏សំខាន់ ហើយបើគិតរហូតមកដល់ពេលនេះ មានជ័យលាភីជាច្រើន ចាប់តាំងពីសិក្ខាកាម រហូត ដល់ថ្នាក់បណ្ឌិត និងសាស្ត្រាចារ្យបណ្ឌិត បានបញ្ចប់វគ្គបណ្ដុះបណ្ដាល លើជំនាញផ្សេងៗគ្នា ពីវិទ្យាស្ថានអាជីវកម្មអន្តរជាតិនេះ ហើយជ័យលាភីខ្លះ ក៏បានឈានទៅពង្រីកអាជីវកម្មរបស់ខ្លួនជាបន្តបន្ទាប់ផងដែរ៕
