ដោយៈ គង់ សូរិយា
ភ្នំពេញៈ អ្នកជំនាញបានលើកឡើងថា ដីនៅជុំវិញទីក្រុងភ្នំពេញនៅតែអាចជាការវិនិយោគដ៏ល្អ ប៉ុន្តែអ្នកវិភាគជាទូទៅមិនណែនាំឱ្យទិញដីណាមួយ ហើយរង់ចាំតម្លៃកើនឡើងនោះទេ។
ទីផ្សារបានក្លាយជាជម្រើសច្រើនជាងមុន ចាប់តាំងពីការរីកចម្រើនមុនឆ្នាំ២០២០។ ទីតាំង ហេដ្ឋារចនាសម្ព័ន្ធ និងតម្រូវការអ្នកប្រើប្រាស់ចុងក្រោយឥឡូវនេះ មានសារៈសំខាន់ជាងការរំពឹងទុក។
ក្រុមហ៊ុនKnight Frank Cambodia កត់សម្គាល់ថា ឱកាសដីធ្លីនៅតែខ្លាំងបំផុត នៅក្នុងច្រករបៀងកំណើន ដែលគាំទ្រដោយហេដ្ឋារចនាសម្ព័ន្ធ ភស្តុភារកម្ម ឧស្សាហកម្ម និងការពង្រីកទីក្រុងជាជាងតំបន់ដែលមានលក្ខណៈស្មានទុក។
ជាមួយគ្នានេះ ក្រុមហ៊ុនIPS Cambodia រាយការណ៍ថាតម្លៃដីនៅរាជធានីភ្នំពេញជាទូទៅ មានស្ថេរភាពជាជាងការកើនឡើង ដោយមានភាពខុសគ្នាគួរឱ្យកត់សម្គាល់រវាងស្រុក។
ចំណែកអ្នកជំនាញមកពី APS (Advantage Property Services) បាននិយាយថា អ្នកទិញកំពុងផ្តោតការយកចិត្តទុកដាក់កាន់តែខ្លាំងឡើងលើតម្លៃសមរម្យ ទីតាំងដែលមានគុណភាព និងតម្រូវការពិតប្រាកដ ដែលឆ្លុះបញ្ចាំងពីទីផ្សារដែលមានវិន័យកាន់តែច្រើន។
តើតំបន់ណា ដែលវិនិយោគិនជាច្រើនមើល? អ្នកជំនាញបានចង្អុលបង្ហាញតំបន់មួយចំនូនដូចជា ខ័ណ្ឌសែនសុខ ជាតំបន់មានតម្រូវការលំនៅដ្ឋានខ្លាំង។ ការពង្រីកហាងលក់រាយ សាលារៀន និងលំនៅដ្ឋានសម្រាប់អ្នកមានចំណូលមធ្យម។
តំបន់នៅក្នុងខ័ណ្ឌនេះ ត្រូវបានចាត់ទុកថា “ជាតំបន់កំណើនជាយក្រុងដែលមានភាពចាស់ទុំជាង”។
ខ័ណ្ឌឬស្សីកែវ ជាតំបន់ទទួលបានអត្ថប្រយោជន៍ ពីការពង្រីកភាគខាងជើងនៃទីក្រុងភ្នំពេញ។ ការកែលម្អហេដ្ឋារចនាសម្ព័ន្ធ និងគម្រោងលំនៅដ្ឋានថ្មីៗគាំទ្រដល់តម្រូវការ។
ចំណែកខ័ណ្ឌច្បារអំពៅ ជាតំបន់មានការតភ្ជាប់ប្រសើរឡើងទៅកាន់កណ្តាលទីក្រុងភ្នំពេញ ដែលសកម្មភាពអភិវឌ្ឍន៍លំនៅដ្ឋាន និងពាណិជ្ជកម្មកំពុងកើនឡើង។
ជាមួយគ្នានេះ អ្នកជំនាញបានលើកឡើងពី អ្វីដែលអ្នកវិនិយោគ គួរប្រុងប្រយ័ត្នផងដែរ។
អ្នកសង្កេតការណ៍ទីផ្សារជាច្រើនជឿថា ប្រាក់ចំណេញងាយស្រួលបំផុត ពីការរំពឹងទុកដីធ្លីបានកន្លងផុតទៅហើយ។ តំបន់ដែលគ្មានគម្រោងហេដ្ឋារចនាសម្ព័ន្ធច្បាស់លាស់ ការអភិវឌ្ឍឧស្សាហកម្ម ឬកំណើនប្រជាជន អាចនៅទ្រឹងអស់រយៈពេលជាច្រើនឆ្នាំ។
អ្នកជំនាញបានលើកឡើងថា “ទីផ្សារកំពុងផ្តល់រង្វាន់ដល់ទីតាំងដែលមានតម្រូវការពិតប្រាកដ ជាជាងគ្រាន់តែ “កាន់កាប់ដី ហើយរង់ចាំ”៕
