ដោយ: សហសេវិក
អន្តរជាតិ: ការលក់ផ្ទះប្រណីតនៅក្នុងទីក្រុងធំៗរបស់ប្រទេសចិនកំពុងកើនឡើង ខណៈដែលអ្នកមាន ជាពិសេសអ្នកដែលទទួលបានអត្ថប្រយោជន៍ពីការរីកចម្រើននៃបច្ចេកវិទ្យា ចំណាយប្រាក់រាប់ពាន់លានយ័នលើការទិញផ្ទះថ្លៃៗ។
ការណ៍នេះបានបង្កើនក្តីសង្ឃឹមថា ការធ្លាក់ចុះនៃវិស័យអចលនទ្រព្យរយៈពេល៦ឆ្នាំកន្លងមករបស់ប្រទេសចិនអាចនឹងបញ្ចប់។ ទោះជាយ៉ាងណា ក្រុមអ្នកវិភាគអះអាងថា ផ្ទះប្រណីតបង្កើតបានត្រឹមតែផ្នែកតូចមួយនៃទីផ្សារទាំងមូល។
ដូច្នេះ កំណើននៃការលក់កាន់តែខ្លាំងនៅក្នុងផ្នែកលំនៅឋានប្រណីតនេះមិនគ្រប់គ្រាន់ដើម្បីជំរុញឱ្យទីផ្សារលំនៅឋានទាំងមូលក្នុងប្រទេសចិនស្ទុះងើបឡើងវិញយ៉ាងពេញលេញនោះទេ។
អ្នកទិញភាគច្រើនដែលមានប្រាក់ចំណូលមធ្យម និងប្រាក់ចំណូលទាបនៅតែមានការប្រុងប្រយ័ត្ន ដោយសារភាពមិនប្រាកដប្រជាផ្នែកសេដ្ឋកិច្ច និងការព្រួយបារម្ភអំពីប្រាក់ចំណូលរបស់ពួកគេ។
វិបត្តិអចលនទ្រព្យរបស់ប្រទេសចិនបានចាប់ផ្តើម បន្ទាប់ពីច្បាប់រឹតបន្តឹងការផ្តល់ប្រាក់កម្ចីដល់អ្នកអភិវឌ្ឍន៍ត្រូវបានដាក់ចេញនៅឆ្នាំ ២០២០ និងការខកខានសងប្រាក់កម្ចីរបស់អ្នកអភិវឌ្ឍន៍ធំៗដូចជាក្រុមហ៊ុន China Evergrande ចាប់ពីឆ្នាំ២០២១។
ទិន្នន័យថ្មីៗបង្ហាញថា ផ្ទះថ្មីចំនួន ១៨.០០០ ខ្នងដែលមានតម្លៃយ៉ាងហោចណាស់ ១០ លានយ័ន (១,៤៨ លានដុល្លារអាមេរិក) ត្រូវបានលក់ចេញនៅក្នុងទីក្រុងធំៗចំនួន ៣៥ ក្នុងឆមាសទីមួយនៃឆ្នាំ ២០២៦ ធ្លាក់ចុះ ១៣% ធៀបនឹងរយៈពេលដូចគ្នាកាលពីឆ្នាំមុន។
ទោះជាយ៉ាងណា ការលក់ផ្ទះប្រណីតដែលមានតម្លៃចន្លោះពី៣០លានទៅ៥០លានយ័នបានហក់ឡើង៣៨ភាគរយ ដែលបង្ហាញពីភាពរឹងមាំនៃតម្រូវការក្នុងចំណោមអ្នកទិញដែលមានទ្រព្យសម្បត្តិស្តុកស្តម្ភ៕
