ដោយ: សហសេចិក
អន្តរជាតិ: ទីផ្សារអចលនទ្រព្យរបស់ទីក្រុងគូឡាឡាំពួរនៃប្រទេសម៉ាឡេសុីសម្រេចបានកំណើននៃការលក់ផ្ទះប្រណីតនៅក្នុងឆមាសទីមួយ ឆ្នាំ២០២៦។ ការណ៍នេះបានជំរុញឱ្យតម្លៃផ្ទះជាមធ្យមរបស់ទីក្រុងហក់ឡើង ៥២ភាគរយដល់ចំនួន១,២លានរីងហ្គីត។
តម្រូវការលំនៅឋានប្រណីតមានភាពរឹងមាំ។ ការលក់ផ្ទះដែលមានតម្លៃ ៤ លានរីងហ្គីត ឬច្រើនជាងនេះបានហក់ឡើង៥០ភាគរយក្នុងឆមាសទី១ បើធៀបនឹងឆ្នាំមុន។ ការកើនឡើងនេះបានជំរុញឱ្យតម្លៃផ្ទះជាមធ្យមរបស់ទីក្រុងគូឡាឡាំពួរកើនឡើងយ៉ាងគំហុក។
ទីផ្សារអចលនទ្រព្យរបស់ប្រទេសម៉ាឡេស៊ីត្រូវបានគេរំពឹងថា នឹងនៅតែមានភាពរឹងមាំនៅក្នុងឆមាសទីពីរ ដែលគាំទ្រដោយកំណើនសេដ្ឋកិច្ច អត្រាការប្រាក់ និងលក្ខខណ្ឌហិរញ្ញប្បទានមានស្ថេរភាព ការចំណាយគ្រួសាររឹងមាំ ទីផ្សារការងារមានស្ថេរភាព និងកំណើននៃតម្រូវការនៅក្នុងទីក្រុង Johor។
សេដ្ឋកិច្ចរបស់ប្រទេសម៉ាឡេស៊ីបានកើនឡើង៦ភាគរយ នៅក្នុងត្រីមាសទី២ ឆ្នាំនេះ កើនឡើងពី៥,៤% នៅក្នុងត្រីមាសទី១។ កំណើនសេដ្ឋកិច្ចម៉ាឡេសុីនៅក្នុងឆមាសទីមួយ បានឈានដល់៥,៧ភាគរយបើធៀបទៅនឹងកំណើន៤,៥ភាគរយក្នុងអំឡុងពេលដូចគ្នាកាលពីឆ្នាំមុន។
អត្រាភាពគ្មានការងារធ្វើនៅតែមានកម្រិតទាបក្នុងរង្វង់៣ភាគរយនៅក្នុងខែមិថុនា ដែលគាំទ្រដល់អំណាចនៃការទិញរបស់គ្រួសារ និងតម្រូវការលំនៅឋាន។
ទីក្រុង Johor ត្រូវបានគេរំពឹងថានឹងក្លាយជាទីផ្សារអចលនទ្រព្យដ៏រឹងមាំបំផុតមួយរបស់ប្រទេសម៉ាឡេស៊ី ដោយសារវត្តមានតំបន់សេដ្ឋកិច្ចពិសេស Johor-Singapore (JS-SEZ) និងផ្លូវរថភ្លើងល្បឿនលឿន Johor Bahru–Singapore RTS Link៕
