ដោយ: សហសេវិក
អន្តរជាតិ: យោងតាមការស្ទង់មតិរបស់ Cushman & Wakefield បានឱ្យដឹងថា បណ្តាអ្នកវិនិយោគគ្រោងបណ្តាក់ទុនបន្ថែមទៀតទៅក្នុងទីផ្សារលំនៅឋានរបស់តំបន់អាស៊ីប៉ាស៊ីហ្វិក (APAC) ក្នុងរយៈពេល៥ឆ្នាំខាងមុខ ទោះបីជាមានភាពមិនប្រាកដប្រជាដែលបណ្តាលមកពីជម្លោះនៅមជ្ឈិមបូព៌ាក្តី។
ការស្ទង់មតិបានរកឃើញថា បណ្តាអ្នកវិនិយោគចំនួន ៨៥% គ្រោងបង្កើនការវិនិយោគរបស់ពួកគេ។ ដោយផ្អែកលើផែនការ ទឹកប្រាក់ប្រហែល ៣៣,២ ពាន់លានដុល្លារអាមេរិកអាចត្រូវបានវិនិយោគលើទីផ្សារលំនៅឋានរបស់តំបន់ APAC ក្នុងរយៈពេល៥ឆ្នាំខាងមុខ។
វិនិយោគិននៅតែមានទំនុកចិត្ត ពីព្រោះវិស័យនេះទទួលបានអត្ថប្រយោជន៍ពីតម្រូវការលំនៅឋានដ៏រឹងមាំ ប្រាក់ចំណូលពីការជួលដែលមានស្ថិរភាព និងកំណើនរយៈពេលវែង។
ចំនួនប្រមាណមួយភាគបីនៃវិនិយោគិនដែលមានផលប័ត្រអចលនទ្រព្យចម្រុះរំពឹងថា ផ្នែកលំនៅឋាននឹងគ្របដណ្តប់ជាង៣០ភាគរយនៃផលប័ត្ររបស់ពួកគេក្នុងរយៈពេល៥ឆ្នាំ។
ប្រទេសអូស្ត្រាលី និងនូវែលសេឡង់ គឺជាទីផ្សារដ៏ទាក់ទាញបំផុត ដោយសារប្រទេសអូស្ត្រាលីមានកង្វះខាតលំនៅដ្ឋាន និងតម្រូវការជួលខ្លាំង។ ជប៉ុនជាប់ចំណាត់ថ្នាក់លេខ២ ដោយសារភាពរឹងមាំនៃលំហូរសាច់ប្រាក់ងាយស្រួល។ ប្រទេសសិង្ហបុរី កូរ៉េខាងត្បូង និងហុងកុង បានដើរតាមពីក្រោយ។
ទោះជាយ៉ាងណា បញ្ហាប្រឈមចម្បងនៅតែជាការកំណត់តម្លៃអចលនទ្រព្យ។ បណ្តាវិនិយោគិនចំនួន៤៤ភាគរយបានអះអាងថា បញ្ហាធំបំផុតគឺគម្លាតរវាងអ្វីដែលអ្នកទិញមានឆន្ទៈក្នុងការចំណាយ និងអ្វីដែលអ្នកលក់រំពឹងទុក៕
