ដោយ: សហសេវិក
អន្តរជាតិ: ការលក់អាផាតមិនថ្មីនៅទីក្រុងហាណូយនៃប្រទេសវៀតណាមក្នុងត្រីមាសទី៣ មានត្រឹមតែ ៣១% ប៉ុណ្ណោះនៃចំនួនអាផាតមុិនសរុបដែលបានដាក់លក់ ខណៈកាលពីមួយឆ្នាំមុនតួលេខនេះមានកម្រិតពី ៧០% ទៅ ៨០%។
ស្ថានភាពនេះកើតឡើង ស្របពេលដែលតម្លៃលក់បានកើនឡើងហួសពីលទ្ធភាពរបស់អ្នកទិញ ហើយអត្រាការប្រាក់ក៏មានកម្រិតខ្ពស់ផងដែរ។
យោងតាមរបាយការណ៍ថ្មីមួយពីក្រុមហ៊ុនផ្តល់សេវាកម្មអចលនទ្រព្យ Avison Young តម្លៃអផាតមុិននៅលើទីផ្សារចម្បង (primary market) នៅតែបន្តកើនឡើង ដោយបានងើបឡើងពី ១,៥% ទៅ ២,៣% បើធៀបនឹងត្រីមាសមុន។ របាយការណ៍ដដែលបានបន្ថែមថា ល្បឿននៃការកើនឡើងតម្លៃនេះបានថយចុះចាប់តាំងពីចុងឆ្នាំ ២០២៥ មក។
អាផាតមុិនមានតម្លៃជាមធ្យមចំនួន៤.១៨០ ដុល្លារអាមេរិកក្នុងមួយម៉ែត្រការ៉េ។ ចំណែកឯនៅតាមតំបន់ទីក្រុងរណបទាំងនៅប៉ែកខាងកើត និងខាងលិចវិញ អាផាតមុិនលំដាប់ខ្ពស់ថ្មីៗមានតម្លៃចន្លោះពី ៣.៣០០ ដុល្លារ ទៅ ៤.៥០០ ដុល្លារក្នុងមួយម៉ែត្រការ៉េ។
តម្លៃអាផាតមុិននៅក្នុងតំបន់កណ្តាលក្រុង និងតំបន់ West Lake West មានភាពខុសគ្នាខ្លាំងជាង ដោយមានចន្លោះចាប់ពីប្រហែល ៥ ៥០០ ដុល្លារ ដល់ ៩ ៨០០ ដុល្លារ ក្នុងមួយម៉ែត្រការ៉េ៕
