ដោយ៖ ដែន ចែងចាំង
ភ្នំពេញ៖ សមាគមអ្នកវាយតម្លៃនិងភ្នាក់ងារអចលនវត្ថុកម្ពុជា បាននិងកំពុងរៀបចំវេទិកាសាធារណៈស្តីពី អត្ថប្រយោជន៍នៃការប្រើប្រាស់ក្រុមហ៊ុនអចលនទ្រព្យស្របច្បាប់ និងសិទ្ឋលក់អចលនទ្រព្យផ្តាច់មុខ។
វេទិកានេះកំពុងធ្វើនៅសណ្ឋាគារកាំបូឌីយ៉ាណា នាថ្ងៃទី២០ ធ្នូនេះ ដោយ មានការចូលរូមពីសមាជិកសមាគម និងអ្នកជំនាញមកពីវិស័យធនាគារ និងហិរញ្ញវត្ថុនានា និងមន្ត្រីពាក់ព័ន្ឋធ្វើការក្នុងវិស័យនេះផងដែរ។
ការរៀបចំវេទិកា មានកិច្ចពិភាក្សាដេញដោលពីវាគ្មិនជំនាញៗ ក្នុងវិស័យអចលវត្ថុ ដែលជាវិស័យមួយកំពុងក្លាយជាសរសរស្តម្ភយ៉ាងសំខាន់ ក្នុងការជំរុញសេដ្ឋកិច្ចជាតិ។
លោក គីម ហ៊ាង ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាធ្លាប់បានថ្លែងថា ការប្រើប្រាស់ក្រុមហ៊ុនអចលនទ្រព្យស្របច្បាប់ មានសារៈសំខាន់ណាស់ ដើម្បីផ្តល់ទំនុកចិត្តដល់ទីផ្សារ ក៏ដូចជា កាត់បន្ថយហានិភ័យដល់ប្រជាពលរដ្ឋ ក៏ដូចជាអ្នករកស៊ីក្នុងវិស័យនេះ ដោយសារក្រុមហ៊ុនស្របច្បាប់ធ្វើអ្វីតាមច្បាប់ ខុសពីក្រុមហ៊ុនឬភ្នាក់ងារមិនស្របច្បាប់ ដែលពួកគេមិនគោរពច្បាប់ មិនបង់ពន្ឋជូនរដ្ឋាភិបាល និងធ្វើឲ្យបាត់បង់ទំនុកចិត្តក្នុងវិស័យនេះ។
លោកបន្តថា “ការផ្តល់ការងារដល់ក្រុមហ៊ុនស្របច្បាប់ មិនត្រឹមតែជួយដល់ខ្លួនឯងនោះទេ តែក៏ជួយដល់សេដ្ឋកិច្ចសង្គមផងដែរ ពិសេសបានរួមចំណែកអភិវឌ្ឍប្រទេសជាមួយរដ្ឋាភិបាល។
ទាក់ទងនឹងការផ្តល់សិទ្ឋលក់ផ្តាច់មុខនៅកម្ពុជា មិនទាន់មានការអនុវត្តទូលំទូលាយនៅឡើយទេ។
អនុប្រធានសមាគមអ្នកវាយតម្លៃ និងភ្នាក់ងារអចលនវត្ថុលោកឃាង ពុទ្ឋីបានថ្លែងថា នៅកម្ពុជាម្ចាស់អចលនវត្ថុភាគច្រើន មិនចង់ផ្តល់សិទ្ឋផ្តាច់មុខលក់អចលនទ្រព្យរបស់ខ្លួន ដល់ក្រុមហ៊ុនណាមួយនោះទេ ខុសពីនៅប្រទេសអភិវឌ្ឍន៍នានា។ លោកបន្តថា នៅបរទេសពេលអ្នកអភិវឌ្ឍន៍ផ្តល់សិទ្ឋលក់ផ្តាច់មុខ ដល់ក្រុមហ៊ុនភ្នាក់ងារអចលនទ្រព្យណាមួយ ក៏ពួកគេផ្តល់កម្រៃជើងសារដល់ក្រុមហ៊ុនអចលនទ្រព្យ ដែលបានចុះកិច្ចសន្យាជាមួយពួកគេដែរ ទោះជាអតិថិជនទៅទិញគំរោងនោះ មិនបានឆ្លងកាត់ឬណែនាំពីក្រុមហ៊ុនភ្នាក់ងារអចលនទ្រព្យក្តី។
លោកបន្តថា ប៉ុន្តែនៅកម្ពុជា ម្ចាស់អចលនទ្រព្យភាគច្រើនពួកគេ មិនផ្តល់កម្ចីជើងសារដល់ក្រុមហ៊ុនអចលនទ្រព្យ ដែលពួកគេបានទទួលបានសិទ្ឋលក់ផ្តាច់មុខនោះទេ ក្នុងករណីអតិថិជនណាមួយ មិនបានទទួលការណែនាំពីភ្នាក់ងារក្រុមហ៊ុនអចលនទ្រព្យនោះ៕
