ដោយ៖ ដែន ចែងចាំង
ភ្នំពេញ៖ ខណៈវិស័យសំណង់ និងអចលនទ្រព្យកំពុងមានការរីកដុះដាលយ៉ាងឆាប់រហ័សនោះ គេក៏សង្កេតឃើញមានសំណង់អគារជាច្រើន កំពុងសាងសង់ឡើងមិនគោរពច្បាប់ផងដែរ។
យោងតាមរបាយការណ៍ពីសាលារាជធានីភ្នំពេញឲ្យដឹងថា បច្ចុប្បន្ននេះអគារដែលមានកម្ពស់ចាប់ពី៥ជាន់ឡើងទៅមានប្រមាណ៧០០អគារ និងកំពុងកើនឡើងបន្ថែមទៀត។
លោកស៊ា ឆៃលីន នាយកប្រតិបត្តិក្រុមហ៊ុនអចលនទ្រព្យស៊ីអិល រៀលធី បានថ្លែងឲ្យដឹងកាលពីពេលថ្មីៗនេះថា សំណង់ខុសច្បាប់ភាគច្រើនកើតឡើងពីការសង់បែបលំនៅឋានលក្ខណៈគ្រួសារ ដែលប្រជាពលរដ្ឋពួកគាត់មិនសូវយល់ដឹងពីច្បាប់នៃការសាងសង់។ ទោះជាយ៉ាងណាក្រៅពីប្រជាពលរដ្ឋសាងសង់លំនៅឋាន គ្មានលិខិតអនុញ្ញាត កន្លងមកគេក៏សង្កេតឃើញ មានគម្រោងសាងសង់ធំៗមួយចំនួនសង់សំណង់ អគារដោយគ្មានលិខិតអនុញ្ញាតផងដែរ ដោយសារតែពួកគេមានលុយ និងអំណាចហើយការសាងសង់នោះទៀតសោត អាចនឹងរំលោភដីយកសាធារណៈថែមទៀតផង។
ជាមួយគ្នានេះអគ្គនាយកក្រុមហ៊ុន Key Real Estate លោក សន សៀប បានអះអាងថា ការសាងសង់អគារ ឬលំនៅឋានដោយមិនមានលិខិតអនុញ្ញាតគឺបង្កជាហានិភ័យខ្លាំងណាស់សម្រាប់វិស័យនេះ ដែលធ្វើឲ្យខូចសោភណ្ឌភាពក្រុង សំណង់មិនមានគុណភាព ប៉ះពាល់សណ្តាប់ធ្នាប់ និងសម្បត្តិសាធារណៈ។
លោកបានបញ្ជាក់ថា“ស្ថាប័នជំនាញគួរតែមានវិធានការតឹងតែងទៅលើម្ចាស់សំណង់ដែលគ្មានច្បាប់ទាំងនោះ ដើម្បីធ្វើយ៉ាងណាឲ្យការអភិវឌ្ឍវិស័យសំណង់នៅកម្ពុជាមាននិរន្តភាព និងសោភ័ណភាព។
ជុំវិញនឹងបញ្ហាសាងសង់សំណង់អត់ច្បាប់នេះដែរ កន្លងមកមានបងប្អូនប្រជាពលរដ្ឋមួយចំនួនបានរអ៊ូរទាំថា បែបបទនៃការសុំច្បាប់អនុញ្ញាតមានលក្ខណៈស្មុគស្មាញ និងចំណាយពេលវេលាយូរ៕
