ដោយ ដួង ចន្ទ្រា
ភ្នំពេញ៖ ទោះបីជាការផ្គត់ផ្គង់លំនៅដ្ឋានបន្តកើនឡើងក្តី ប៉ុន្តែកំនើនប្រជាសាស្ត្រ នឹងជំរុញឲ្យទីផ្សារលំនៅដ្ឋាននៅតែមានតម្រូវការខ្ពស់ ដោយសារកំនើនប្រាក់ចំណូល និងយុវជនវ័យក្មេងចូលក្នុងវិស័យការងារបន្តកើនឡើង។
យោងតាមការសិក្សារបស់អង្គការអន្តរជាតិខាងការងារ (ILO) បានរកឃើញថា ក្នុងមួយឆ្នាំកំលាំងយុវជនត្រូវចូលក្នុងទីផ្សារការងារ មានចំនួន៣០ម៉ឺននាក់ក្នុងមួយឆ្នាំ។
រដ្ឋលេខាធិការក្រសួងដែនដី នគរូបនីយកម្មនិងសំណង់លោកប៉ែន សុផលបានថ្លែងឲ្យដឹងកាលពីពេលថ្មីៗនេះថា គិតចាប់ពីឆ្នាំ២០១៥ ដល់ឆ្នាំ២០៣០ខាងមុខ កម្ពុជាត្រូវការលំនៅដ្ឋានប្រមាណ៨០ម៉ឺនខ្នងបន្ថែមទៀត ដើម្បីឆ្លើយតបនឹងកំនើនប្រជាសាស្ត្រ និងរីកចំរើននៃសេដ្ឋកិច្ចសង្គម។
លោកបន្តថា “ជាមួយនឹងកំនើនសេដ្ឋកិច្ច នគរូបនីយកម្មក៏បានកើនឡើងយ៉ាងឆាប់រហ័ស ព្រោះតាមការសិក្សារបស់ក្រសួងអំពី ក្របខ័ណ្ឌយុទ្ឋសាស្ត្រអភិវឌ្ឍន៍ទីក្រុងនៅកម្ពុជាបានរកឃើញថា ចំនួនប្រជាជនរស់នៅរាជធានី ក្រុង និងទីប្រជុំជននៅឆ្នាំ២០១៤ មានចំនួន៤,៥លាននាក់ ស្មើនឹង២៧,១ភាគរយ និងបន្តកើនឡើងដល់៧,៩២លាននាក់នៅឆ្នាំ២០៣០ ស្មើនឹង៤៤ភាគរយនៃចំនួនប្រជាជនកម្ពុជាសរុប។
តាមទិន្នន័យនេះបានបង្ហាញឲ្យឃើញថា សម្រាប់រយៈពេល១៥ឆ្នាំ គិតចាប់ពីឆ្នាំ២០១៥ ដល់២០៣០ តម្រូវការលំនៅដ្ឋានសម្រាប់រាជធានី ក្រុង និងទីប្រជុំជនមានប្រមាណ៨០ម៉ឺនលំនៅដ្ឋាន ដែលគិតជាមធ្យមមានតម្រូវការប្រមាណ៥ម៉ឺនលំនៅដ្ឋានក្នុងមួយឆ្នាំ។
លោក ប៉ែន សុផល បានបន្តថា ឆ្លើយតបនឹងបញ្ហានេះក្រសួងបាន និងកំពុងសកម្មអនុវត្តន៍គោលនយោបាយជាតិស្តីពី ការរៀបចំដែនដី ក្នុងការកសាងផែនការរៀបចំដែនដីប្លង់គោល និងផែនការប្រើប្រាស់ដីគ្រប់កម្រិត និងគោលនយោបាយជាតិស្តីពីលំនៅដ្ឋាន ពិសេសលំនៅដ្ឋានដែលមានតំលៃសមរម្យជូនមន្ត្រីរាជការ កងកំលាំងប្រដាប់អាវុធ និងប្រជាពលរដ្ឋដែលមានប្រាក់ចំណូលមធ្យម ប្រាក់ចំណូលទាប និងជនងាយរងគ្រោះ ដើម្បីធានាការអភិវឌ្ឍប្រកបដោយចីរភាព និងសមធ៌ម៕
