អ្នកជំនាញ​អចលនទ្រព្យ​អះអាងថា បច្ចេកវិទ្យា​មាន​តួនាទី​សំខាន់​ក្នុង​វិស័យនេះ

0

ដោយ គង់ សូរិយា

ភ្នំពេញ៖ ក្រុម​អ្នកជំនាញ​វិស័យ​អចលនទ្រព្យ​នៃ​ក្រុមហ៊ុន Century21 បានលើកឡើង​ស្រដៀង​គ្នា​ថា បច្ចេកវិទ្យា​កាន់តែ​ដើរតួនាទី​សំខាន់ ក្នុងការ​ប្រាស្រ័យ​ទាក់ទង​គ្នា​រវាង​អ្នកផ្គង់ផ្គង់ និង​អ្នកត្រូវការ​ក្នុង​វិស័យ​អចលនទ្រព្យ។

អគ្គនាយក​ក្រុមហ៊ុន Century 21 Fortuna Investment លោក វ៉ា វីរៈ​ បានលើកឡើង​ក្នុង​ពិធី​ទទួល​ពានរង្វាន់ ដែល​បាន​ជូន​បណ្ដា​ការ​យា​ល័យ​របស់​ក្រុមហ៊ុន Century21  Cambodia នៅ​រសៀល​ថ្ងៃ​ម្សិល​ម៉ិ​ញ​នេះ​ថា បច្ចេកវិទ្យា​ត្រូវកា​ជា​ចាំបាច់​ក្នុង​ការទិញ ដូរ​លក់​រឺ​ជួល ក្នុង​វិស័យ​អចលនទ្រព្យ​ដោយ​វា​ចំណេញ​ទាំង​ពេលវេលា និង​ងាយស្រួល​ទៅដល់​អតិថិជន។

លោក​បន្តថា ការកើនឡើង​នូវ​ការទំនាក់ទំនង តាម​បណ្តាញ​បច្ចេកវិទ្យា កាន់​តែមាន​សារៈសំខាន់ ក្នុង​ការតភ្ជាប់​បណ្តាញ​ទំនាក់ទំនង ក៏ដូចជា​អាជីវកម្ម​ក្នុង​វិស័យនេះ។

លោក​ ហាក់ គីម​ថុង ប្រធាន​ទីផ្សារ Century 21 Dream Property ក៏​បញ្ជាក់​ដូចគ្នា​ផងដែរ​ថា បច្ចេកវិទ្យា​ពិតជា​សំខាន់ ក្នុង​ការធ្វើការងារ​លើ​វិស័យ​អចលនទ្រព្យ ជាពិសេស​សម្រាប់​ការផ្សព្វផ្សាយ​ឲ្យ​បាន​ទូលំទូលាយ ខណៈពេលដែល​កេរ​ត្តិ៍​ឈ្មោះ​របស់​ក្រុមហ៊ុន Century 21 មាន​ភាពល្បីល្បាញ និង​ផ្ដល់​ជា​ទំនុកចិត្ត​ខ្ពស់​ដល់​អតិថិជន។

ក្រុមហ៊ុន Century 21 ជា​ក្រុមហ៊ុន​អចលនទ្រព្យ​ផ្ដល់​សេវាកម្ម លក់ ជួល​អចលនទ្រព្យ​លំដាប់​ពិភពលោក ដែល​ត្រូវបាន​នាំចូល Master Franchise ពី​សហរដ្ឋអាមេរិក ដោយ​ក្រុមហ៊ុន VTRUST GROUP កាលពី​ឆ្នាំ២០១៤ ដោយ​ដាក់ឈ្មោះCentury21 Cambodia។ គិត​មកទល់ពេលនេះ Century21 Cambodia បាន​លក់​Franchise ដល់​ក្រុមហ៊ុន​ចំនួន១៤នៅ​កម្ពុជា ក្នុងនោះ១១ក្រុមហ៊ុន​មាន​ទីតាំង​ក្នុង​រាជធានី​ភ្នំពេញ និង​សាខា​ក្រុមហ៊ុន​មួយទៀត គឺ​ស្ថិតនៅ​ខេត្ត​ព្រះសីហនុ។ បន្ថែម​ពីនេះ ក្រុមហ៊ុន Century 21 Cambodia ក៏​នឹង​ពង្រីក​សាខា​ក្រុមហ៊ុន​អចលនទ្រព្យ​របស់ខ្លួន ទៅកាន់​បណ្ដា​ខេត្ត​ក្រុង​ទាំង ២៥ក្នុង​ឆ្នាំ ២០១៨ខាងមុខ​ផងដែរ។

អ្នកនាង Grace Rachny Fong នាយិកា​ប្រតិបត្តិ​នៃ​ក្រុមហ៊ុន Century21 Cambodia បាន​ថ្លែងថា ការផ្តល់​ពានរង្វាន់​នេះ ជាការ​លើកទឹកចិត្ត​ដល់​កិច្ចខិតខំ​ប្រឹងប្រែង​រប​ស់​ក្រុមហ៊ុន​នានា ដែល​បាន​បំពេញការងារ​យ៉ាង​ល្អ ក្នុង​វិស័យ​អចល​ទ្រព្យ​នៅ​កម្ពុជា។ ពានរង្វាន់​នេះ​ផ្តោត​សំខាន់​លើ​ការសម្រេចបាន​នូវ​ល​ទ្ឋ​ផល​គាប់ប្រសើរ​ចំនួន​បី គឺ Top Performance, Top Agent, និង Top Service។

បច្ចុប្បន្ន​ក្រុមហ៊ុន Century21 បាន​ពង្រីក​ទៅកាន់៧៩ប្រទេស មាន​ការិយាល័យ​សរុប៧២៥០ និង​មាន​ភ្នាក់ងារ​ចំនួន​ជាង១៣ម៉ឺន​នាក់ នៅ​ទូទាំង​ពិភពលោក៕

LEAVE A REPLY

Please enter your comment!
Please enter your name here