ក្រសួងពាណិជ្ជកម្ម បានផ្តល់សិទ្ធិបន្ថែមទៀតដល់អ្នកនាំចេញ និងផលិតករនៅកម្ពុជាក្នុងការស្នើសុំវិញ្ញាបនបត្របញ្ជាក់ប្រភពដើមទំនិញ ចាប់ពីថ្ងៃទី៦ ខែកញ្ញានេះទៅ។
ក្រសួងពាណិជ្ជកម្មបានចេញសេចក្តីជូនដំណឹងមួយស្តីពីការកែសម្រួលនិងកាត់បន្ថយដំណាក់កាលនៃការចេញវិញ្ញាបនបត្របញ្ជាក់ប្រភពដើមទំនិញគ្រប់ទម្រង់តាមប្រព័ន្ធស្វ័យប្រវត្តកម្មដល់ផលិតករ និងអ្នកនាំចេញ ដោយសម្រេចផ្តល់សិទ្ធបន្ថែមដល់ថ្នាក់នាយកដ្ឋាននាំចេញ-នាំចូល និងថ្នាក់អគ្គនាយកដ្ឋានសេវាកម្ម ក្នុងការពិនិត្យ និងអនុម័តការស្នើសុំវិញ្ញាបនបត្របញ្ជាក់ប្រភពដើមទំនិញ។
អ្នកនាំពាក្យក្រសួងពាណិជ្ជកម្ម កញ្ញា សឹង សុផារី បានថ្លែងថា ក្រសួងពាណិជ្ជកម្ម បានសម្រេចផ្តល់សិទ្ធបន្ថែម ស្នើសុំវិញ្ញាបនបត្របញ្ជាក់ប្រភពដើមទំនិញគ្រប់ទម្រង់តាមប្រព័ន្ធស្វ័យប្រវត្តិកម្មចាប់ពីថ្ងៃទី ៦ខែកញ្ញានេះទៅ ហើយក្នុងគោលបំណងសំខាន់ គឺដើម្បីសម្រួលដល់ការនាំចេញនាំចូលទំនិញពីកម្ពុជា ទៅក្រៅប្រទេស។ កញ្ញាអ្នកនាំពាក្យ បន្ថែមថា ថ្ងៃក្រោយនៅពេលដែលកម្ពុជាមានដៃគូពាណិជ្ជកម្មហើយបើសិនជាមានកិច្ចព្រមព្រៀងទៀតនោះនឹងសម្រួលដល់ការនាំចេញពីកម្ពុជាឲ្យកាន់តែងាយស្រួលបំផុត។
សម្រាប់ លោក ជាង បូរ៉ា អគ្គនាយក្រុមហ៊ុនរ៉ាគឹមឡុង បានថ្លែងថា បច្ចុប្បន្ននេះ ផលិតករកម្ពុជាមានច្រើន ហើយមិនបានយល់ពីបែបបទវិញ្ញាបនបត្របញ្ជាក់ប្រភពដើមទំនិញតាមប្រព័ន្ធស្វ័យប្រវត្តិកម្ម នៅឡើយទេ ហើយក្រសួងគួរតែមានការបើកឲ្យទូលាយថែមទៀតកុំឲ្យមានការពន្យាពេលបន្ថែម។ លោក បានបញ្ជាក់ទៀតថា កន្លងមកផលិតករ និងអ្នកនាំចេញជួបបញ្ហាច្រើន ហើយស្នើសុំឲ្យក្រសួងពាណិជ្ជកម្មកម្ពុជាបើកវគ្គបណ្តុះបណ្តាលឲ្យបានច្រើនបន្ថែមទៀត។
សេចក្តីជូនដំណឹងពីក្រសួងពាណិជ្ជកម្ម ឲ្យដឹងថា ការកែសម្រួល និងកាត់បន្ថយដំណាក់កាលនៃការចេញវិញ្ញាបនបត្របញ្ជាក់ប្រភពដើមទំនិញគ្រប់ទម្រង់តាមប្រព័ន្ធស្វ័យប្រវត្តកម្មដល់ផលិតករនិងអ្នកនាំចេញ ដោយបានសម្រេចផ្តល់សិទ្ធបន្ថែមដល់ថ្នាក់នាយកដ្ឋាននាំចេញ-នាំចូលនិងថ្នាក់អគ្គនាយកដ្ឋានសេវាកម្ម។
ក្រសួងពាណិជ្ជកម្មនឹងកែសម្រួលកាត់បន្ថយដំណាក់កាលនៃការចេញវិញ្ញាបនបត្របញ្ជាក់ប្រភពដើមទំនិញតាមប្រព័ន្ធស្វ័យប្រវត្តិកម្មជាបន្តទៀត ដើម្បីសម្រួលពាណិជ្ជកម្ម និងបង្កើតបរិយាកាសធុរកិច្ចនៅកម្ពុជាឲ្យកាន់តែល្អប្រសើរ៕