ដោយ ដែន ចែងចាំង
ភ្នំពេញ៖ ចំនួនខុនដូកាន់តែច្រើនបន្ថែមទៀត នឹងដាក់ចូលទីផ្សារនៅឆ្នាំនេះដែលធ្វើឲ្យវិស័យនេះ កាន់តែមានការប្រកួតប្រជែងយ៉ាងស្រូចស្រាវជាមួយនឹងសេវាកម្មអាផាតម៉ិននានា។
អ្នកនាង អាន សុធីតា នាយិកាប្រចាំប្រទេសនៃក្រុមហ៊ុន CBRE Cambodia បានថ្លែងឲ្យដឹងនាព្រឹកថ្ងៃទី២ មករានេះថា ខុនដូចំនួន១៣,០០០យូនីតទៀតនឹងដាក់ចូលទីផ្សារនៅដំណច់ឆ្នាំនេះ ដែលធ្វើឲ្យទីផ្សារនេះកាន់តែមានការប្រកួតប្រជែងគ្នា ដោយសារអ្នកវិនិយោគខុនដូជាជនបរទេសទិញសម្រាប់ជួល និងទុកលក់យកចំណេញ និងជនជាតិខ្មែរទិញសម្រាប់ស្នាក់នៅ និងទុកសម្រាប់ជួលផងដែរ។
អ្នកនាងបន្តថា ខុនដូដែលមានតម្លៃខ្ពស់ពិបាក ក្នុងការលក់នាពេលបច្ចុប្បន្ននេះ ខណៈខុនដួក៏ដូចជាលំនៅដ្ឋានតម្លៃសមរម្យ សម្រាប់អ្នកមានជីវភាពមធ្យមបានលក់ដាច់ច្រើនជាងលំនៅដ្ឋានប្រណីត។
យោងតាមការសិក្សារបស់ក្រុមហ៊ុន VTRUST Appraisal បានរកឃើញថា ដំណាច់ឆ្នាំ២០១៧នេះ ចំនួនខុនដូនៅរាជធានីភ្នំពេញបានកើនដល់៦០៥០០យូនីត និងនៅខេត្តព្រះសីហនុមានចំនួន៥០០០យូនីត។
លោកច្រឹក សុខនីមអគ្គនាយកក្រុមហ៊ុន Century21 Mekong បានថ្លែងថា ទីផ្សារខុនដូបច្ចុប្បន្នមាន៣០ភាគរយ ត្រូវបានគ្រប់គ្រងដោយជនជាតិខ្មែរ និង៧០ភាគរយគ្រប់គ្រងដោយជនបរទេស ប៉ុន្តែលោកសង្កេតឃើញថា និន្នាការប្រជាជនខ្មែរទិញខុនដូបានកើនឡើង៥ភាគរយ នៃទីផ្សារទិញ លក់ខុនដូសរុបក្នុងប៉ុន្មានឆ្នាំចុងក្រោយនេះ៕
