ដោយ វុត្ថា
ភ្នំពេញៈ តំបន់មហាវិថីសម្ដេចតេជោ ឬផ្លូវ៦០ម៉ែត្រ កំពុងទាក់ទាញគម្រោងវិនិយោគធំៗចូលទៅក្នុងតំបន់នេះយ៉ាងច្រើន ដែលនឹងប្រែក្លាយតំបន់នេះ ទៅជាតំបន់អភិវឌ្ឍ៍មួយដ៏សំខាន់របស់ទីក្រុងភ្នំពេញ និងធ្វើឱ្យដីធ្លី និងលំនៅឋានកាន់តែឡើងថ្លៃបន្ថែមទៀត។
គេហទំព័រ Propertyarea.asia ដែលជាគេទំព័ត៌មានអចលនទ្រព្យឈានមុខគេនៅកម្ពុជា សូមលើកយកគម្រោងដែលមានតម្លៃរាប់ពាន់លានទាំងនេះ មកចុះផ្សាយបន្ថែមទៀត។
១) គម្រោងសាងសង់ខុនដូប្រណីតរបស់ក្រុមហ៊ុន R&F Properties
ក្រុមហ៊ុន R&F Properties បានប្រកាសបោះទុនវិយោគ បានប្រកាសបោះទុនវិនិយោគ ៧០០លានដុល្លារសាងសង់គំរោងខុនដូប្រណីត រួមនឹងមជ្ឈមណ្ឌលកីឡានៅតាមបណ្តោយមហាវិថី៦០ម៉ែត្រ។ ការបោះទុនវិនិយោគ របស់វិនិយោគិនចិនរហូតដល់ ៧០០លានដុល្លារអាមេរិកនេះ នឹងប្រែក្លាយតំបន់មួយនេះ កាន់តែរស់រវើក និងទាក់ទាញបន្ថែមទៀត។
២) គម្រោងសាងសង់ និងមជ្ឈមណ្ឌលពាណិជ្ជកម្មកប់ពពក
ក្រុមហ៊ុនយក្សមួយមកពីទីក្រុងហុងកុង ប្រទេសចិន បាននិងកំពុងត្រៀមសាងសង់ និងមជ្ឈមណ្ឌលពាណិជ្ជកម្មកប់ពពកថ្មីមួយ នៅលើមហាវិថីផ្លូវ៦០ម៉ែត្រ។ គំរោងនេះមានឈ្មោះ Urban Village2 ដែលមានចំនួន ៤អាគារ និងកំពស់ ៥១ជាន់ ស្មើនឹងកំពស់ ១៨៣,៦ម៉ែត្រ។ គម្រោងនេះ ជាមជ្ឈមណ្ឌលពាណិជ្ជកម្ម និងប្រភេទលំនៅដ្ឋានបែបសហកម្មសិទ្ធ (ខុនដូ)។
៣) គម្រោងផ្សារទំនើប PH Diamond Place និងបុរីប៉េងហួត
ផ្សារទំនើបលំដាប់អន្តរជាតិរបស់ក្រុមហ៊ុនបុរី ប៉េង ហួត ដែលបានបើកការដ្ឋានសាងសង់កាលពីខែមីនា ឆ្នាំ២០១៨នេះ និងគ្រោងបញ្ចប់ការស្ថាបនានៅឆ្នាំ២០២០ ។ នេះជាផ្សារទំនើបភីអេច ដាយមិនផ្លេស (PH Diamond Place) ដែលត្រូវបានក្រុមហ៊ុនបោះទុនជាង ៦០លានដុល្លារ លើផ្ទៃដី ៦ហិកតា។
ផ្សារទំនើបនេះ ជាផ្នែកមួយនៃគម្រោងអភិវឌ្ឍន៍ចម្រុះ The Star Diamond ដែលមានផ្ទៃដីសរុប ៤០ហិកតារបស់ក្រុមហ៊ុន ប៉េង ហួត គ្រុប។ គម្រោងនេះនឹងអភិវឌ្ឍន៍ជាបុរី អគារខ្ពស់ៗសាលសន្និបាត និងផ្សារទំនើប។ ជាមួយគ្នានេះ ក៏មានគម្រោងបុរីនៅហុំព័ទ្ធជុំនេះផងដែរ។
៤) គម្រោងផ្សារ AEON MALL3
ក្រុមហ៊ុន AEON MALL GROUP បានទិញដី ក្នុងតម្លៃរហូតដល់ជាង ១០០លានដុល្លារនៅតំបន់៦០ម៉ែត្រនេះ ដើម្បីសាងសង់ផ្សារទំនើបរបស់ខ្លួន ដែលនេះជាគំរោងវិនិយោគដ៏ធំមួយទៀតរបស់ក្រុមហ៊ុនជប៉ុន ហើយផ្សារទំនើបទី៣នេះ អាចមានទំហំជាងផ្សារទំនើប AEON MALL1 និង AEON MALL2 ផងដែរ។ ទីតាំងសាងសង់ផ្សារទំនើប AEON MALL3 ស្ថិតនៅភាគខាងត្បូងបុរីប៉េង ហួរប្រមាណ ១គីឡូម៉ែត្រ និងស្ថិតនៅស្របតាមបណ្តោយមហាវិថីសម្តេចតេជោហ៊ុន សែន។
៥) គម្រោងផ្សារទំនើបជីប ម៉ុង
គម្រោងផ្សារទំនើបជីព ម៉ុង ២៧១មេហ្គាម៉ល របស់ក្រុមហ៊ុនជីព ម៉ុង ។ ផ្សារទំនើបនេះ ទើបតែបានបើកការដ្ឋានសាងសង់ នៅថ្ងៃទី៣០ខែសីហាឆ្នាំ២០១៨ និងគ្រោងបញ្ចប់នៅឆ្នាំ២០២០ ក្នុងទំហំទឹកប្រាក់ ២៥២លានដុល្លារ ។ ផ្សារទំនើបដ៏ធំមួយនេះ ស្ថិតក្នុងគម្រោងអភិវឌ្ឍន៍លំនៅឋានប្រណិត និងតំបន់ពាណិជ្ជកម្ម ដឺលេនម៉ាក ២៧១ របស់ជីបម៉ុង លែន។
គម្រោងនេះស្ថិតនៅបណ្ដោយផ្លូវ ២៧១ កែង ៣៧១ និងនៅតាមបណ្ដោយផ្លូវ៦០ម៉ែត្រ (តំបន់បឹងទំពុន)ជាដើម៕
