ដោយៈ រ៉ាណេត
ភ្នំពេញៈ ក្រុមអ្នកជំនាញបាននិយាយថា ខណ្ឌចំនួន៣ នៅរាជធានីភ្នំពេញបាននិងកំពុងតែបន្តជំរុញតម្លៃឡើងថ្លៃគួរឱ្យកត់សម្គាល់ ដែលខ័ណ្ឌទាំងនោះរួមមាន ខណ្ឌជ្រោយចង្វារ ខណ្ឌច្បារអំពៅ និងខណ្ឌដង្កោ ខណៈដែលសកម្មភាពនៃការអភិវឌ្ឍកំពុងតែមានយ៉ាងគំហុក។
អគ្គនាយកក្រុមហ៊ុន PREMIUM Group លោក ម៉ាន់ ច័ន្ទឌី បានមានប្រសាសន៍តាមទូរស័ព្ទកាលពីព្រឹកថ្ងៃទី២ ខែសីហានេះថា លោកទទួលស្គាល់នូវការកើនឡើងនូវតម្លៃដី និងអចលនទ្រព្យនៅក្នុងចំណោមខណ្ឌចំនួន៣ ដូចការលើកឡើងខាងលើ ប៉ុន្តែលោកបានបញ្ជាក់ថា ការកើនឡើងនូវតម្លៃមិនមានភាពស្មើរគ្នានោះទេ ដោយសារភាពល្អប្រសើរ និងកត្តាភូមិសាស្ត្រមានភាពអំនោយផលខុសគ្នា។
-->
លោកបានបន្តថា “ខណ្ឌទាំង៣រួមមានខណ្ឌច្បារអំពៅ ខណ្ឌដង្កោ និងខណ្ឌជ្រោយចង្វារ សុទ្ធតែស្ថិតនៅតំបន់ផ្លូវជាតិសំខាន់ៗទាំង ប៉ុន្តែសក្ដានុពលក្នុងការអភិវឌ្ឍមានភាពខុសគ្នាបន្តិច”។
លោកម៉ាន់ ចាន់ឌីបានបន្តទៀតថា ក្នុងចំណោមខណ្ឌទាំង៣ ខណ្ឌជ្រោយចង្វារមានសក្ដានុពលជាងគេ ដោយសារតែស្ថិតនៅជិតក្រុង ភូមិសាស្ត្រមានអំណោយផលល្អពីធម្មជាតិដែលមានទន្លេនៅអមសងខាង ជាពិសេសមានគម្រោងអភិវឌ្ឍទីក្រុងរណបចំនួន២កើឡើងព្រមគ្នា រួមមានទីក្រុងរណបរបស់ក្រុមហ៊ុន OCIC និងទីក្រុងរណបរបស់ក្រុមហ៊ុនលី យ៉ុងផាត់ ហើយគម្រោងអភិវឌ្ឍលំនៅដ្ឋានកម្រិតខ្ពស់ ក៏សម្រុកទៅកាន់តំបន់ផ្លូវជាតិលេខ៦ដែរ។
នៅក្នុងខណ្ឌជ្រោយចង្វារ នាពេលបច្ចុប្បន្ននេះ ដីដែលមានទីតាំងល្អ និងស្ថិតក្នុងតំបន់អភិវឌ្ឍមានតម្លៃ ចាប់ពី ១៨០០ ដុល្លារក្នុងមួយម៉ែត្រការ៉េ រហូតដល់ជិត ៣០០០ដុល្លារ ឬលើសពីនេះក៏មានដែរ។
លោកឧកញ៉ាតេង រិទ្ធី អគ្គនាយកក្រុមហ៊ុន R Investment Group បានមានប្រសាសន៍ប្រាប់ឱ្យដឹងថា បច្ចុប្បន្ននេះ ខណ្ឌដង្កោ កំពុងតែមានភាពទាក់ទាញយ៉ាងខ្លាំង ដោយសារតែនៅក្នុងខណ្ឌមួយនេះ មានលំហូរនៃចំនួនប្រជាជនចំណាកស្រុកចូលមករស់នៅច្រើន ដែលជំរុញឱ្យមានតម្រូវការលើការលើការស្នាក់នៅច្រើន។ លោកឧកញ៉ាបន្តថា “ខណ្ឌដែលស្ថិតនៅភាគខាងត្បូងនៃរាជធានីភ្នំពេញមួយនេះ មានវិសាលភាពធំទូលាយងាយស្រួលក្នុងការអភិវឌ្ឍន៍ ជាពិសេសតម្លៃដីធ្លីនៅមានកម្រិតនៅឡើយ ដែលវាជាការផ្តល់ឱកាសសម្រាប់បណ្តាអ្នកវិនិយោគទាំងនោះ។
លោកឧកញ៉ាបន្តថា “ បច្ចុប្បន្នបើនិយាយពីតម្លៃដីធ្លីនៅក្នុងខណ្ឌដង្កោ គឺបានកើនឡើងមួយកម្រិតធំរួចទៅហើយ ជាពិសេសកន្លែងដែលជាទីប្រជុំជន និងមានការអភិវឌ្ឍន៍រួចរាល់”។
ចំពោះដីដែលស្ថិតនៅតំបន់ទីប្រជុំជន ដូចជាចំណុចរង្វង់មូលគួរស្រូវ ចំណុចទីប្រជុំជនផ្សារចំការដូង ក៏ដូចជាផ្លូវបេតុងដែលឆ្ពោះទៅតំបន់ព្រៃស គឺមានតម្លៃចន្លោះចាប់ពី៣០០ដុល្លារក្នុងមួយម៉ែត្រការ៉េ ឬអាចលើសពីតម្លៃនេះបន្តិចបន្ទួច។ ប៉ុន្តែបើចំពោះប្រភេទដីដែលនៅទំនេរ និងមានទំហំចាប់ពី១ហិកតាឡើងទៅ អាចមានតម្លៃចាប់ពី៣៥ទៅ១០០ ដុល្លារក្នុងមួយម៉ែត្រការ៉េ ហើយចំពោះប្រភេទដីលំនៅដ្ឋាន ឬជាប្រភេទដីឡូតិ៍ អាចមានតម្លៃរហូតដល់១៥០ដុល្លារក្នុងមួយការ៉េ”។
ងាកមកចាប់អារម្មណ៍ជាមួយវិស័យដីធ្លី និងអចលនទ្រព្យក្នុងខណ្ឌច្បារអំពៅវិញ ត្រូវបានលោកឧកញ៉ា នួន រិទ្ធី អគ្គនាយកក្រុមហ៊ុនអចលនទ្រព្យ Khmer Foundation Appraisal ប្រាប់ឱ្យដឹងផងដែរថា ខណ្ឌច្បារអំពៅសព្វថ្ងៃនេះ មានការអភិវឌ្ឍខ្លាំងមិនចាញ់ខណ្ឌដទៃនោះឡើយ ហើយគម្រោងអភិវឌ្ឍធំៗ ក៏ដូចជាគម្រោងលំនៅដ្ឋានកម្រិតខ្ពស់លំដាប់អភិជនក៏ស្ថិតនៅក្នុងខណ្ឌមួយនេះដែរ។ នៅក្នុងខណ្ឌច្បារអំពៅ បើស្ថិតនៅតាមតំបន់ផ្លូវជាតិ១ គឺកាត់តែមានភាពទាក់ទាញយ៉ាងខ្លាំង ដោយសារតែសកម្មភាពនៃការអភិវឌ្ឍ និងភាពរីកចម្រើនយ៉ាងគំហុក បានធ្វើឱ្យតម្លៃដីនៅតំបន់ទាំងនេះ មានការកើឡើងយ៉ាងខ្ពស់”។
លោកឧកញ៉ាបន្តថា “ដោយសារល្បឿននៃការអភិវឌ្ឍនៅតំបន់នេះ បានធ្វើឱ្យតម្លៃដីធ្លី នៅតាមបណ្តោយផ្លូវនេះមានកំណើនជាប្រចាំ”។
ជាក់ស្តែងបើគិតចាប់ពីចំណុចគល់ស្ពានច្បារអំពៅ រហូតដល់ម្តុំបុរីប៉េងហួត តម្លៃដីអាចចាប់ពី២០០០ ទៅ៣៥០០ដុល្លារក្នុងមួយម៉ែត្រការ៉េ។ ចាប់ពីតំបន់ម្ដុំបឹងស្នោ រហូតដល់តំបន់ផ្លូវបំបែករោងចក្រស្រាបៀរថៃហ្គ័រ អាចមានតម្លៃក្នុងចន្លោះ១៥០០ ទៅ២០០០ដុល្លារ ក្នុងមួយម៉ែត្រការ៉េ។ ដោយឡែកចាប់ពីតំបន់ផ្លូវបំបែក ចូលរោងចក្រស្រាបៀរថៃហ្គ័ររហូតដល់ផ្សារគរគី អាចមានតម្លៃក្នុងចន្លោះ២៥០ ទៅ៤០០ដុល្លារក្នុងមួយម៉ែត្រការ៉េ ប៉ុន្តែបើនៅតំបន់ទីប្រជុំជនផ្សារគឺមានតម្លៃថ្លៃជាងនេះ”៕
