ដោយ វិសាល
ភ្នំពេញៈ ក្រុមហ៊ុន Bronze Axe Plc ជាក្រុមហ៊ុនក្នុងស្រុកដ៏ធំមួយ បាននិងកំពុងរៀបចំសាងសង់ទីក្រុងរណបដ៏ធំមួយនៅខេត្តសៀមរាប ស្ថិតនៅលើផ្ទៃដីចន្លោះពី១០០ទៅ២០០ហិកតា ដើម្បីរួមចំណែកអភិវឌ្ឍន៍ខេត្ត និងទាក់ទាញភ្ញៀវទេសចរណ៍អន្តរជាតិ។
យោងតាមសេចក្តីប្រកាសរបស់ក្រុមហ៊ុនខាងលើបានឲ្យដឹងថា គំរោងនេះនឹងអភិវឌ្ឍន៍ដោយក្រុមហ៊ុន Bronze Axe Plc ដែលផ្តោតលើការវិនិយោគទៅលើសំណង់ផ្ទះជាច្រើនប្រភេទ រួមទាំងផ្ទះសម្រាប់ជនចូលនិវត្តន៍ (Retirement Home) សណ្ឋាគារ និងរមនីយដ្ឋាន សួនអំពិលអំពេកកន្លែងកំសាន្ត (Theme Park) និងគម្រោងផ្សេរៗជាច្រើនទៀត ។
-->
ក្រុមហ៊ុនជឿជាក់យ៉ាងមុតមាំថា គម្រោងនេះនឹងក្លាយជាជំរើសថ្មីបន្ថែមទៀតសម្រាប់ភ្លៀវទេសចរណ៍ដែលមកកំសាន្តនៅខេត្តសៀមរាប។
ប្រធានក្រុមប្រឹក្សាភិបាលរបស់ក្រុមហ៊ុន Bronze Axe Plc លោកស្រី Flora Chea បានឲ្យដឹងថា ក្រុមហ៊ុនមានចក្ខុវិស័យចង់ប្រែក្លាយតំបន់ ដែលខ្លួនអភិវឌ្ឍន៍ឲ្យទៅជាទីក្រុងថ្មីមួយ ហ៊ុំទៅដោយធម្មជាតិពណ័បៃតង ស្របទៅនឹងខេត្តសៀមរាបដែលជាតំបន់បេតិកភណ្ឌពិភពលោក។ លោកស្រីជឿជាក់ថា នៅ៥ឆ្នាំខាងមុខនេះ វិស័យអចលនទ្រព្យ និងសំណង់នៅខេត្តសៀមរាបនឹងមានមានការរីកលូតលាស់ជាខ្លាំង។
អ្វីគួរឲ្យកត់សំគាល់ គឺក្រុមហ៊ុនបានរៀបចំកម្មវិធីជួបជុំម្ចាស់អាជីវកម្ម និងសហគ្រិនប្រមាណ ២០០ នាក់ ដែលរៀបចំឡើងនៅសណ្ឋាគារ Raffle Le Royal ភ្នំពេញ ដោយមានការចូលរួមពីថ្នាក់ដឹកនាំរបស់ក្រុមហ៊ុនជាច្រើនរូប។ គោលបំណងក្នុងការរៀបចំកម្មវិធីជួបជុំនេះ គឺដើម្បីចែករំលែកបទពិសោធន៍ និងការគ្រប់គ្រងអាជីវកម្មដល់សហគ្រិនដែលបានចូលរួម និងធ្វើការណែនាំពីទស្សនវិស័យ និងចក្ខុវិស័យរបស់កុ្រមហ៊ុន Bronze Axe Plc។
សេចក្តីប្រកាសព៌តមានដដែលបានឲ្យដឹងទៀតថា ដោយមើលឃើញពីកំណើនសេដ្ឋកិច្ចកម្ពុជា និងពីសក្កានុពលរបស់ខេត្តសៀមរាប ជាក់ស្តែងមានគម្រោងអភិវឌ្ឍន៍ជាច្រើនដែលនឹងកើតមានឡើងក្នុងខេត្តសៀមរាប មានដូចជាការវិនិយោគលើអាងចិញ្ចឹមត្រី និងជម្រកសត្វជិតផុតពូជ ព្រលានយន្តអន្តរជាតិថ្មី ផ្សារបណ្តែតទឹក និងគម្រោងធំៗជាច្រើនផ្សេងទៀត។
គំរោងនេះជាផ្នែកដ៏សំខាន់មួយ ដើម្បីជំរុញកំណើនទេសចរណ៍នៅខេត្តសៀមរាបបន្ថែមទៀត ខណៈក្រសួងទេសចរណ៍ អាជ្ញាធរជាតិអប្សរា គណៈកម្មាធិការអន្តរជាតិសម្របសម្រួលការគាំពារ និងអភិវឌ្ឍន៍តំបន់ប្រវត្តិសាស្ត្រអង្គរ (ICC-Angkor) រួមជាមួយអង្គការយូណេស្កូ (UNESCO) ប្រចាំកម្ពុជា បានជួបប្រជុំពិភាក្សាលើការជំរុញសកម្មភាពទេសចរណ៍នៅតំបន់អង្គរ និងតំបន់ជុំវិញដែលរៀបចំឡើងនៅទីស្ដីការក្រសួងទេសចរណ៍ នាថ្ងៃទី៣១ ខែកក្កដា ឆ្នាំ២០១៩ ក្រោអធិបតីភាពលោកថោង ខុន រដ្ឋមន្រ្តីក្រសួងទេសចរណ៍។ ហើយបញ្ហាសំខាន់មុនគេ គឺសៀមរាបត្រូវការការអភិវឌ្ឍផលិតផលទេសចរណ៍ថ្មីៗបន្ថែមទៀត ដើម្បីពន្យាការស្នាក់នៅរបស់ភ្ញៀវទេសចរណ៍៕
អានបន្ថែម៖ លោកឧកញ៉ាលី ហួរ គ្រោងសាងសង់ទីក្រុងថ្មីរណបមួយនៅតាមបណ្តោយផ្លូវជាតិលេខ
