ដោយ វុត្ថា
ភ្នំពេញៈ មន្ត្រីជំនាញក្រសួងសាធារណៈការ និងដឹកជញ្ជូនបានអះអាងថា គំរោងសាងសង់ផ្លូវក្រវ៉ាត់ក្រុងទី៤បានបញ្ចប់រួចហើយ ដែលធ្វើឡើងដោយក្រុមហ៊ុន Shanghai Construction Group ខណៈក្រុមហ៊ុននេះ កំពុងសាងសង់ផ្លូវក្រវ៉ាត់ក្រុងទី៣ នាពេលបច្ចុប្បន្ន។
លោក វ៉ា ស៊ីមសូរីយ៉ា អ្នកនាំពាក្យក្រសួងសាធារណៈ និងដឹកជញ្ជូនបានឱ្យដឹងតាមទូរស័ព្ទនៅថ្ងៃទី ២៦ ខែសីហា ឆ្នាំ ២០១៩នេះថា ក្រុមហ៊ុននេះ បានសិក្សាគម្រោងផ្លូវប្រវ៉ាត់ក្រុងទី៤នេះ បានបញ្ចប់រួចហើយ និងបានបញ្ចូនផែនការសិក្សា មកដល់ក្រសួង តែក្រសួងត្រូវការពេលវេលាពិនិត្យ និងសិក្សាឡើងវិញមុននឹងសម្រេចជាផ្លូវការថា នឹងចាប់ផ្តើមប្រកាសសាងសង់ជាផ្លូវការនៅពេលណានោះ។
លោកបន្តថា “ការពិនិត្យនិងសិក្សាឡើងវិញនេះ នឹងប្រើពេលវេលាយូរ ព្រោះអ្វីៗមិនអាចធ្វើទៅលឿនបានទេ យើងត្រូវធ្វើទៅតាមនីតិវិធី ហើយនៅពេលក្រសួងសិក្សាចប់ ក្រសួងនឹងប្រកាសជាផ្លូវការហើយ”។
លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូន នៅក្នុងពិធីបើកការដ្ឋានជួសជុលផ្លូវខេត្តព្រះសីហនុចំនួនពីរខ្សែ កាលថ្ងៃទី២០ ខែសីហា ឆ្នាំ ២០១៩ កន្លងមកនេះបានឱ្យដឹងថា ផ្លូវក្រវ៉ាត់ក្រុងទី ៤ បាននឹងកំពុងសិក្សាសាងសង់ឆាប់ខាងមុខនេះ ដើម្បីឆ្លើយតបទៅនឹងការឡើងនៃការដឹកជញ្ជូនទំនិញ កាត់បន្ថយការកកស្ទះ និងការធ្វើចរាចរណ៍មានភាពងាយស្រួល និងកំណើនសេដ្ឋកិច្ចកម្ពុជាមានការរីកចំរើន។
ផ្លូវក្រវ៉ាត់ក្រុងទី៣ បាននិងកំពុងសាងសង់ដោយក្រុមហ៊ុន Shanghai Construction Group របស់ចិន ហើយត្រូវបានរដ្ឋាភិបាលបើកការដ្ឋានសាងសង់កាលពីថ្ងៃទី ១៤ ខែមករា ឆ្នាំ២០១៩កន្លងមកនេះ ដែលមានប្រវែងជាង៥២គីឡូម៉ែត្រ ក្រោមការចំណាយថវិកាសរុបប្រមាណ ២៧៣លានដុល្លារអាមេរិក ដែលជាហិរញ្ញប្បទានសម្បទានពីរដ្ឋាភិបាលចិន។
ការស្ថាបនាផ្លូវនេះ មានទំហំទទឹងផ្លូវរហូតដល់ទៅ២៧ម៉ែត្រ សម្រាប់ទីប្រជុំជន និង សម្រាប់ក្រៅទីប្រជុំជនវិញមានទំហំទទឹងផ្លូវ២៥ម៉ែត្រ នឹងប្រើរយៈពេល៤២ខែ ដែលគ្រោងបញ្ចប់នៅខែធ្នូ ឆ្នាំ២០២១។
ចំពោះគំរោងផ្លូវក្រវ៉ាត់ក្រុងទី៤ នឹងចាប់ផ្តើមចេញដំណើរពីតំបន់ណា និងបញ្ចប់នៅតំបន់ណាគេហទំព័រPropertyarea.asia នឹងធ្វើបច្ចុប្បន្នភាព (update) ជូននៅពេលក្រោយទៀត៕
