ដោយ វុត្ថា
ភ្នំពេញ៖ បរិយាកាសនយោបាយ និងតម្លៃដីធ្លី និងអចលនទ្រព្យហក់ឡើងខ្ពស់កប់ពពកសម្រាប់ឆ្នាំ ២០១៨ គឺជាក្តីព្រួយបារម្ភរបស់អ្នករកស៊ីអចលនទ្រព្យ និងអ្នកជំនួញ ដោយពួកគេគិតថា អាចនឹងមានបញ្ហាប្រឈមខ្លះសម្រាប់ទីផ្សារមួយនេះ ។
ក្នុងរយៈពេលប៉ុន្មានឆ្នាំកន្លងមកនេះ ត្រូវបានគេមើលឃើញថា ទីផ្សារអចលទ្រព្យបាននឹងកំពុងរីកចម្រើនយ៉ាងខ្លាំង លោក ច្រឹក សុខនីម អគ្គនាយ Century12 Mekong បានថ្លែងអោយដឹងថា សម្រាប់ឆ្នាំ ២០១៨ នេះ បានបង្ហាញថា អាចនឹងមានការលំបាកចំពោះការលក់អចលនទ្រព្យដោយសារតម្លៃឡើងថ្លៃកប់ពពក និងការបោះឆ្នោជាតិនឹងឈានជើងមកដល់ឆាប់ៗ ។ លោកបន្តថា តម្លៃអចលនទ្រព្យអាចនឹងហក់ឡើងខ្ពស់ជាងបច្ចុប្បន្ន។
លោកថា «តម្លៃដីនឹងមិនធ្លាក់ចុះទេ ប៉ុន្តែវាពិបាកក្នុងការលក់ចេញ ដោយសារតែចំនួនអ្នកទិញគឺមិនកើនឡើងច្រើន។ ប្រសិនបើតម្លៃដីធ្លីធ្លាក់ចុះ ក៏ពួកគេមិនទិញច្រើនដែរក្នុងឆ្នាំ ២០១៨ នេះ ព្រោះអ្នកវិនិយោគទុនឆ្នាំនេះ ប្រើប្រាស់ប្រាក់កម្ចីពីធនាគារ។ បន្ទាប់ពីឆ្នាំ ២០១៨ តទៅ អ្នកវិនិយោគនឹងប្រើប្រាស់សាច់ប្រាក់របស់ខ្លួនគេដើម្បីទិញដីធ្លី»។
លោកបន្តថា សម្រាប់ទីផ្សារខុនដូរវិញគឺមិនមានហានីភ័យទេ ព្រោះចំនួនអ្នកទិញខុនដូក្នុងស្រុកបានកើនឡើង ៥ ភាករយ។ នេះបើយើងមើលតួរលេខទិញ និងលក់។
លោក គីម ហ៊ាង ប្រធានសមាគមអ្នកវាយតម្លៃអចលនទ្រព្យកម្ពុជា បានអោយដឹងដែរថា តម្លៃដីធ្លីនឹងមានការផ្លាស់ប្តូរ ដោយសារតែកាលពី ២ទៅ ៣ ឆ្នាំមុន អ្នកលក់មានលទ្ធភាពកំណត់តម្លៃដីខ្លួនឯង តែមកដល់ពេលបច្ចុប្បន្ននេះ គឺអ្នកទិញគឺជាអ្នកកំណត់តម្លៃអោយវិញ។
លោកបន្តថា «ទីផ្សារគេហដ្ឋានគឺកំពុងតែមានដំណើរការល្អប្រសើរ ប៉ុន្តែគេហដ្ឋានដែលមានតម្លៃសមរម្យគឺកំពុងស្ថិតក្នុងតម្រូវការខ្ពស់»៕
