ដោយ គង់ សូរិយា
ភ្នំពេញ៖ ក្រុមហ៊ុន Belt Road Capital Management (BRCM) បានវិនិយោគទឹកប្រាក់១,៨លានដុល្លារអាមេរិកជាមួយក្រុមហ៊ុន Digital Classifieds Group (DCG) ដែលជាក្រុមហ៊ុនផ្សាយពាណិជ្ជកម្មតាមអ៊ីនធើណេត និងជាក្រុមហ៊ុនដែ លនៅពីក្រោយគេហទំព័រ www.realestate.com.kh ឈានមុខគេ។
លោក Mathew Care អគ្គនាយកក្រុមហ៊ុន BRCM បានថ្លែងឲ្យដឹងកាលពីម្សិលម៉ិញនេះថា ក្រុមហ៊ុនយើងបានបណ្តាក់ទុនយ៉ាងច្រើន លើផ្នែកបច្ចេកវិទ្យានិងធនធានមនុស្ស ដែលបានទាក់ទាញអ្នកវិនិយោគកាលពីពេលថ្មីៗនេះ។ នៅ ពេលយើងចាប់ផ្តើមអាជីវកម្មលើកតំបូង យើងមើលស្រាលពីសារៈសំខាន់នៃវិស័យគេហទំព័រអនឡាញ ប៉ុន្តែក្រោយពីដឹងពីសារៈប្រយោជន៍របស់វា យើងបានចំណាយពេលជាង១៨ខែ ដើម្បីបង្កើតគេហទំព័រលំដាប់ពិភពលោកមួយនេះឡើង ដោយផ្អែកលើបច្ចេកវិទ្យាអចលនទ្រព្យអនឡាញអូស្រ្តាលី ដែលបច្ចុប្បន្នកំពុងបង្ហាញពីលទ្ឋផលដ៏ប្រសើរ។
លោកបន្តថា “បច្ចុប្បន្នយើងកំពុងពិនិត្យមើលឳកាស ពង្រីកអាជីវកម្មបន្តទៀត ពិសេសនៅកម្ពុជា ព្រោះយើងជឿជាក់លើបទពិសោធន៍ខាងគេហទំព័រ និងក្រុមការងារខ្មែរ និងបរទេសរបស់យើងអាចបង្កើតឳកាសថ្មីៗជាច្រើនទៀត”។លោកបន្តថា “ដើមទុននេះនឹងធ្វើឲ្យក្រុមហ៊ុន DCG និង realestate.com.kh មានសមត្ថភាពពង្រីកខ្លួនកាន់តែធំ នៅក្នុងទីផ្សារអនឡាញកម្ពុជានិងអាស៊ីអាគ្នេយ៍”។
ប្រធានផ្នែកវិនិយោគនៃក្រុមហ៊ុន BRCM លោក Alex Odom បានថ្លែងថាដោយមើលឃើញការរីកចម្រើនយ៉ាងឆាប់រហ័ស នៃក្រុមហ៊ុន realestate.com.kh និងជំនាញវិជ្ជាជីវៈច្បាស់លាស់ នៅក្នុងរាល់ប្រតិបត្តិការក្នុងតំបន់ និងអន្តរជាតិរបស់ក្រុមហ៊ុន DCG ខ្ញុំមានទំនុកចិត្តក្នុងការណែនាំឳកាសវិនិយោគនេះ ទៅដល់ដៃគូអាជីវកម្មនៃក្រុមហ៊ុន BRCM”។ លោកបន្ថែមថា “ខ្ញុំជឿជាក់ថា ក្រុមហ៊ុននេះនឹងមានទីផ្សាររ៉ឹងមាំនៅកម្ពុជា និងអន្តរជាតិ”។
អគ្គនាយកក្រុមហ៊ុន Realestate.com.kh លោក Tom O”Sullivan បានមានប្រសាសន៍ថា “ពីមុនយើងធ្វើការជាមួយលោក Alex Odom ប្រធានផ្នែកវិនិយោគរបស់ក្រុមហ៊ុន BRCM ហើយខ្ញុំតែងតែគោរពនូវជំនាញរបស់គាត់”។លោកបន្តថា” ទោះបីជាយ៉ាងណា បើទោះបីជាយើងមិនបានស្វែងរកទុនសម្រាប់ពេលនេះ ប៉ុន្តែយើងជឿថា លោក Alex និងក្រុមការងាររបស់គាត់ នឹងនាំយកនូវចំណេះដឹង និងបទពិសោធន៍ល្អៗសម្រាប់ DCG”។
លោកបន្តថា ទឹកប្រាក់វិនិយោគបន្ថែមនេះ នឹងជម្រុញភាគរីកចម្រើននៅក្នុងទីផ្សារដែលមានស្រាប់របស់ក្រុមហ៊ុន DCG រួមទាំងការពង្រីកអាជីវកម្មបន្ថែម នៅក្នុងប្រទេសកម្ពុជា”។ លោកបន្តថា “ទុនវិនិយោគនេះ ក៏ជាយុទ្ឋសាស្រ្តមួយរបស់ក្រុមហ៊ុន BRCM បើពិនិត្យមើលការផ្តោតរបស់ក្រុមហ៊ុនទៅលើបណ្តាប្រទេស ដែលទទួលឥទ្ឋិពលពីគោលនយោបាយ”ផ្លូវមួយ ខ្សែក្រវ៉ាត់មួយ” របស់ប្រទេសចិន ជាពិសេសបណ្តាប្រទេសដែលស្ថិតនៅតាមដងទន្លេមេគង្គ ដូចជា ឡាវ វៀតណាម ភូមា និងប្រទេសថៃ៕
